އިޓާލިއަން ކަޕުގެ ސެމީ ފައިނަލުގައި ލާޒިއޯ އާއި އެޓަލާންޓާ ބައްދަލުކުރި ފުރަތަމަ ލެގު އެއްވަރުވެގެން ނިމިއްޖެއެވެ.
ލާޒިއޯ އާއި ރޯމާގެ ހޯމް ދަނޑުކަމަށްވާ ސްޓޭޑިއޯ އޮލިމްޕިކޯގައި ކުޅުނު މި މެޗު އެއްވަރުވީ 2-2 ގެ ނަތީޖާއަކުންނެވެ. ދެ ޓީމުގެ ފަރާތުން ވެސް ދާދި ހަމަހަމަ ކުޅުމެއް ފެނިގެންދިޔަ މި މެޗުގައި ގިނަ ހަމަލާތަކެއް އުފެއްދީ އެޓަލާންޓާއިންނެވެ. އެ ޓީމުން ޖުމްލަ 10 ހަމަލާއެއް އުފެއްދިއިރު ލާޒިއޯއިން ފޮނުވާލީ ހަ ހަމަލާއެވެ.
އެހެންނަމަވެސް ގޯލާ އަމާޒުވާގޮތަށް ގިނަ ހަމަލާ ފޮނުވާލީ ލާޒިއޯއިންނެވެ. އެ ޓީމުން ތިން ހަމަލާއެއް އޮން ޓާގެޓަށް ފޮނުވާލިއިރު އެޓަލާންޓާއަށް ފޮނުވާލެވުނީ ދެ ހަމަލާއެކެވެ. މެޗުގައި ފެނިގެންދިޔަ ހަތަރު ލަނޑު ވެސް ޖަހާފައިވަނީ ދެވަނަ ހާފުގައެވެ.
ލާޒިއޯއިން ފުރަތަމަ ލަނޑުޖަހައި ލީޑުނެގިއިރު މި ލަނޑު އެ ޓީމަށް ކާމިޔާބުކޮށްދިނީ ފިސާޔޯ ޑެލެ ބަޝިރޫއެވެ. 47 ވަނަ މިނެޓުގައި ބަޝިރޫ ލަނޑުޖެހިއިރު އޭގެ ހަތަރު މިނެޓުފަހުން މާރިއޯ ޕަސަލިޗް ވަނީ އެޓަލާންޓާއަށް ނަތީޖާ ހަމަހަމަކޮށްދީފައެވެ.
ދެވަނަ ފަހަރަށްވެސް މެޗުގައި ލީޑުނެގީ ލާޒިއޯއިންނެވެ. 87 ވަނަ މިނެޓުގައި ބުލާޔޭ ޑިއާގެ ލަނޑުން އަނެއްކާވެސް މޮޅެއް ހޯދުމުގެ އުއްމީދުގައި ލާޒިއޯއިން ކުޅެމުން ދަނިކޮށް، އޭގެ ދެމިނެޓު ފަހުން ޔޫނުސް މޫސާ ވަނީ ލަނޑެއް ޖަހައި އަލުން ނަތީޖާ ހަމަހަމަކޮށްފައެވެ.
މިއާއެކު މި ދެ ޓީމުގެ ތެރެއިން ފައިނަލްގެ ޖާގައެއް ހޯދާނެ ޓީމެއް ކަށަވަރުކުރުމަށް ޖެހޭނީ މި ދެ ޓީމު ވާދަކުރާ ސެމީ ފައިނަލްގެ ދެވަނަ ލެގަށް މަޑުކުރާށެވެ. ދެވަނަ ލެގު އޮންނާނީ އެޓަލާންޓާގެ ދަނޑުގައި އޭޕްރިލް މަހުގެ 23 ވަނަ ދުވަހުއެވެ.