ރަޝިޔާ-ޔޫކްރެއިން ހަނގުރާމައާ ގުޅޭ ޞުލްޙައިގެ ވާހަކަތައް ކުރިއަށް ގެންދިޔުމަށް ރަޝިޔާއަށް ވަޑައިގަތުމަށް ޔޫކްރެއިންގެ ރައީސް ވޮލޮޑޮމީރު ޒެލެންސްކީއަށް އަރުވާފައިވާ ދަޢުވަތު ރަޝިޔާއިން އަނެއްކާ ވެސް ތަކުރާރުކޮށްފިއެވެ.
ހަތަރު އަހަރަށް ދެމިގެން ގޮސްފައިވާ ހަނގުރާމަ ހުއްޓައިލުމާ ގުޅޭ ގޮތުން މަޝްވަރާ ކުރުަމަށް ޒެލެންސްކީ ރަޝިޔާއަށް ވަޑައިގަތުމަށް މީގެ ކުރިން އަރުވާފައިވާ ދަޢުވަތު ޒެލެންސްކީ ޤަބޫލުކުރައްވައިފައެއް ނުވެއެވެ. ޒެލެންސްކީ އޭރު ވިދާޅުވީ އޭނާގެ އަމިއްލަ ޤައުމަށް ޙަމަލާ ދެމުންދާ ޤައުމެއްގެ ވެރި ރަށަށް އޭނާ ވަޑައިނުގަންނަވާނެ ކަމަށެވެ. އޭގެ ބަދަލުގައި މަޝްވަރާތައް ކުރިއަށް ގެންދިޔުމަށް ޔޫކްރެއިންގެ ކީއިވްއަށް ރަޝިޔާގެ ރައީސް ވްލަޑްމީރު ޕުޓިން ވަޑައިގަތުމަށް އޭނާ ވަނީ ހުށަހަޅުއްވައިފައެވެ.
ރަޝިޔާއާއި ޔޫކްރެއިންއާ ދެމެދު ބައްދަލުވުމެއް ބާއްވާ ނަމަ އެ ބައްދަލުވުން ބާއްވަންވާނީ ވަރަށް ބޮޑަށް ތައްޔާރުވެ، ރަނގަޅު އެދެވޭ ނަތީޖާއެއް ނެރެވޭ ފަދަ ގޮތަކަށް ކަމަށް ރަޝިޔާއިން ބުނެއެވެ. އެ ޤައުމަށް ޒެލެންސްކީ ވަޑައިގެންފި ނަމަ އެ ދަތުރުފުޅުގައި އޭނާގެ ރައްކާތެރިކަން ކަށަވަރުކޮށްދޭނެ ކަމުގެ ޔަޤީންކަން ވެސް ރަޝިޔާއިން ވަނީ ދީފައެވެ.
ރަޝިޔާއަށް ޒެލެންސްކީ ދަތުރުކުރެއްވުމަށް އެ ޤައުމުން ހުށަހަޅާފައި މި ވަނީ އެމެރިކާ އިސްވެ އޮވެ ދެ ޤައުމުގެ ދެމެދުގައި ޞުލްޙަ ޤާއިމް ކުރުަމަށް މަސައްކަތް ކުރަމުންދާ ދަނޑިވަޅެއްގައެވެ. ނަމަވެސް އަދިވެސް ޙަމަލާ ބަދަލުކުރުން ހުއްޓައިލުމާ ގުޅޭ އެއްބަސްވުމަކާ ހަމައަށް އާދެވިފައެއް ނުވެއެވެ. ރަޝިޔާގެ ދަޢުވަތު ތަކުރާރުކޮށްފައި ވަނީ ހަނގުރާމައިގައި މަރުވެފައިވާ ސިފައިންގެ ހަށިތައް ދެ ބައި މީހުންގެ ދެމެދުގައި ބަދަލުކުުރުމަށް ފަހުގައެވެ. މިއީ 2025ވަނަ އަހަރުގެ އޮކްޓޯބަރު މަހަށް ފަހު ދެ ބައި މީހުންގެ ދެމެދުގައި ހަށިތައް ބަދަލުކުރާ ފުރަތަމަ ފަހަރެވެ. މި ބަދަލުކުރުމުގައި ރަޝިޔާއިން ޔޫކްރެއިންގެ 1،000 ސިފައިންގެ ހަށިގަނޑު އެ ޤައުމާ ޙަވާލުކޮށްފައިވެއެވެ.