އީރާނާ ދެކޮޅަށް ޔަހޫދީންނާއި އެމެރިކާ ގުޅިގެން ފަށާފައިވާ ހަނގުރާމައިގައި އީރާންގެ ސަގާފީ ތަރިއަކާއި، ޙިމާޔަތް ކޮށްފައިވާ އިމާރާތްތަކާއި ތަންތަނަށް ގެއްލުން ދެމުންދާތީ އެކުވެރި ދައުލަތްތައް (އދ)ގެ ތަޢުލީމާއި، ސައިންސާއި ސަގާފީ ތަރިކައާ ބެހޭ އިދާރާ (ޔުނެސްކޯ)އިން އެ ކަމާމެދު ކަންބޮޑުވުން ފާޅުކޮށްފިއެވެ. ޔުނެސްކޯން ނެރުނު ބަޔާނެއްގައި ބުނީ، ހަނގުރާމައިގެ ދަށުން ދެމުންދާ ވަރުގަދަ ޙަމަލާތަކުގައި އީރާންގެ ސަގާފީ ތަރިއަކާއި، ޙިމާޔަތް ކޮށްފައިވާ އިމާރާތްތަކާއި ތަންތަނަށް މިހާރު ވެސް ބޮޑެތި ގެއްލުންތަކެއް ލިބިފައިވާ ކަމުގައެވެ.
ފެބުރުވަރީ 28ވަނަ ދުވަހު ޔަހޫދީންނާއި އެމެރިކާއިން އީރާނާ ދެކޮޅަށް ފެށި ޣައިރުޤާނޫނީ ހަނގުރާމައިގައި ޝަހީދު ކޮށްލާފައިވާ މީހުންގެ އަދަދު ވަނީ 555 އަށް އުފުލިފައެވެ. އޭގެ ތެރޭގައި، އެ ޤައުމުގެ ރޫހީ އެންމެ މަތީ ވެރިޔާ، އާޔަތުالله ޢަލީ އަލް-ޚާމަނާޢީއާއި އޭނާގެ ޢާއިލާގެ މެންބަރުންގެ އުތުރުން އީރާންގެ އަސްކަރިއްޔާގެ އިސްވާރުންގެ ތެރެއިން ބަޔަކު ހިމެނެއެވެ. އަދި، ގިނަ އަދަދެއްގެ ޢާންމުންނާއި ކުޑަކުދިން ހިމެނެއެވެ.
ޔަހޫދީންނާއި އެމެރިކާގެ ޙަމަލާތަކުގައި އީރާންގެ ވެރިރަށް ތަހްރާންގައި ހުންނަ ކޫލިސްތާން ގަނޑުވަރަށް ބޮޑެތި ގެއްލުންތަކެއް ދީފައިވާ ކަން ޔުނެސްކޯގެ ބަޔާނުގައި ފާހަގަކޮށްފައިވެއެވެ. އެ އިދާރާއިން ދަނީ މި ހާދިސާ ވަރަށް ގާތުން ބަލަމުންނެވެ. އެއީ، ބައިނަލްއަޤުވުމީ މުޢާހަދާތަކުގެ ދަށުން ޙިމާޔަތް ކޮށްފައިވާ އިމާރާތެކެވެ. އަދި، ބައިނަލްއަޤުވާމީ ޤާނޫނުތަކުގެ ދަށުން، ޚާއްޞަކޮށް 1954 ވަނަ އަހަރުގެ ހޭގް މުޢާހަދާއި، އެ މުޢާހަދާގެ އެންހާންސްޑް ޕްރޮޓެކްޝަން މެކޭނިޒަމް އަދި 1972 ވަނަ އަހަރުގެ މުޢާހަދާގެ ދަށުން ސަގާފީ ތަންތަން ރައްކާތެރިކޮށް، ޙިމާޔަތް ކޮށްފައިވާ ކަން ވެސް ޔުނެސްކޯގެ ބަޔާނުގައި ފާހަގަކޮށްފައިވެއެވެ.
އެމެރިކާއިން އިސްވެ އީރާނަށް ޙަމަލާ ދޭން ފަށާފައި ވަނީ ބައިނަލްއަޤުވާމީ ޤާނޫނުތަކުގެ އިތުރުން އެމެރިކާގެ ދާޚިލީ ޤާނޫނުތަކާ ވެސް ޚިލާފަށެވެ. އަދި، ޤާނޫނުހަދާ މަޖިލިސް، ކޮންގްރެސްގެ ރުހުމާ ނުލައެވެ. މިއީ، އެމެރިކާގެ ރައީސް ޑޮނަލްޑް ޓްރަމްޕް، އޭނާ ކޮންޓުރޯލު ކުރާ ޔަހޫދީ ވެރިން ރުއްސުމަށް ޓަކައި ފަށްޓަވާފައިވާ ހަނގުރާމައެކެވެ. މި ކަން ހާމަވެގެންދާ އެއް ސަބަަބަކީ، މި ހަނގުރާމައިން އެމެރިކާއަށް ލިބޭނެ އެއްވެސް ފައިދާއެއް ނެތް ކަމުގައި މަސްރަޙް ދިރާސާ ކުރާ ފަރާތްތަކުން ޤަބޫލު ކުރުމެވެ. މި ކަމުގެ ފައިދާ އޮތީ ހަމައެކަނި ޔަހޫދީންނަށެވެ.
އީރާނުން ވެސް ދަނީ އެ ޤައުމުގެ މިނިވަންކަމުގެ ދިފާޢުގައި ހަނގުރާމަ ކުރަމުންނެވެ. އަދި، ޔަހޫދީންގެ ރަށްތަކާއި، މެދުއިރުމަތީގެ ޤައުމުތަކުގައި ޤާއިމު ކޮށްފައިވާ އެމެރިކާގެ އަސްކަރީ މަރުކަޒުތަކަށް ޙަމަލާ ދެމުންނެވެ. މީގެ އިތުރުން، ޔަހޫދީންގެ މަދަދުގާރުންގެ ގޮތުގައި ތިބި ވިލާތުގެ ބައެއް ޤައުމުތަކުގެ އަސްކަރީ މަރުކަޒުތަކަށް ވެސް އީރާންގެ ޙަމަލާތައް އަމާޒުކޮށްފައިވެއެވެ. ޙަމަލާތަކުގައި އީރާނުން ދަނީ ބާރުގަދަ ބެލިސްޓިކް އަދި ކްރޫޒް މިސައިލްތަކުގެ އިތުރުން އަސްކަރީ ޑްރޯން ބޭނުން ކުރަމުންނެވެ.
އީރާނުގެ އެންމެ ގިނަ ޙަމަލާތައް އަމާޒު ކޮށްފައި ވަނީ ޔަހޫދީންގެ ވެރިރަށް ތެލް އަވީވާއި އީލާތުގެ އިތުރުން ޔަހޫދީން ފޭރިގަނެފައިވާ ހުޅަނގު ޤުދުސަށެވެ. އީރާނުގެ ޙަމަލާތައް ދިފާޢު ކޮށްފައިވާނެ ކަމުގައި ޔަހޫދީން ބުނި ނަމަވެސް، މީސްމީޑިޔާގެ މަންސަތަކާއި، ނޫސް އިދާރާތަކުން ހާމަކޮށްފައިވާ މަޢުލޫމާތާއި މަންޒަރުތަކުން އެއީ ދޮގެއް ކަން ހާމަވެއެވެ. އީރާންގެ ޙަމަލާތަކުގައި ޔަހޫދީންގެ ރަށްތަކަށް ދަނީ ބޮޑެތި ގެއްލުންތަކެއް ދީފައެވެ. އަދި، މަދުވެގެން 10 މީހުން ވަނީ މަރައިލާފައެވެ. އީރާންގެ ޙަމަލާތަކުގައި އެމެރިކާގެ އަސްކަރިއްޔާގެ ތިން ސިފައިން މަރައިލައި، އިތުރު ފަސް މީހުން ވެސް ޒަޚަމު ކޮށްލާފައި ވެއެވެ.