ޔުއެފާ ޗެމްޕިއަންސް ލީގުގައި، ޖަރުމަނުގެ ގަދަބާރު ބަޔާން މިއުނިކުން، ޕީއެސްވީގެ މައްޗަށް އުނދަގޫ މޮޅެއް ހޯދައިފިއެވެ.
މެޗަށް ނުކުތްއިރު ވެސް މުބާރާތުގެ ދެވަނަ ބުރުގެ ސީދާ ޖާގައެއް ކަށަވަރުކޮށްފައިވާ ބަޔާނުން ރަށުން ބޭރުގައި ކުޅެ މި މެޗުން މޮޅުވީ 1-2 ގެ ނަތީޖާއަކުންނެވެ. މެޗުގައި ދެ ޓީމުން ވެސް އެޓޭކިން، މޮޅު ގޭމެއް ކުޅުނުއިރު ދެ ޓީމުގެ ފަރާތުން ވެސް ފެނިގެންދިޔައީ ވަރަށް ވާދަވެރި ކުޅުމެކެވެ. މެޗުގައި ފެނިގެންދިޔަ ތިން ލަނޑުވެސް ޖަހާފައި ވަނީ ދެވަނަ ހާފުގައެވެ.
ފުުރަތަމަ ލަނޑު ބަޔާނުން ޖަހާފައިވާއިރު މިއީ 58 ވަނަ މިނެޓުގައި ޖަމާލް މުސިއާލާ ކާމިޔާބުކޮށްދިން ލަނޑެކެވެ. އޭގެ ބަރާބަރު 20 މިނެޓުފަހުން ޕީއެސްވީން ނަތީޖާ ހަމަހަމަކުރިއިރު މި ލަނޑު އެ ޓީމަށް 78 ވަނަ މިނެޓުގައި ކާމިޔާބުކޮށްދިނީ އިސްމާއީލް ސައިބަރީއެވެ. މެޗުން ބަޔާން މޮޅުކޮށްދިން ލަނޑު، ފުރިހަމަވަގުތުގެ ކުޅުން ހަމަވާން ހަ މިނެޓަށްވެފައި ވަނިކޮށް ކާމިޔާބުކޮށްދިނީ ހެރީ ކޭންއެވެ.
މި މޮޅާއެކު ބަޔާނުން ތިން ޕޮއިންޓު ހޯދިއިރު، ޗެމްޕިއަންސް ލީގުގެ ޕޮއިންޓު ތާވަލުގެ ދެވަނައިގައި ބަޔާން އޮތީ އަށް މެޗުން 21 ޕޮއިންޓު ހޯދައިގެންނެވެ. އެއީ ކުޅުނު ހަތް މެޗުން މޮޅުވެގެންނެވެ.
މި މެޗުން ބަލިވި ޕީއެސްވީ ވަނީ ޕްލޭ އޮފްގެ ޖާގައެއް ވެސް ނުލިބި މުބާރާތުން ކަޓާފައެވެ.