ފަލަސްޠީނުގެ މިނިވަން ކަމަށް ޖިހާދު ކުރާ ޙަމާސް ޖަމާޢަތުގެ ބެލުމުގެ ދަށުގައި މަރުވި ޔަހޫދީ އަސީރެއްގެ ހަށިގަނޑު ހޯދުމުގެ ނަމުގައި ޔަހޫދީ ފައުޖުން ބައިނަލްއަޤްވާމީ ޤާނޫނުތަކާ ޚިލާފު ލާއިންސާނީ ޖަރީމާތަކެއް ހިންގާފައިވާ ކަން ހާމަވެއްޖެއެވެ. 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު ޙަމާސުން ޔަހޫދީންނަށް ދީފައިވާ ޖިހާދީ ޙަމަލާގެ ދަށުން ރަހީނު ކޮށްފައިވާ އަސީރުންގެ ތެރެއިން މަރުވި އެންމެންގެ ހަށިގަނޑު މިހާރު ވަނީ ޔަހޫދީންނާ ޙަވާލުކޮށްފައެވެ.
އޭގެ ތެރެއިން އެންމެ ފަހު މީހާގެ ހަށިގަނޑު ޔަހޫދީންނާ ޙަވާލު ކޮށްފައިވާ ކަން އިޢުލާނު ކޮށްފައި ވަނީ ޖަނަވަރީ 27ވަނަ ދުވަހުއެވެ. އޭނާގެ ހަށިގަނޑު ހޯދާފައި ވަނީ ޣައްޒާގެ އުތުރުގެ ރަށެއްގައި ގިނަ އަދަދެއްގެ ބަޔަކު ވަޅުލާފައިވާ ގަބުރުސްތާނެއްގައި ވަޅުލާފައި ވަނިކޮށެވެ. އެ ހަށިގަނޑު ހޯދުމުގެ ނަމުގައި ޔަހޫދީން ހިންގި އަސްކަރީ ހަރަކާތުގެ ތެރެއިން ފަލަސްޠީނުގެ ހަތަރު މީހުން ޝަހީދު ކޮށްލިއެވެ. އަދި، އެ ގަބުރުސްތާނުގައި ވަޅުލާފައިވާ ގިނަ އަދަދެއްގެ މައްޔިތާއިންގެ ކަށްވަޅުތައް ކޮނެ، ހަށިތައް ނަގައި، ގިނަ އަދަދެއްގެ ބަޔެއްގެ ހަށިތައް އުކައިލާފައެވެ.
މައްޔިތާއިން ވަޅުލާފައިވާ ގަބުރުސްތާނެއް ކޮނެ، ހަށިތަކާއި ކަށިތައް ނަގައި، ގެއްލުން ދިނުމަކީ އިންސާނީ ޙައްޤުތައް ޙިމާޔަތް ކުރުމަށް އެކަށައަޅާފައިވާ ޖެނީވާ މުޢާހަދާއާ ޚިލާފު، ލާއިންސާނީ ޖަރީމާއެކެވެ. މިއީ، ޝަހީދު ކޮށްލާފައިވާ ފަލަސްޠީނުގެ ރައްޔިތުން ވަޅުލާފައިވާ ގަބުރުސްތާނަކަށް ޔަހޫދީން ގެއްލުންދީފައިވާ ފުރަތަމަ ފަހަރެއް ނޫނެވެ. އަދި، މަރުވެފައިވާ މައްޔިތާއިންގެ ޙުރުމަތް ކަނޑާފައިވާ ވެސް ފުރަތަމަ ފަހަރެއް ނޫނެވެ. ގަބުރުސްތާނުތަކަށް ގެއްލުންދީގެން ޔަހޫދީން ދީފައިވާ މެސެޖަކީ، ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ހަށިތަކަށް ވެސް އެ މީހުން އިޙުތިރާމު ނުކުރާނެ ކަމެވެ.
ޣައްޒާގެ ރައްޔިތުންގެ ނަސްލުހޭދު ކުރުމަށް ޔަހޫދީން ހިންގި ދެ އަހަރަށް ދެމިގެންދިޔަ ޤަތުލުޢާންމުގެ ތެރެއިން ގިނަ އަދަދެއްގެ ގަބުރުސްތާނުތަކަށް ގެއްލުންދީފައިވެއެވެ. ޔަހޫދީންގެ ޤަތުލުޢާންމު ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. އެއާ ޖެހިގެން އައި އަހަރުގެ ޖަނަވަރީ މަހާ ދެމެދު، ޣައްޒާގެ 16 ގަބުރުސްތާނަކަށް ޔަހޫދީ ސިފައިން ގެއްލުންދީ، އެ ތަންތަނުގައި ވަޅުލާފައިވާ އެތަކެއް ސަތޭކަ ބަޔެއްގެ ހަށިތަކުގެ ޙުރުމަތް ކަނޑާފައިވާ ކަމުގައި އެމެރިކާގެ ނޫހެއް ކަމުގައިވާ ސީއެންއެނުން ރިޕޯޓު ކޮށްފައިވެއެވެ.
ޣައްޒާގެ އިތުރުން ޔަހޫދީން ވެރިވެގަނެފައިވާ ހުޅަނގު އައްސޭރީގެ ގަބުރުސްތާނުތަކަށް ވެސް ޔަހޫދީ ސިފައިން ދަނީ ގެއްލުން ދެމުންނެވެ. ހުސްވި ޑިސެންބަރު މަހު ޤުދުސްގައި މުސްލިމުން ވަޅުލާ ގަބުރުސްތާނަކަށް ޔަހޫދީ ސިފައިންގެ ބައިގަނޑަކުން ވަދެ، އެ ތަނަށް ގެއްލުންދިނެވެ. އަދި، 2023ވަނަ އަހަރުގެ ޖަނަވަރީ މަހު، ނަޞާރާދީނުގެ މީހުން ވަޅުލާފައިވާ ގަބުރުސްތާނަކަށް ވެސް ޔަހޫދީ ފައުޖުން ގެއްލުން ދީފައިވެއެވެ.
ޔަހޫދީ ސިފައިން ގެއްލުން ދެމުން ދަނީ ހަމައެކަނި ގަބުރުސްތާނުތަކާއި، އެ ތަންތަނުގައި ވަޅުލާފައިވާ މައްޔިތާއިންނަށް އެކަންޏެއް ނޫނެވެ. ޔަހޫދީން ހައްޔަރު ކޮށްފައި ތިބި ފަލަސްޠީނުގެ ރައްޔިތުންގެ ތެރެއިން ޝަހީދު ކޮށްލާފައިވާ އެތަކެއް ސަތޭކަ ބަޔެއްގެ ހަށިތައް ހުސްވި އަހަރުގެ ތެރޭގައި އެ މީހުންގެ ޢާއިލާތަކާ ޙަވާލު ކޮށްފައިވެއެވެ. އެ މީހުންގެ ޢާއިލާތަކަށް ލިބިފައިވާ ހަށިތަކުން ފެނުނީ، ޔަހޫދީންގެ ހައިވާނިއްޔަތު ކަމެވެ. ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ތެރެއިން ގިނަ އަދަދެއްގެ ހަށިތަކަށް ޔަހޫދީން ވަނީ ބޮޑެތި އަނިޔާތަކެއް، އަދި ބޮޑެތި ގެއްލުންތަކެއް ދީފައެވެ. އެއިން ހާމަވެގެން ދިޔައީ، ޔަހޫދީންގެ ހައްޔަރުގައި އެ މީހުންނަށް ދީފައިވާ ލާއިންސާނީ އަނިޔާތަކެވެ.