ސްޕެނިޝް ލަލީގާ ގައި ރޭ ގެޓާފޭ އާއި ދެކޮޅަށް ރެއާލް މެޑްރިޑް ކުޅުނު މެޗުން 1-0 ގެ ނަތީޖާއަކުން ރެއާލް މެޑްރިޑް ބަލިވެއްޖެ އެވެ.
މި ނަތީޖާ އާއިއެކު ތާވަލުގެ އެއްވަނައިގައި އޮތް ބާސެލޯނާ އާއި ދެމެދު އޮތް ފަރަގު އެއް ޕޮއިންޓަށް ކުޑަކުރުމަށް ރެއާލް މެޑްރިޑަށް ލިބުނު ފުރުސަތު ވަނީ ގެއްލިފަ އެވެ. ލީގުގައި މިހާތަނަށް ކުޅުނު 26 މެޗުން ރެއާލް މެޑްރިޑަށް 60 ޕޮއިންޓް ލިބިފައިވާއިރު އެއްވަނައިގައި އޮތް ވާދަވެރި ބާސެލޯނާ އަށް ލިބިފައިވަނީ 64 ޕޮއިންޓެވެ.
މެޑްރިޑްގެ ސެންޓިއާގޯ ބަރނަބިއު ސްޓޭޑިއަމްގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑަކީ މެޗުގެ 39 ވަނަ މިނިޓުގައި ގެޓާފޭގެ މާޓިން ސެޓްރިއާނޯ ކާމިޔާބުކޮށްދިން ލަނޑެވެ.
އަނިޔާގެ ސަބަބުން ރެއާލް މެޑްރިޑްގެ ފޯވަޑް ކިލިއަން އެމްޕާބޭ ނުލާ ރެއާލް މެޑްރިޑް މި މެޗަށް ނިކުތްއިރު މުޅި މެޗުގައިވެސް ގެޓާފޭގެ ޑިފެންސް ލައިން ފެނިގެން ގޮސްފައިވަނީ ވަރަށް އޮގަނައިޒްކޮށް ކުޅެފައިވާ ތަނެވެ.
ގެޓާފޭ އިން ލަނޑު ޖެހުމުގެ ކުރިން ރެއާލް މެޑްރިޑްގެ ފޯވަޑް ވިނިޝިއަސް ޖޫނިއަރ އަށް ލަނޑެއް ޖެހުމަށް ރަނުގެ ފުރުސަތެއް ލިބުނު ނަމަވެސް އޭނާ ފޮނުވާލި ނުރައްކާތެރި ހަމަލާ ގެޓާފޭގެ ގޯލުކީޕަރު ޑޭވިޑް ސޯރިޔާ ވަނީ މަތަކޮށްފަ އެވެ.
މި މެޗުގެ ފުރިހަމަ ވަގުތުގެ ކުޅުން ނިމި އިންޖަރީ ވަގުތުގެ ކުޅުމުގައި ރެއާލް މެޑްރިޑްގެ ފްރެންކޯ މަސްޓަންޓުއޯނޯ އަށް ރަތް ކާޑު ދައްކާފައިވާއިރު ދެވަނަ ރީނދޫ ކާޑަކާއިއެކު ގެޓާފޭގެ އެޑްރިއަން ލިސޯ އަށްވެސް ވަނީ ރަތް ކާޑު ދައްކާފަ އެވެ.
ލަލީގާގައި ރޭ ގެޓާފޭ އަތުން ރެއާލް މެޑްރިޑް ބަލިވެފައިވާއިރު މިއީ ލީގުގައި ރެއާލް މެޑްރިޑް ޖެހިޖެހިގެން ބަލިވި ދެވަނަ މެޗެވެ.
ރެއާލް މެޑްރިޑް އިން އަންނަ ހުކުރު ދުވަހު ލީގުގައި ނިކުންނާނީ ސެލްޓަވީގޯ އާއި ދެކޮޅަށެވެ.