އެމެރިކާއާއި ޔަހޫދީން ގުޅިގެން އީރާނާ ދެކޮޅަށް ފަށާފައިވާ ހަނގުރާމައަކީ ސަރަޙައްދީ ހަމަޖެހުން ނަގައިލައި، މުޅި މެދުއިރުމަތި ނިއުކްލިޔަރ ހަތިޔާރުގެ ބިރުވެރިކަމާއި އިންސާނީ ކާރިސާއަކަށް ވައްޓައިލުމަށް ހިިންގަމުންދާ "ރޭވުންތެރި ޢުދުވާނެއް"ގެ ގޮތުގައި ސިފަކޮށް، ރަޝިޔާއާއި ޗައިނާއިން ހަނގުރާމަ ހުއްޓައިލުމަށް ގޮވައިލައިފިއެވެ. އީރާނާ ދެކޮޅަށް އެމެރިކާއާއި ޔަހޫދީން ހަނގުރާމަ ފަށާފައި ވަނީ ފެބުރުވަރީ 28ވަނަ ދުވަހުއެވެ.
މި ހަނގުރާމައާ ގުޅޭ ގޮތުން ކަންބޮޑުވުން ފާޅުކުރެއްވުމުގެ ގޮތުން ޗައިނާގެ ޚާރިޖީ ވަޒީރު ވޮންގ ޔީ ވަނީ ޔަހޫދީންގެ ޚާރިޖީ ވަޒީރު ގިދިއޮން ސާރަށް ފޯނުން ގުޅުއްވާފައެވެ. ވޮންގ ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕާއި ޔަހޫދީންގެ ބޮޑުވަޒީރު ބެންޔަމިން ނަތަންޔާހޫ އިސްވެ އީރާނަށް ޙަމަލާ ދީފައި ވަނީ، އީރާނާއި އެމެރިކާއާ ދެމެދު ކުރަމުން ދިޔަ މަޝްވަރާތަކުގައި "ބޮޑެތި ކުރިއެރުންތަކެއް" ލިބެމުން ދަނިކޮށް ކަމުގައެވެ. އަދި، އީރާންގެ ނިއުކްލިޔަރ ހަކަތަ އުފެއްދުމުގެ ޕުރޮގުރާމާ ގުޅޭ ގޮތުން ކުރަމުން ދިޔަ މަޝްވަރާތަކުގައި ޔަހޫދީންގެ ސަލާމަތީ ކަންބޮޑުވުންތަކަށް ޙައްލު ހޯދުނު ކަމުގައި ވެސް ވޮންގ ވިދާޅުވިއެވެ. މީގެ އިތުރުން، ހަނގުރާމައާ ގުޅިިގެން ސުލްޙަވެރި މަޝްވަރާތަކަށް ހުރަސް އެޅިފައިވާ ކަން ވެސް އޭނާ ފާހަގަ ކުރެއްވިއެވެ.
"ބާރުގެ ބޭނުންކޮށްގެން ޙަޤީޤީ ޙައްލެއް ނުލިބޭނެ. އޭގެ ބަދަލުގައި މި ކަމުގެ ސަބަބުން އައު މައްސަލަތަކާއި، ދިގު މުއްދަތުގެ ނުރައްކާތެރި ނަތީޖާތަކެއް ނުކުންނާނެ،" ވޮންގ ވިދާޅުވިއެވެ. މީގެ އިތުރުން، އީރާނުގައި ތިބި ޗައިނާގެ ރައްޔިތުންގެ ރައްކާތެރިކަން ކަށަވަރު ކޮށްދިނުމަށް ވޮންގ އެދިވަޑައިގެންނެވި ކަމުގައި ވެސް ޗައިނާގެ ޚާރިޖީ ވުޒާރާއިން ނެރުނު ބަޔާނެއްގައި ބުންޏެވެ.
ޔަހޫދީންނާއި އެމެރިކާގެ ހަނގުރާމައަށް ރަޝިޔާގެ ޚާރިޖީ ވަޒީރު ސިރްގިޔޭ ލެވްރޮފް ވެސް ވަނީ ފާޑުވިދާޅުވެ، ހޫނު ބަހުގެ ޙަމަލާތަކެއް އަމާޒު ކުރައްވާފައެވެ. އީރާނުން ނިއުކްލިޔަރ ހަތިޔާރެއް އުފެއްދުމަށް މަސައްކަތް ކުރަމުންދާ ކަމުގައި ޔަހޫދީންނާއި އެމެރިކާއިން ކުރަމުންދާ ތުހުމަތަށް އިޝާރާތް ކުރައްވައި ލެވްރޮފް ވިދާޅުވީ، އީރާނުން ނިއުކްލިޔަރ ބޮމެއް އުފައްދަން މަސައްކަތް ކުރަމުންދާ ކަމުގެ އެއްވެސް ހެއްކެއް ރަޝިޔާއަށް ފެންނަން ނެތް ކަމުގައެވެ. ނަމަވެސް، އީރާނާ ދެކޮޅަށް ހަނގުރާމަ ފެށުމާ ގުޅިގެން، އެ ޤައުމުން އަމިއްލަ ދިފާޢުގައި ނިއުކްލިޔަރ ހަތިޔާރު ހޯދުމަށް ހިތްވަރު ލިބި، މަޖުބޫރުވެގެންދާނެ ކަމުގައި ވެސް އޭނާ ވިދާޅުވިއެވެ.
"ސަބަބަކީ، ނިއުކްލިޔަރ ބޮން ގެންގުޅޭ އެއްވެސް ޤައުމަކަށް އެމެރިކާއިން [މީގެ ކުރިން] ޙަމަލާ ދީފައި ނެތުން. އެމެރިކާއިން ޖެހިލުންވާ ކަންތައް ކުރުމަށް ބޭނުންވާ ބާރުތަކެއް އީރާނުގައި އުފެދިގެން ދާނެ، އެއީ ނިއުކްލިޔަރ ބޮމެއް އުފެއްދުން،" ނޫސްވެރިންނާ ވާހަކަފުޅު ދައްކަވަމުން ލެވްރޮފް ވިދާޅުވިއެވެ. އަދި، މި ހަނގުރާމައިގެ ސަބަބުން ޢަރަބި އެހެން ޤައުމުތަކުން ވެސް ނިއުކްލިޔަރ ހަތިޔާރު ހޯދަން މަސައްކަތްކޮށް، މުޅި ސަރަޙައްދު "ރޭޑިއޮލޮޖިކަލް" ނުވަތަ ނިއުކްލިޔަރ ބިރުވެރިކަމަކަށް ހުށަހެޅިދާނެ ކަމުގައި ރަޝިޔާއިން ބުންޏެވެ.
އީރާނާ އެކު މަޝްވަރާ ކުރަމުންދާ ކަމަށް ދައްކައިގެން އެމެރިކާއާއި ޔަހޫދީން ބޮޑު "އޮޅުވައިލުމެއް" އޮޅުވައިލާފައިވާ ކަމުގައި ވެސް ރަޝިޔާގެ ޚާރިޖީ ވުޒާރާއިން ބުންޏެވެ. އަދި، ޓްރަމްޕާއި ނަތަންޔާހޫގެ ޙަޤީޤީ މަޤުޞަދަކީ އީރާނުގެ ވެރިކަން ބަދަލު ކުރުން ކަމަށާއި، މިއީ އެކުވެރި ދައުލަތްތައް (އދ)ގެ މެންބަރު ޤައުމެއްގެ އިސްތިޤުލާލަށް އަރައިގަތުމަށް ހިންގާފައިވާ ޣައިރުޤާނޫނީ "ޢުދުވާނީ އަމަލެއް"ގެ ގޮތުގައި ވެސް ރަޝިޔާއިން ސިފަކުރިއެެވެ.