ފަހުވަގުތު ޖެހި ދެ ލަނޑާއެކު ޑޯޓްމަންޑް އަތުން އިންޓާއަށް މޮޅެއް

ޔުއެފާ ޗެމްޕިއަންސް ލީގުގެ ފުރަތަމަ ބުރުގައި ކުޅުނު ފަހު މެޗުގައި އިންޓަރ މިލާނުން ބޮރޫޝިއާ ޑޯޓްމަންޑުގެ މައްޗަށް ކުރިހޯދައިފިއެވެ.

ޑޯޓްމަންޑުގެ ދަނޑުގައި ކުޅުނު މި މެޗުން އިންޓަރ މޮޅުވީ 0-2 ގެ ނަތީޖާއަކުންނެވެ، ވަރަށް ވާދަވެރި ކުޅުމެއް ފެނިގެންދިޔަ މި މެޗުގައި އިންޓަރ އިން ދެ ލަނޑު ވެސް ޖަހާފައި ވަނީ މެޗުގެ ފަހުކޮޅުއެވެ.

އެގޮތުން މެޗުގައި ފުރަތަމަ ފަހަރަށް ލަނޑެއް ފެނިގެންދިޔައީ ފުރިހަމަވަގުތުގެ ކުޅުން ހަމަވާން ނުވަ މިނެޓަށްވެފައި ވަނިކޮށެވެ. މެޗުގެ 81 ވަނަ މިނެޓުގައި މި ލަނޑު ކާމިޔާބުކޮށްދީ އިންޓަރ އަށް ލީޑުނަގައިދިނީ ފެޑެރީކޯ ޑިމާކޯއެވެ.

އޭގެފަހުން، މެޗުގެ ފުރިހަމަވަގުތު ހަމަވެ ދެއްކި އިތުރުވަގުތުގެ ހަތަރުވަނަ މިނެޓުގެ ތެރޭގައި އޭންޑީ ޑީއޯފް ވަނީ އިންޓަރ އިން މެޗުގައި ލީޑު ފުޅާކުރި ލަނޑު ކާމިޔާބުކޮށްދީފައެވެ.

މި ނަތީޖާއާއެކު އިންޓާ އިން ތިން ޕޮއިންޓު ހޯދި ނަމަވެސް، މުބާރާތުގެ ދެވަނަ ބުރުގެ ސީދާ ޖާގައެއް ލިބިފައެއް ނުވެއެވެ. ޗެމްޕިއަންސް ލީގުގެ ނޮކްއައުޓް ބުރުން ސީދާ ޖާގައެއް ލިބެނީ، ފުރަތަމަ ބުރުގެ އަށް މެޗު ކުޅެ ނިމޭއިރު އެންމެ މަތިން ޕޮއިންޓު ހޯދާ އަށް ޓީމަށެވެ.

އިންޓަރ އަށް ތާވަލުގައި ލިބެނީ އަށް މެޗުން 15 ޕޮއިންޓާއެކު 10 ވަނައެވެ. މެޗުން ބަލިވި ޑޯޓްމަންޓަށް، އަށް މެޗުން 11 ޕޮއިންޓާއެކު ލިބެނީ 17 ވަނައެވެ. މި ދެ ޓީމުން ވެސް މުބާރާތުގެ ދެވަނަ ބުރުގެ ޖާގައެއް ހޯދަން ޖެހޭނީ ޕްލޭއޮފް ކުޅެގެންނެވެ.