ފަރެސްމާތޮޑާ ބަނދަރާއި ދޯނި އެހެލާ ސަރަޙައްދު ތަރައްޤީކުރަނީ

ގދ. ފަރެސްމާތޮޑާ ބަނދަރާއި ދޯނި އެހެލާ ސަރަހައްދު ތަރައްޤީކުރުމުގެ މަޝްރޫޢު އެމްޓީސީސީއާ ހަވާލުކޮށްފިއެވެ.

ގދ. ފަރެސްމާތޮޑާގެ ބަނދަރާއި ދޯނި އެހެލާ ސަރަހައްދު ތަރައްޤީކުރުމުގެ ބޮޑު މަޝްރޫޢު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލު ކުރެއްވީ ގެދޮރުވެރިކަމާ ބިނާރާ ބެހޭ ވުޒާރާއިން ދަރުބާރުގޭގައި މިއަދު ބޭއްވި ރަސްމިއްޔާތެއްގައެެވެ.

މި އެއްބަސްވުމުގައި ގެދޮރުވެރިކަމާއި ބިނާރާބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޑރ. ޢަބްދުﷲ މުއްޠަލިބެވެ. އެމްޓީސީސީގެ ފަރާތުން ސޮއިކުރެއްވީ އެކުންފުނީގެ ޑެޕިއުޓީ މެނޭޖިން ޑިރެކްޓަރ މުޙައްމަދު ޖަމްޝީދުއެވެ.

މިމަޝްރޫޢުގެ މަސައްކަތުގެ ތެރޭގައި 465,726 ކިއުބިކް މީޓަރުގެ ސަރަޙައްދެއް ފުންކުރުމާއި، 300 މީޓަރުގެ އެއްގަމުތޮށި ލުމާއި، 1,462 މީޓަރުގެ ބޭރުތޮށިލުމުގެ މަސައްކަތް ހިމެނެއެވެ.

މީގެ އިތުރުން، 733 މީޓަރުގެ ރިވެޓްމެންޓް ޖެހުމާއި، 133 މީޓަރުގެ ޖިއޯޓިއުބް ރިވެޓްމަންޓް ޖެހުމުގެ އިތުރުން 329 މީޓަރުގެ ސަރަހައްދެއްގައި ގްރޮއިން ޖެހުމަށް ވަނީ ހަމަޖެހިފައެވެ. އަދި 9,206 އަކަ މީޓަރުގެ ޕޭވްމަންޓް ހެދުމާއި، 6 މީޓަރު ދިގު 36 މީޓަރު ފުޅާ ކޮންކްރީޓް ބްރިޖެއް އެޅުމުގެ މަސައްކަތްވެސް މި މަޝްރޫޢުގެ މަސައްކަތުގެ ތެރޭގައި ހިމެނެއެވެ.

މިމަޝްރޫޢުގެ މަސައްކަތް އެމްޓީސީސީއާ ހަވާލުކޮށްފައިވަނީ 209.43 މިލިއަން ރުފިޔާއަށް 780 ދުވަހުގެ ތެރޭގައި ނިންމާ ގޮތަށެވެ.

ފަރެސްމާތޮޑާއަކީ މަސްވެރިކަމަށް ނަން މަޝްހޫރު އަދި އެއާޕޯޓެއްވެސް އޮންނަ ރަށަކަށް ވުމުން، އެ ރަށުގެ ބަނދަރަށް އޮންނަ ބާރު ބޮޑުވެ، ޖާގައިގެ ދަތިކަން ރައްޔިތުން ދަނީ ވަރަށް ބޮޑަށް ތަހައްމަލު ކުރަމުންނެވެ. މި މަޝްރޫޢު ނިމުމުން އުޅަނދުފަހަރު އެޅުމަށާއި، މުދާ ބަރުކުރުމުގެ އިތުރުން ލަފާފުރުމުގައި ރައްޔިތުންނަށް ބޮޑެތި ލުއިފަސޭހަތަކެއް ލިބިގެންދާނެއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޑރ.ޢަބްދުﷲ މުއްޠަލިބު ވިދާޅުވީ ފަރެސްމާތޮޑާއަކީ މަސްވެރިކަމުގައި ފާހަގަކުރެވޭ ރަށެއް ކަމަށާއި، މަސްވެރިންނަށް މިސަރުކާރުން ޚާއްޞަ އިސްކަމެއް ދެއްވާ ކަމަށެވެ.

" ފަރެސްމާތޮޑާއަކީ ރާއްޖޭގައި އެންމެ ގިނަ މަސްވެރި ދޯނިފަހަރު އޮތް އެއް ރަށް، އެހެންކަމުން މި މަޝްރޫޢުގެ ދަށުން މަސްވެރިންނަށް ބޭނުންވާ ޚާއްޞަ ވަސީލަތްތައް ޤާއިމުވެގެންދާނެ. އެގޮތުން ދޯނިއެހެލާ ސަރަޙައްދެއް ޤާއިމުކުރުމަށް މިވަނީ ނިންމާފައި. އަދި ބަނދަރުވެސް ބޮޑުކުރެވިގެން ދާނެ". ވަޒީރު ޑރ.މުއްތަލިބު ވިދާޅުވިއެވެ.

މި ރަސްމިއްޔާތުގައި ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު ދެއްކެވި ވާހަކައިގައި މި މަޝްރޫޢު އަވަސްކޮށްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ގެންގުޅުއްވާ ދުރުވިސްނުންފުޅަށް ޝުކުރު އަދާކުރެއްވިއެވެ. އަދި ވަޒީރު މުއްޠަލިބާއި، އެމްޓީސީސީން މި މަސައްކަތް ކުރިއަށް ގެންދިއުމަށް ކުރާ މަސައްކަތްތައްވެސް މެންބަރު ފާހަގަކުރެއްވިއެވެ.

"މިއީ ފަރެސްމާތޮޑާގެ މަސްވެރިންނަށް ލިބޭނެ ވަރަށް ބޮޑު ކުރިއެރުމެއް. މި މަޝްރޫއުގެ ސަބަބުން ރަށުގެ އިޤްތިޞާދީ އަދި އިޖުތިމާޢީ ހާލަތަށް ހެޔޮ ބަދަލުތަކެއް އަންނާނެ "ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު ވިދާޅުވިއެވެ.

ފަރެސްމާތޮޑާއަކީ، މިސަރުކާރުން ޚާއްޞަ އިސްކަމެއްދީގެން ތަރައްޤީގެ ގިނަ މަޝްރޫޢުތަކެއް ކުރިޔަށް ގެންދާ އެއްރަށެވެ. މިދިޔަ އަހަރުގެ ޑިސެންބަރު މަހުގެ ތެރޭގައި އެރަށުގައިވަނީ 18 ހެކްޓަރުގެ ބިން ހިއްކާފައެވެ. އަދި ހިއްކި ސަރަޙައްދު ހިމާޔަތްކުރުމުގެ ގޮތުން 620 މީޓަރުގެ ބޮޑުހިލައިގެ ރިވެޓްމަންޓް ޖެހުމުގެ މަސައްކަތް ވަނީ އެމްޓީސީސީއާ ޙަވާލުކޮށްފައެވެ.