އަންނަ މާޗު މަހު ބާއްވާ ބާސެލޯނާގެ އާއްމު އިންތިހާބު ކާމިޔާބު ކުރެވިއްޖެނަމަ އެ ކުލަބުގެ އޮނަރަރީ ރައީސް ކަމަށް ހަމަޖައްސާނީ ބާސެލޯނާގެ ކުރީގެ ކެޕްޓަން އާޖެންޓީނާގެ ލަޔޮނަލް މެސީ ކަމަށް އިންތިހާބުގައި ވާދަކުރާ ވިކްޓަރ ފޮންޓް ވިދާޅުވެއްޖެ އެވެ.
އޭނާގެ ޒައާމަތުގައި ބާސެލޯނާގައި މެސީ އަށް އޮންނާނެ ދައުރު އޮޅުން ފިލުވައި ދިނުމަށް ބޭއްވި ހާއްސަ ރަސްމިއްޔާތުގައި ވާހަކަ ދައްކަމުން ފޮންޓް ވިދާޅުވީ މިހާރުގެ ރައީސް ލަޕޯޓާ އިންތިހާބު ކާމިޔާބު ކުރެއްވައިފިނަމަ މެސީ އަލުން އެ ކުލަބަށް ނާންނާނެ ކަމަށެވެ. މި ފަހަރުގެ އިންތިހާބު ކާމިޔާބު ކުރެއްވުމަށް ފޮންޓް އެންމެ ބޮޑަށް ބޭނުން ކުރައްވަމުން ގެންދަވާ ހަތިޔާރަކީ ވެސް މެސީގެ ނަމެވެ.
މެސީ އަކީ ބާސެލޯނާގެ އެންމެ އަގުހުރި ލެޖެންޑެވެ. ނަމަވެސް 2021 ވަނަ އަހަރު އޭނާ މަޖުބޫރު ވެގެން ކުލަބު ދޫކޮށްލަން ޖެހުނު ގޮތާމެދު ފޮންޓް ގެންދަވަނީ ފާޑު ވިދާޅުވަމުންނެވެ. އެއީ ޖޯން ލަޕޯޓާގެ ނާގާބިލްކަމުންވީ ކަމެއް ކަމުގައި ވެސް ފޮންޓް ގެންދަވަނީ ވިދާޅުވަމުންނެވެ.
"މެސީ އަލުން ބާސެލޯނާ އަށް އަންނާނެ ހަމައެކަނި ގޮތަކީ ލަޕޯޓާ ރައީސްކަމުގައި ނެތުން. އޭނާއާއެކު މެސީ މަސައްކަތެއް ނުކުރާނެ. އަހަރެންގެ ޕްލޭނުގައި އޮތީ ރައީސްކަން ކާމިޔާބު ވެއްޖެނަމަ މެސީ ރިޓަޔާ ކުރުމަށް ހާއްސަ މެޗެއް ބޭއްވުން. އަދި އޭނާ އަކި ކުލަބުގެ އޮނަރަރީ ރައީސް ކަމުގައި ހަމަޖެއްސުން،" ފޮންޓް ވިދާޅުވި އެވެ.
މިކަން ކުރުމަށް ބާސެލޯނާގެ އަސާސީ ގަވާއިދަށް ބަދަލު ގެނައުމަށް މެމްބަރުންގެ ވޯޓަށް އަހާނެ ކަމަށް ވެސް ފޮންޓް ވިދާޅުވި އެވެ.
2021 ވަނަ އަހަރުގެ އިންތިހާބުގައި ލަޕޯޓާއާ ވާދަކޮށް ބޮޑު ތަފާތަކުން ބަލިވި ފޮންޓް ވިދާޅުވީ އޭނާ އަށް ރައީސްކަން ލިބިވަޑައިގެންފިނަމަ ތިން ގޮތަކުން މެސީގެ ބޭނުން ހިފާނެ ކަމަށެވެ.
"އޭނާ އަކީ މި ކުލަބުގެ އެންމެ އަގުހުރި ކުޅުންތެރިޔާ. އޭނަ އަށް ހައްގު މިންވަރަކީ ޕްރެސް ރޫމުގައި ހުރެ ކުލަބުގެ ސަޕޯޓަރުންނަށް އަލްވަދާއު ކިއުމެއް ނޫން. އޭނަ އަށް ސަޕޯޓަރުންގެ ކުރިމަތީގައި ހުރެ އެކަން ކުރަން ފުރުސަތު ލިބެންޖެހޭ. މެސީ އާއި ބާސެލޯނާގެ ބްރޭންޑް ގުޅުވާލައި އަހަރުމެން ގިނަ މަސައްކަތްތަކެއް ކުރާނަން. ބާސެލޯނާ އާއި މެސީގެ ބްރޭންޑްވާނީ އެންމެ އަގުބޮޑު ބްރޭންޑަށް،" ފޮންޓް ވިދާޅުވި އެވެ.
2021 ވަނަ އަހަރުގެ އިންތިހާބު ލަޕޯޓާ ކާމިޔާބު ކުރީ މެސީ ކުލަބުގައި ހުންނާނެ ކަމުގެ ވައުދާއެކުގަ އެވެ. ނަމަވެސް އޭނާ ކުލަބުން ވަކިވާން ޖެހުނީ ބާސެލޯނާގެ މާލީ ހާލަތު ތަންނުދިނުމުގެ ސަބަބުން ސްޕެނިޝް ލީގުން އޭނާގެ ކޮންޓްރެކްޓް ރަޖިސްޓަރީ ކޮށްނުދިނުމުންނެވެ. މިއާއެކު މެސީ އާއި ލަޕޯޓާގެ ގުޅުން ކުޑަވި ނަމަވެސް މި ގުޅުން ފަހުން ކޮންމެވެސް ވަރަކަށް ރަނގަޅުވި ކަމަށް ލަޕޯޓާ ވިދާޅުވެ އެވެ.