ގޯލްޑަން ފުޓްސަލް ޗެލެންޖް 2026 ގައި ޒޯން 7 ގެ ގްރޫޕް އޭގައި ބުރާސްފަތި ދުވަހުގެރޭ ގދ. ވާދޫއިން ދަޑިމަގުގެ މައްޗަށް ކުރިހޯދިއިރު ސ. ހިތަދޫއާއި ގއ. ކަނޑުހުޅުދޫ ބައްދަލުކުރި މެޗު އެއްވަރުވެގެން ނިމިއްޖެއެވެ.
ހުޅުމާލޭގެ ރެހެންދި ފުޓްސަލް ދަނޑުގައި ވާދޫއިން ދަޑިމަގުގެ މައްޗަށް ކުރިހޯދީ 1-2 ގެ ނަތީޖާއަކުންނެވެ. ވަރަށް ވާދަވެރި ކުޅުމެއް ދެ ޓީމުގެ ފަރާތުން ވެސް ފެނިގެންދިޔަ މި މެޗުގައި ވާދޫގެ ލަނޑުތައް ކާމިޔާބުކޮށްދިނީ އަބްދުﷲ އާހިލް އަޙްލީއެވެ. ދަޑިމަގުގެ ހަމައެކަނި ލަނޑު އެ ޓީމަށް ކާމިޔާބުކޮށްދިނީ އަޖުމަލް އަޙްމަދުއެވެ. މެޗުގެ މޮޅު ކުޅުންތެރިއަކީ އާހިލްއެވެ.
މި ގުރޫޕުގައި ދެން ހިމެނޭ ހިތަދޫއާއި ކަނޑުހުޅުދޫ ބައްދަލުކުރި މެޗު އެއްވަރުވިއިރު މެޗު ނިމުނީ ދެ ޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ. ލަނޑުޖަހާނެ ގިނަ ފުރުސަތުތަކެއް ތަނަވަސްވި ނަމަވެސް ދެ ޓީމުންކުރެ އެއްވެސް ޓީމެއްގެ ކުޅުންތެރިއަކަށް މި ފުރުސަތުތަކުގެ ބޭނުން އެދެވޭ ގޮތުގައި ހިފިފައެއް ނުވެއެވެ. މި މެޗުގެ މޮޅު ކުޅުންތެރިއަކަށް ހޮވުނީ ކަނޑުހުޅުދޫގެ އަޙްމަދު ޔޫސުފް ނިޔާޒެވެ.
މި ހަތަރު ޓީމު ހިމެނޭ ޒޯން 7 ގެ ގްރޫޕް އޭގައި ހުރިހާ ޓީމަކުން ވެސް މިހާތަނަށް ތިން މެޗު މިވަނީ ކުޅެފައެވެ. މިވަގުތު ޕޮއިންޓް ތާވަލު އެތުރިފައިވާ ގޮތަށް ބަލާލާއިރު އެއްވަނައިގައި ވާދޫ އޮތީ 7 ޕޮއިންޓާއެކުއެވެ. ދެވަނައިގައި ހިތަދޫ އޮތީ ފަސް ޕޮއިންޓު ހޯދައިގެންނެވެ.
ހަތަރުވަނައިގައި ހަތަރު ޕޮއިންޓާއެކު ކަނޑުހުޅުދޫ އޮތްއިރު ފުލުގައި އޮތް ދަޑިމަގަށް ޕޮއިންޓެއް ލިބިފައެއް ނުވެއެވެ.