ފެބްރުއަރީ މަހުގެ 28ވަނަ ދުވަހުން ފެށިގެން ޔަހޫދީންނާއި އެމެރިކާއިން ގުޅިގެން އީރާނަށް ދެމުންދާ ހަމަލާތަކުގައި މިހާތަނަށް އީރާނުގެ 555 މީހުން ޝަހީދުވެފައިވާ ކަމަށް އެ ޤައުމުގެ ރެޑް ކްރެސެންޓް ސޮސައިޓީއިން ބުނެފިއެވެ.
އެމެރިކާއާއި ޔަހޫދީން ދަނީ އީރާނުގެ ވެރިރަށް ތެހްރާން ހިމެނޭ ގޮތަށް އެ ޤައުމުގެ އެކި ސަރަޙައްދުތަކަށް ޙަމަލާތައް އަމާޒުކުރަމުންނެވެ. އޭގެ ރައްދުގައި އީރާނުން ވެސް ދަނީ ޔަހޫދީ ދައުލަތަށާއި މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށާއި މުދަލަށް އަމާޒުކޮށް ވަރުގަދަ ޙަމަލާތައް ދެމުންނެވެ.
ޔަހޫދީންނާއި އެމެރިކާގެ ޙަމަލާތަކުގެ ސަބަބުން ފާއިތުވި 24 ގަޑިއިރުގެ ތެރޭގައި އީރާނުގެ ފާސް ޕްރޮވިންސުގައި 35 މީހުން ޝަހީދުވެފައިވެއެވެ. އޭގެ އިތުރުން ތެހްރާނުގެ ނިލޫފާ މައިދާނަށް ދީފައިވާ ޙަމަލާއެއްގައި ވެސް 20 މީހުން ޝަހީދުވެފައިވެއެވެ. އޭގެ އިތުރުން ސަނަންދަޖު ސިޓީގެ ފުލުހުންގެ އިދާރާއެއް ހުރި ސަރަޙައްދަށް ދިން ޙަމަލާއެއްގައި އެ ސަރަޙައްދުގައި ހުރި މީހުން ދިރިއުޅޭ އިމާރާތްތައް ސުންނާފަތިވެ، ދެ މީހުން ޝަހީދުވެފައިވެއެވެ. އެ ސިޓީގެ އެކި ސަރަޙައްދުތަކަށް ހަ މިސައިލް ޙަމަލާ ދީފައިވެއެވެ.
އޭގެ އިތުރުން އީރާނުގެ މައި ނިއުކްލިޔަރ މަރުކަޒެއް ކަމަށްވާ ނަޠަންޒް ނިއުކްލިޔަރ މަރުކަޒަށް ވެސް އެމެރިކާއާއި ޔަހޫދީން ޙަމަލާ ދީފައިވާ ކަމަށް ބައިނަލްއަޤްވާމީ އެޓޮމިކް ހަކަތައާބެހޭ އިދާރާ، އައިއޭއީއޭއަށް ކަނޑައަޅާފައި ހުންނަވާ އީރާނުގެ ސަފީރު ރިޒާ ނަޖާފީ ވަނީ ވިދާޅުވެފައެވެ. އީރާނުގެ ނިއުކްލިޔަރ މަޝްރޫޢުއަކީ ސުލްޙަވެރި މަޝްރޫޢުއެއް ކަމަށް ތަކުރާރުކުރައްވައި އޭނާ ވިދާޅުވީ އީރާނުން ނިއުކްލިޔަރ ހަތިޔާރު ތަރައްޤީ ކުރުމަށް ބޭނުންވާ ކަމަށް އެމެރިކާއާއި ޔަހޫދީން ބުނާ ބުނުމަކީ ކަނޑައެޅިގެން ދޮގެއް ކަމަށެވެ.
އީރާނުން ބުނީ ފެބްރުއަރީ މަހުގެ 28ވަނަ ދުވަހު އީރަނުގެ މީނާބްގެ މަދަރުސާއަކަށް ދިން ޙަމަލާއެއްގައި ޝަހީދުވި މީހުންގެ ޢަދަދު 180އަކަށް އަރާފައިވާ ކަމަށެވެ. އެ ޙަމަލާ ދިނުމަށް ބޭނުންކުރި މަރުކާގެ މިސައިލްއެއް ބޭނުންކޮށް އީރާނުގެ ގާންދީ ހަސްފަތާލަށް ވެސް މާރިޗު މަހުގެ 1ވަނަ ދުވަހު ޙަމަލާ ދީފައިވާ ކަމަށް އީރަނުގެ ސަރުކާރުން ބުނެފައިވެއެވެ.
ޔަހޫދީންނާއި އެމެރިކާގެ ޙަމަލާތަކުގެ ރައްދުގައި އީރާނުން ވެސް ދަނީ ވަރުގަދަ ޙަަމަލާތައް ދެމުންނެވެ. ޔަހޫދީ ދައުލަތުން ވަނީ ވަޒަންވެރިން ރައްކާތެރި ސަރަޙައްދުތަކަށް ދިޔުމަށް އަންގައިފައެވެ. އަދި އިތުރު ގޮތެއް އަންގަންދެން އެ ފަދަ ތަންތަނުގައި ދެމި ތިބުމަށް ވަނީ އިރުޝާދު ދީފައެވެ. ޔަހޫދީ ފުލުހުން ބުނީ އީރާނުން ބައިތު މައިމިޝްއަށް ދިން ޙަމަލާއެއްގައި ޔަހޫދީންގެ ނުވަ މީހުން މަރުވެ، 11 މީހުން ވީނުވީއެއް ނޭނގި ގެއްލިފައިވާ ކަމަށެވެ. އަދި ގިނަ ޢަދަދެއްގެ މީހުންނަށް އެ ޙަމަލާގައި ޒަޚަމްވެފައިވެއެވެ. ބައެއް މަސްދަރުތަކުން ވަނީ 40އަށް ވުރެ ގިނަ ޔަހޫދީން މިހާތަނަށް މަރުވެފައިވާ ކަމަށް ބުނެފައެވެ.
އީރާނުން ދަނީ ޤަޠަރާއި ބަޙްރައިންާއި އުރުދުންއާއި ޢުމާންއާއި ކުވައިތުއާއި ސަޢުދީ ޢަރަބިއްޔާއާއި އެކުވެރި ޢަރަބި އިމާރާތަށް ގިނަ ޙަމަލާތަކެއް އަމާޒުކުރަމުންނެވެ. އެ ހުރިހާ ޤައުމަކީ ވެސް އެ ޤައުމުތަކުގައި އެމެރިކާގެ އަސްކަރީ މަރުކަޒުތަކާއި އަސްކަރިއްޔާއާ ގުޅުން ހުރި އެހެން ތަންތަނާއި ހަރުމުދާ ހުންނަ ޤައުމުތަކެކެވެ. އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ވިދާޅުވީ އީރާނުން ޙަމަލާ ދެނީ ސީދާ އެ ޤައުމުތަކަށް ނޫން ކަމަށާއި، އޭގެ ބަދަލުގައި ޙަމަލާތައް އަމާޒުކުރަނީ އެ ޤައުމުތަކާއި ގަލްފު ސަރަޙައްދުގައި ހުރި އެމެރިކާގެ މަޤާމުތަކާއި މުދަލަށް ކަމަށެވެ.
އީރަނުގެ ޙަމަލާތަކުގައި އެމެރިކާގެ ތިން ސިފައިން ވެސް މަރުވެފައިވެއެވެ. އަދި ވެސް އިތުރު މީހުން މަރުވުމުގެ ފުރުޞަަތު އޮތް ކަމަށް އެމެރިކާގެ ރައީސް ޑޮަނަލްޑް ޓްރަމްޕް ވެސް ވަނީ ވިދާޅުވެފައެވެ. އޭގެ އިތުރުން އީރާނުގެ ޑްރޯން ޙަމަލާއެއް ވަނީ ކުވައިތުގައި ހުންނަ އެމެރިކާގެ އެމްބަސީގެ ގޯތިތެރެއަށް ކާމިޔާބުކަމާއެކު ދީފައެވެ. އަދި އެމެރިކާގެ ތިން ފައިޓާ ޖެޓު ވެސް ކުވައިތުގެ ވައިގެ ސަރަޙައްދުން ވެއްޓިފައިވެއެވެ. އީރާނުން ބުނީ އީރާނުގެ ވައިގެ ސަރަޙައްދުގެ ތެރެއަށް ވަނުމަށް މަސައްކަތް ކުރި އެެމެރިކާގެ އެފް-15 މަރުކާގެ ޖެޓެއް ވެސް ވައްޓާލާފައިވާ ކަމަށެވެ.