ޔަހޫދީންނާއި އެމެރިކާއިން އީރާނަށް ދެމުންދާ ޙަމަލާތަކުގެ ރައްދުގައި އީރާނުން ދީފައިވާ ޙަމަލާތަކުގައި އެމެރިކާގެ ތިން ސިފައިން މަރުވެ، އިތުރު ފަސް ސިފައިންނަށް ބޮޑެތި ޒަޚަމްތައް ވެފައިވާ ކަމަށް އެމެރިކާއިން ބުނެފިއެވެ.
ޔަހޫދީންނާއި އެމެރިކާއިން އީރާނަށް ދެމުންދާ ޙަމަލާތަކުގައި އެ ޤައުމުގެ ރޫޙީ ވެރިޔާ އާޔަތުالله ޚާމަނާއީއާއި ސަރުކާރުގެ ގިނަ ޢަދަދެއްގެ އިސް އޮފިޝަލުން ވަނީ ޝަހީދުވެފައެވެ. އެ މަރުތަކުގެ ބަދަލު ހިފާނެ ކަމަށް ބުނެ އީރާނުން ދަނީ އެމެރިކާއަށާއި ޔަހޫދީންނަށް ވަރުގަދަ އިންޒާރުތައް ދީ، ދެ ބައި މީހުންނަށް ނުރައްކާތެރި ޙަމަލާތައް އަމާޒުކުރަމުންނެވެ.
ޔަހޫދީ ދައުލަތުގެ ބައިތު ޝައިމިޝްއަށް އަމާޒުކޮށް އީރާނުން ދީފައިވާ ޙަމަލާއެއްގައި ނުވަ މީހުން މަރުވެ، 51 މީހުންނަށް ޒަޚަމްވެފައިވެއެވެ. އެ ޙަމަލާއަށް ފަހު 11 މީހުން ވީނުވީއެއް ނޭނގު ގެއްލިފައިވާ ކަމަށް ވެސް ޔަހޫދީން ބުނެއެވެ. މިއީ ޔަހޫދީންނަށް އީރާނުން ދެމުންދާ ޙަމަލާތަކުގެ ތެރެއިން މިހާތަނަށް ދީފައިވާ އެންމެ ގެއްލުން ބޮޑު އެއް ޙަމަލާއެވެ.
ބައިތު ޝައިމިޝްއަށް ދީފައިވާ ޙަމަލާގެ އިތުރުން ތެލް އަވީވްގެ އުތުރުގައި އޮންނަ ޔާކޮން ސަރަޙައްދަށް އީރާނުގެ މިސައިލް ސީދާ އަރާފައިވެއެވެ. މި ޙަމަލާތަކީ އާދަޔާ ޚިލާފަށް ވަރުގަދަ ޙަމަލާއެއްގެ ގޮތުގައި ޔަހޫދީ މީޑިޔާއިން ވަނީ ސިފަކޮށްފައެވެ.
މެދުއިރުމަތީގެ ޤައުމުތަކުގައި ޤާއިމުކޮށްފައިވާ އެމެރިކާގެ 27 އަސްކަރީ މަރުކަޒަކަށާއި ޔަހޫދީ އިސްރާއީލުގެ ތެލް އަވީވްގައިވާ އަސްކަރީ މަރުކަޒުތަކަށް ވެސް އައިއާރުޖީސީން ވަނީ ޙަމަލާދީފައެވެ. އީރާނުގެ އިންޤިލާބީ ފައުޖުން ވަނީ އެމެރިކާއާއި އިނގިރޭސިވިލާތުގެ ތެޔޮ ޓޭންކަރު ތަކަށް ވެސް އެ ޤައުމުން ޙަމަލާ ދީފައިވާ ކަމަށް ބުނެފައެވެ. އީރާނުގެ އިންޤިލާބީ ފައުޖުން ނެރުނު ބަޔާނެއްގައި ގަލްފުގެ ސަރަޙައްދުންނާއި ހުރުމުޒް ކަނޑުއޮޅިން އެމެރިކާާއާއި އިނގިރޭސިވިލާތަށް ނިސްބަތްވާ ތިން ތެޔޮ ޓޭންކަރަށް މިސައިލް ޙަމަލާ ދީފައިވާ ކަމަށް ވަނީ ބުނެފައެވެ.
އީރާނުގެ އަސްކަރިއްޔާއިން ބުނީ އެ ޤައުމުގެ ސަރަޙައްދުގެ ތެރެއަށް ވަދެފައިވާ 10 ޑްރޯން ވެސް އަސްކަރިއްޔާއިން ވައްޓާލާފައިވާ ކަމަށެވެ. އެއާއެކު މިހާރު ދެމުންދާ ޙަމަލާތަކުގައި އީރާނުން މިހާތަނަށް ވައްޓާލާފައިވާ ޑްރޯންގެ ޖުލްމަ ޢަދަދު މި ވަނީ 22އަށް އިތުރުވެފައެވެ. އީރާނުން ބުނަނީ ގިނަ ޑްރޯންތަކަކީ އެމެރިކާއާއި ޔަހޫދީ އަސްކަރިއްޔާގެ އަރމްސް މަރުކާގެ ޑްރޯން ކަމަަށެވެ.
އީރާނުގެ އިންޤިލާބީ ފައުޖުން ވަނީ އެ ފައުޖުން އެމެރިކާގެ އަސްކަރީ މަތިންދާބޯޑު އުފުލާ ހަނގުރާމަމަތީ މަނަވަރު، ޔޫއެސްއެސް އަބްރަހަމް ލިންކަންއަށް ވެސް ޙަމަލާ ދީފައިވާ ކަމަށް ބުނެފައެވެ. އެ ގޮތުން އެ އުޅަނދަށް ހަތަރު ބެލިސްޓިކް މިސައިލް އަރާފައިވާ ކަމަށް އަސްކަރިއްޔާއިން ނެރެފައިވާ ބަޔާނެއްގައި ބުނެފައިވެއެވެ. އެއްގަމުމަގާއި ކަނޑުމަގުން ދަތުުރުކުރާ “ނިރުބަރިން”ނަށް އެ ސަރަޙައްދުތަކަކީ ގަބުރުސްތާނަކަށް ވާނެ ކަމަށް އީރާނުން ވަނީ އިންޒާރު ދީފައެވެ. ނަމަވެސް އެމެރިކާއިން ބުނަމުން ދަނީ ޔޫއެސްއެސް ލިންކަންއާ ހަމައަށް މިސައިލްތައް ނުފޯރާ ކަމަށާއި، އެއްވެސް ގެއްލުމެއް ލިބިފައި ނުވާ ކަމަށެވެ.