އިތުރު ޤައުމުތަކަށް ނިޕާ ވައިރަސް ފެތުރުމުގެ ފުރުސަތު ކުޑަ

އިންޑިއާއިން ފެނިފައިވާ ނިޕާ ވައިރަސް، އެ ޤައުމުން ބޭރުވެ، އެހެން ޤައުމުތަކަށް ފެތުރުމުގެ ނުރައްކާ ކުޑަކަމަށް، ދުނިޔޭގެ ސިއްޙަތު ޖަމްޢިއްޔާ، ޑަބްލިޔުއެޗްއޯއިން ބުނެފިއެވެ.

އިންޑިއާއިން ނިޕާ ވައިރަސް ޖެހިފައިވާ ދެ މީހުން ފެނުމާ ގުޅިގެން، ސަރަޙައްދީ ބައެއް ޤައުމުތަކުން ވަނީ، އެއާޕޯޓުގައި އެ ބައްޔަށް ސްކްރީންކުރުން ވަރުގަދަކޮށްފައެވެ. ޑަބްލިޔުއެޗްއޯއިން ބުނީ، ނިޕާ ވައިރަހުގެ މި ދެ ކޭސް މެދުވެރިކޮށް، އިންޑިއާއިން ބޭރަށް މި ބަލި ފެތުރުމުގެ ނުރައްކާ ކުޑަކަމަށާއި، މި ބަލި ފެތުރުން ކޮންޓްރޯލްކުރުމުގެ ޤާބިލުކަން އިންޑިއާގެ ކަމާބެހޭ އިދާރާތަކުގައި އެބަހުރި ކަމަށެވެ.

މިގޮތުން، މި ބަލި، އިންސާނުންގެ މެދުގައި ގައިން ގަޔަށް އެރުން އިތުރުވެފައިވާކަމުގެ އެއްވެސް ހެއްކެއް ލިބިފައިނުވާކަމަށް ވެސް އެ ޖަމްޢިއްޔާއިން ބުނެފައިވެއެވެ.

ނިޕާ ވައިރަސް ފެތުރެނީ ވާލުގެ ވައްތަރެއް ކަމަށްވާ ފްރުޓް ބެޓްއާއި އޫރުފަދަ ބައެއް ޖަނަވާރުގެ ޒަރިއްޔާއިންނެވެ. މި ބައްޔަކީ ގައިންގަޔަށް އަރާ ބައްޔެއް ނަމަވެސް އާންމުގޮތެއްގައި އެ ގޮތަށް ބަލި ފެތުރެނީ ބަލި ޖެހިފައިވާ މީހަކާއެކު ގިނަ ވަގުތު ހޭދަކުރުމުންނެވެ.

ނިޕާ ވައިރަސް ޖެހޭ މީހުންގެ ފަރާތުން ފެންނަ ބައެއް އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ކެއްސުމާއި، ކަރުގައި ރިއްސުމާއި، ނޭވާލާން އުނދަގޫވުން ހިމެނެއެވެ. އަދި ބަލި ބޮޑުވަމުންދާ ވަރަކަށް ސިކުނޑި ދުޅަވެ ވާނުވާ ނޭނގުމާއި، ފިޓުޖެހުން ފަދަ ކަންކަން ވެސް ދިމާވެއެވެ.

މި ބަލި ޖެހުމުން އެއްވެސް އަލާމާތެއް ނުފެނި ދާ ފަހަރު ވެސް އާދެއެވެ. މި ބަލި ޖެހޭ މީހުންގެ 40 އިންސައްތައާއި 75 މީހުން އެ ބަލީގައި މަރުވެއެވެ. މި ބައްޔަށް ވަކި ޚާއްޞަ ފަރުވާއެއް ނެތް ނަމަވެސް އަލާމާތްތަކަށް ފަރުވާ ކުރެވެއެވެ. މި ބައްޔާ ދެކޮޅަށް ގިނަ ވެކްސިންތަކެއް ތައްޔާރުކުރަމުންދާ ނަމަވެސް އެ މަސައްކަތް އަދި އޮތީ ތަހުލީލު މަރުޙަލާގައެވެ.

އިންޑިއާއިން ފެނުނު ދެ ކޭސް ތަޙުޤީޤުކުރަމުންދާއިރު، އެ ދެ މީހުންނަށް އެ ބަލި ޖެހުނު ގޮތެއް އަދި ދެނެގަނެވިފައިނުވާކަމަށް ޑަބްލިޔުއެޗްއޯއިން ބުންޏެވެ.

އިންޑިއާއިން މި ބަލި ފެނިފައި ވަނީ މިދިޔަ ޑިސެމްބަރު މަހުގެ ތެރޭގައެވެ. އެއީ ވެސްޓު ބެންގޯލްގައި މަސައްކަތްކުރާ ސިއްޙީ ޚިދުމަތްތެރިން ކަމަށް އިންޑިޔާއިން ބުނެފައިވެއެވެ.

މިއީ ފާއިތުވި އަހަރުތަކުގެ ތެރޭގައި ނިޕާ ވައިރަސް އިންޑިޔާއިން ފެނުނު ހަތް ވަނަ ފަހަރެވެ. އަދި ވެސްޓު ބެންގޯލުން މި ބަލި ރިޕޯޓުކުރި ތިންވަނަ ފަހަރެވެ.