މޮރޮކޯގެ ފުޓްބޯޅަ ޓީމުގެ ކޯޗު ކަމުގެ މަގާމުން ވަލީދް ރެގްރަގީ އިސްތިއުފާ ދީފި އެވެ.
އެމެރިކާ އާއި ކެނެޑާގެ އިތުރުން މެކްސިކޯގައި އަންނަ ޖޫން މަހު ފެށުމަށް ހަމަޖެހިފައިވާ ވޯލްޑްކަޕަށް ވަގުތު ކުޑަތަން ވެފައިވަނިކޮށް ރެގްރަގީ މަގާމުން އިސްތިއުފާ ދީފައިވަނީ މޮރޮކޯގެ ފުޓްބޯޅަ ފެޑަރޭޝަނާއިއެކު ބޭއްވި މަޝްވަރާތަކަށްފަހު ދެ ފަރަތުން އެއްބަސްވެގެންނެވެ.
އުމުރުން 50 އަހަރުގެ ރެގްރަގީގެ އިރުޝާދުގެ ދަށުން މޮރޮކޯ ވަނީ 2022 ވަނަ އަހަރު ގަތަރުގައި ބޭއްވި ވޯލްޑްކަޕްގެ ސެމީ ފައިނަލުގެ ޖާގައެއް ހޯދާފަ އެވެ. މިއީ ވޯލްޑްކަޕްގެ ސެމީ ފައިނަލުން އެފްރިކާގެ ގައުމެއް ފުރުސަތު ހޯދި ފުރަތަމަ ފަހަރެވެ.
ރެގްރަރީ މޮރޮކޯގެ ކޯޗު ކަމާއި ހަވާލުވެފައިވަނީ 2022 ވަނަ އަހަރުގެ ވޯލްޑްކަޕް ފެށެން ތިން މަސް ދުވަހަށް ވެފައިވަނިކޮށެވެ.
މޮރޮކޯގެ ފުޓްބޯޅަ ފެޑަރޭޝަނުން ނެރެފައިވާ ބަޔާނެއްގައި ބުނެފައިވަނީ މިއީ ކުއްލި ބަދަލެއް ނޫން ކަމަށާއި މިއީ މޮރޮކޯގެ ފުޓްބޯޅަ އިތުރަށް ތަރައްގީ ކުރުމުގެ ގޮތުން އެކުލަވާލާފައިވާ ރޯޑްމެޕާއި އެއްގޮތަށް ކުރެވިފައިވާ ކަމެއް ކަމަށެވެ.
މޮރޮކޯގެ ކޯޗު ކަމުގެ މަގާމުން އިސްތިއުފާ ދިނުމަށްފަހު ރެގްރަގީ ބުނެފައިވަނީ މިއީ ޓީމަށް ބަދަލުތަކެއް އަންނަން ޖެހޭ ވަގުތެއް ކަމަށެވެ.
"ޓީމަށް މިހާރު ބޭނުންވަނީ އައު މޫނެއް އަދި އައު ވިސްނުންތަކާއިއެކު ބަދަލުތަކެއް ޓީމަށް ގެންނަން ޖެހޭ ވަގުތެއް މިއީ. އަހަރެން މަގާމުން ވަކިވީ މިފަދަ ބަދަލެއް ޓީމަށް ގެނައުމަށް ފުރުސަތު ދިނުމުގެ ގޮތުން." ރެގްރަގީ ބުންޏެވެ.
ރެގްރަގީގެ އިރުޝާދުގެ ދަށުން މޮރޮކޯ ވަނީ މިދިޔަ އަހަރު އަމިއްލަ ގައުމުގައި ބޭއްވި އެފްރިކަން ކަޕް އޮފް ނޭޝަންސްގެ ފައިނަލުގައި ކުޅެފަ އެވެ. ސެނެގާލް އާއި ދެކޮޅަށް ކުޅުނު ފައިނަލް މެޗުން މޮރޮކޯ ބަލިވެފައިވަނީ 1-0 ގެ ނަތީޖާ އަކުންނެވެ.
ކުރިއަށް އޮތް ވޯލްޑްކަޕްގެ ފުރަތަމަ މެޗުގައި އަންނަ ޖޫން މަހުގެ 13 ވަނަ ދުވަހު މޮރޮކޯ ނިކުންނާނީ ފަސް ފަހަރު މަތިން މި މުބާރާތް ކާމިޔާބުކޮށްފައިވަނީ ބްރެޒިލް އާއި ދެކޮޅަށެވެ.
މޮރޮކޯގެ ފެޑަރޭޝަނުން ވަނީ ގައުމީ ޓީމުގެ ކޯޗު ކަމަށް އެ ގައުމުގެ 23 އަހަރުން ދަށުގެ ޓީމުގެ ކޯޗު ކަމަށް އުމުރުން 49 އަހަރުގެ މުހައްމަދު އޮއާބީ ހަމަޖައްސާފަ އެވެ.