ޗެމްޕިއަންސް ލީގުގައި ރޭ އެންމެ ހައިރާން ކުރުވަނިވި ނަތީޖާ އަކަށްވީ ޕޯޗުގަލްގެ ބެންފީކާ ގޮސް މަޝްހޫރު ރެއާލް މެޑްރިޑް ގަދަ އަށަކުން ބޭރުކޮށް، ޕްލޭއޯފުން ޖާގަ ހޯދުމެވެ.
މެޗުގެ ފުރަތަމަ ގޯލު ޖެހީ ވެސް ޕްލޭއޯފުން ޖާގަ ހޯދަން ދެ ލަނޑުން މޮޅުވާން ޖެހިފައި އޮތް ބެންފީކާ އެވެ. އޭގެ ފަހުން ކީލިއަން އެމްބާޕޭ ލަނޑު ޖަހައި ނަތީޖާ ހަމަހަމަ ކުރި ފަހުން ބެންފީކާ 3-1 އަށް ނަތީޖާ ބަދަލުކުރި އެވެ. އެކަމަކު މެޗުގެ ފަހު ވަގުތާ ހަމައަށް އެ މީހުން ނޭވާ ހިފަހައްޓާލަން ޖެހުނީ އެމްބާޕޭގެ އިތުރު ގޯލަކާއެކު 3-2އިން މެޗު ނިމޭތީ އެވެ. ބެންފީކާ މޮޅުވެ، ރެއާލް ގަދަ އަށަކުން ކެޓި ގޯލު ފެނިގެންދިޔައީ މޮރީނިއޯގެ ކީޕަރު އެނަޓޮލީ ޓާބިން ކޯނަރަކަށް ކުރިއަރައި ޖެހި ގޯލުންނެވެ.
"އެ ގޯލަށް ފަހުނ އެންމެން އަހަރެން ވަށާލައިގެން އުޅުނުއިރު މިވަނީ ކިހިނެތް ކަމެއް ނޭނގެ. މާފަހުން އަހަރެންނަށް އެނގުނީ އަހަރެން ޖެހި ގޯލުން އަހަރުމެންނަށް ޕްލޭއޯފުން ޖާގަ ލިބުނުކަން. މިއީ ތާރީހީ ގޯލެއް، ގިނަ ދުވަހު ހަނދާން ހުންނާނެ ގޯލެއް. މި ގޯލާއެކު މުޅި ސްޓޭޑިއަމް ހިމޭންވި. މިއީ އަހަރުމެންނަށް ހައްގު މޮޅެއް،" ކީޕަރު މެޗަށް ފަހު ބުންޏެވެ.
މޮރީނިއޯ، އޭނާގެ ކުރީގެ ޓީމު ބަލިކުރުމަށްފަހު ބުނީ ކީޕަރަކު ކުރިއަރައި ގޯލު ޖެހުމަކީ އާދައިގެ ކަމެއް ނޫން ކަމަށެވެ.
"އަހަރުމެންނަށް އެނގޭ އޭނާ އަށް އެކަން ވެދާނެކަން. އެހެންވެ ކުރިއަރަން ބުނީ. ދެން ރެއާލް މެޑްރިޑް ބަލި ކުރުމަކީ އަބަދުވެސް އެކަމެއްގައި ބަރުދަން ހުންނާނެ ކަމެއް. އެ މީހުންނަށް ގަދަ އަށަކުން ފުރުސަތު ނުލިބުމެއް ނޫން މުހިންމީ. އަހަރުމެންނަށް ގަދަ 24އިން ފުރުސަތު ލިބުން. މިއީ ހަގީގަތުގައި ވެސް ވަރަށް އާދަޔާ ހިލާފު ކަމެއް. މަދުން ނޫނީ ނުވާނެ ކަމެއް،" މޮރީނިއޯ ބުންޏެވެ.
ރެއާލް މެޑްރިޑްގެ ކޯޗު އަލްވާރޯ އާބެލޯއާ ބުނީ ކީޕަރަކު ކުރިއަރައި ރެއާލް ކޮޅަށް ގޯލު ޖެހުމަކީ އަލަށްވީ ކަމެއްނޫން ކަމަށެވެ. ނަމަވެސް އޭނާ ބުނީ ބަލިވުމުގެ ޒިންމާ ނަގާނީ އޭނާ ކަމަށެވެ.
މެޗަށް ފަހު އެމްބާޕޭ ބުނީ ފަހު ވަގުތު ބަލިވުން އަދި ހާއްސަކޮށް އެންމެ ފަހު ވަގުތު ވަން ގޯލަކީ ވިސްނާލަން ޖެހޭ ކަމެއް ކަމަށެވެ.
"އަހަރުމެން އެބަޖެހޭ އަހަރުމެންގެ ގޯސްތައް ރަނގަޅު ކުރަން. އަހަރުމެންނަށް މި މެޗުގައި ހެދުނު ގޯސްތައް ބަލައި ކަންކަން ރަނގަޅު ކުރަން. މިއީ ރޭވުންތެރިކަން ނެތިގެން ވީ ބައްޔެއްނޫން. މިއީ މަސައްކަތުގެ ރޭޓް ދަށްވެގެން ވީ ބައްޔެއް،" އެމްބާޕޭ ބުންޏެވެ.
މެޗު ފެށިއިރު ގަދަ އަށެއްގައި އޮތް ރެއާލް މި ބައްޔާއެކު ޗެމްޕިއަންސް ލީގުގެ ގްރޫޕް ސްޓޭޖް ނިންމާލަން ޖެހުނީ 9 ވަނާގަ އެވެ. ބެންފީކާ މެޗު ފެށިއރު އޮތީ މުބާރާތުން ކަޓާ ގްރޫޕުގެ ތެރޭގަ އެވެ. ނަމަވެސް ޕްލޭއޯފުން ޖާގަ ލިބުނީ ގަދަ 24ގެ ފަހު ޖާގަ ލިބިގެންނެވެ.