ކޮޕާ ޑެލްރޭގެ ފައިނަލުގެ ފަހު ޖާގަ، ރެއާލް ސޮސިއެޑާޑުން ހޯދައިފިއެވެ.
ސޮސިއެޑާޑުން ފައިނަލްގެ ޖާގައެއް ހޯދީ، މުބާރާތުގެ ސެމީ ފައިނަލުގައި އެތުލެޓިކް ކުލަބާ ދެކޮޅަށް ކުޅުނު ދެ ލެގުން ވެސް މޮޅުވެ، 0-2 ގެ އެގްރިގޭޓް ނަތީޖާއަކުން ކުރިހޯދައިގެންނެވެ.
ދެވަނަ ލެގުގައި އެތުލެޓިކް ކުލަބުގެ ދަނޑުގައި 51,281 ސަޕޯޓަރުންގެ ކުރިމަތީގައި ކުޅުނު މެޗުން ސޮސިއެޑާޑް މޮޅުވީ 0-1 ގެ ނަތީޖާއަކުންނެވެ.
ވަރަށް ވާދަވެރި ކުޅުމެއް ދެ ޓީމުގެ ފަރާތުން ވެސް ފެނިގެންދިޔަ މި މެޗުގައި ދެ ޓީމުން ވެސް ވަނީ ގިނަ ފުރުސަތުތަކެއް ތަނަވަސްކޮށްފައެވެ.އެގޮތުން ސޮސިއެޑާޑުން ޖުމްލަ 11 ހަމަލާއެއް އުފެއްދިއިރު، އެތުލެޓިކް ކުލަބުން ނުވަ ހަމަލާއެއް އުފައްދާފައިވެއެވެ. ސޮސިއެޑާޑަށް ގޯލާ އަމާޒުވާގޮތަށް ފޮނުވާލެވުނީ ފަސް ހަމަލާއެވެ. އެތުލެޓިކް ކުލަބަށް ފޮނުވާލެވުނީ އެންމެ ދެ ހަމަލާއެވެ.
މެޗުގައި ފެނިގެންދިޔަ ހަމައެކަނި ލަނޑަކީ، މެޗުގެ ފުރިހަމަވަގުތު ހަމަވާން ތިން މިނެޓަށްވެފައި ވަނިކޮށް މިކެލް އޮޔަރްޒަބަލް ކާމިޔާބުކޮށްދިން ލަނޑެކެވެ. މޮޅަކާއެކު ސެމީގެ ދެ ލެގު ވެސް ސޮސިއެޑާޑަށް ނިންމާލަދިން މި ލަނޑު، 87 ވަނަ މިނެޓުގައި އޭނާ ކާމިޔާބުކޮށްދިނީ ލިބުނު ޕެނަލްޓީއަކުންނެވެ.
މުބާރާތުގެ ފައިނަލުގައި ސޮސިއެޑާޑް ނުކުންނާނީ އެގްރިގޭޓް ނަތީޖާއިން ބާސާގެ މައްޗަށް ކުރިހޯދި އެތުލެޓިކޯ މެޑްރިޑާ ދެކޮޅަށެވެ. އެތުލެޓިކޯއާއި ބާސާގެ ދެ ކުރިމަތިލުމުގެ އެގްރިގޭޓުގައި އެތުލެޓިކޯއަށް ކުރި ލިބުނީ 3-4 ގެ ނަތީޖާއަކުންނެވެ. ފައިނަލް މެޗު އޮންނާނީ އޭޕްރިލް މަހުގެ 19 ވަނަ ދުވަހުއެވެ.