އެކަކު އަނެކަކާ ބައްދަލުވެ ގުޅުން ބަދަހިކުރުމަށް ނާދީގެ ދައުރު ބޮޑު!

އިސްރަށްވެހިންގެ ނާދީއަކީ، އުމުރުން ދުވަސްވީ މީހުންގެ ބައިވެރިވުން މުޖުތަމަޢު ތެރޭގައި އިތުރުކޮށް، އެފަރާތްތަކަށްވެސް އެކިއެކި ހަރަކާތްތަކުގައި ބައިވެރިވުމުގެ ފުރުޞަތު ފަހިކޮށްދިނުމުގެ ގޮތުން ސަރުކާރުން ޤާއިމުކޮށްފައިވާ ތަންތަނެވެ.

މާލޭގައި ޤާއިމްކޮށްފައިވާ އިސްރަށްވެހިންގެ ނާދީގައި، އިސްރަށްވެހިންނަށް ޚާއްސަ ކޮށްގެން ގިނަ ހަރަކާތްތަކެއް ކުރިއަށް ގެންދާކަން ފާހަގަކޮށްލެވެއެވެ. އެގޮތުން އިސްރަށްވެހިންގެ ކާބޯތަކެތީގެ މައުރަޒުގެ އިތުރުން އިސްރަށްވެހިންނަށް ޚާއްސަކޮށް ކޮންމެ ދުވަހަކު ކުރިއަށްގެންދާ ހަރަކާތްތައް ފާހަގަކޮށްލެވެއެވެ.

އަހަރުގެ އެހެން މަސްތަކާ ޚިލާފަށް ރަމަޟާންމަހު އިސްރަށްވެހިންގެ ނާދީގައި ކުރިއަށްގެންދާ ހަރަކާތްތަކަށް ވަނީ ބަދަލު ގެނެސްފައެވެ. ނާދީގައި ވަނީ، އިޖުތިމާޢީ ގުޅުން ވަރުގަދަ ކުރުމުގެ މަޤްސަދުގައި ޚާއްޞަ ހަރަކާތްތަކަކާއެކު އިސްރަށްވެހިންނަށް ރޯދަ ވީއްލުމެއް ބާއްވާފައެވެ. މި ހަރަކާތުގައި އިސްރަށްވެހިންގެ ގިނަ ބަޔަކު ބައިވެރިވިކަން ފާހަގަކޮށްލެވެއެވެ.

އިސްރަށްވެހިންނަށް ޚާއްޞަ ކޮށްގެން ނާދީގައި ކުރިއަށްގެންދާ ހަރަކާތްތަކާ ގުޅޭގޮތުން ޕީއެސްއެމް ނިއުސްއާ ވާހަކަ ދައްކަވަމުން، ނާދީގެ ހަރަކާތްތަކުގައި ބައިވެރިވާ ފަރާތެއް ކަމަށްވާ ރަޒިއްޔާ މުޙައްމަދު ބުނީ، އިސްރަށްވެހިންގެ ނާދީއަކީ އިސްރަށްވެހިންނާ ގުޅިގެން މަސައްކަތް ކުރާ ވަރަށް އުފާވެރި މާޙައުލެއް ކަމަށެވެ.

" އަޅުގަނޑު އަސްލު ވަރަށް އުފާވޭ ނާދީއާއި ގުޅިގެން ކުރާ ކަންތައްތަކުގައި ބައިވެރިވެވޭތީވެ. ވަރަށް ގިނަ ރައްޓެހިންވެސް ލިބޭ. ހިތަށް އަރާ ގޭގައި އަބަދު ތިބުމަށްވުރެ ރަނގަޅޭ. މިހެން އަންނާނެ ފުރުޞަތެއް ކޮންމެސްތަނެއްގައި އޮންނާތީ. އެހެންވެ ވަރަށް އުފާވޭ ނާދީގެ ކަންތައް ކުރިއަށްގެންދާ ގޮތުން". ރަޒިއްޔާ ބުންޏެވެ.

އިސްރަށްވެހިންގެ ނާދީގައި ހިންގާ ހަރަކާތްތަކުގެ ތެރޭގައި އިސްރަށްވެހިންނަށް އެކި ދާއިރާތަކުން ހިންގާ ހޭލުންތެރިކަމުގެ ޕްރޮގްރާމްތަކާއި ދީނީ ހަރަކާތްތަކާއި، އެކިކަހަލަ ކުޅިވަރު ހަރަކާތްތައް ހިމެނެއެވެ. އަދި ޚާއްޞަ ދުވަސްތައް ފާހަގަކުރުމާއެކު، އިސްރަށްވެހިންގެ އެކި ކަހަލަ އެއްވުންތައްވެސް އަންނަނީ ބާއްވަމުންނެވެ.

މިއީ ނަފްސާނީ ގޮތުންނާއި، ޖިސްމާނީގޮތުންވެސް ދުޅަހެޔޮ ބައެއްގެ ގޮތުގައި ތިބުމުގެ ފުރުޞަތު އިސްރަށްވެހިންނަށް ފަހިކޮށްދިނުމަށް ކުރިއަށްގެންދާ ވަރަށް މުހިންމު މަސައްކަތެކެވެ.

ރަމަޟާންމަސް ނޫން އެހެން މަސްތަކުގައިވެސް އިޖުތިމާޢީ ވުޒާރާއިން ނާދީގައި ކުރިއަށްގެންދާ ހަރަކާތްތަކުގައި އިސްރަށްވެހިންގެ ގިނަ ބަޔަކު ބައިވެރިވާކަން އެ ވުޒާރާއިން ފާހަގަކުރައްވައެވެ.