އޮޑިއާއި ބުރު އެއްވަރުވެ، މާޒިޔާއަށް ލީގު ޗެންޕިއަންކަން

ދިރާގު ދިވެހި ޕްރިމިއަރ ލީގުގައި އޮޑި ސްޕޯޓްސް ކުލަބާއި ބުރު ސްޕޯޓްސް ކުލަބު ކުޅުނު މެޗު އެއްވަރުވެ ލީގު ޗެންޕިއަންކަން މާޒިޔާ ސްޕޯޓްސް އެންޑް ރެކްރިއޭޝަނަށް ލިބިއްޖެއެވެ.

މާޒިޔާ ފަސް ވަނަ ފަހަރަށް ލީގު ކަށަވަރު ކުރީ ކުރިއަށް ދެމެޗުން ބަލިވި ނަމަވެސް އޮޑިއަށް އެ އަދަދަށް ޕޮއިންޓް ހަމަ ނުވާނެތީއެވެ. މާޒިޔާ ލީގުގެ އެއްވަނައިގަ އޮތީ 44 ޕޮއިންޓާއެކުއެވެ.

ރަސްމީ ބޯޅަދަނޑުގައި ކުޅުނު މެޗު ނިމުނީ 1-1 ލަނޑުން އެއްވަރުވެގެންނެވެ. މި ނަތީޖާ އެކު އޮޑިން ލީގުގެ ދެވަނަ ކަށަވަރު ކުރީ 17 މެޗުން ހޯދި 39 ޕޮއިންޓާއެކުއެވެ. ބުރު ސްޕޯޓްސް ކުލަބު ހަތަރު ވަނައިގަ އޮތީ 17 މެޗުން 29 ޕޮއިންޓާއެކުއެވެ.

ދެ ޓީމުގެ ފަރާތުން ވާދަވެރި ކުޅުމެއް ފެނިގެން ދިޔަ މެޗުގައި އޮޑިއަށް ފުރަތަމަ ހާފުގައި ލަނޑުޖަހަން މާ ގިނަ ފުރުސަތެއް ލިބިފައެއް ނުވެއެވެ. މެޗުގެ ފުރަތަމަ ލަނޑު ޖަހާ ކުރި ހޯދީ ބުރުންނެވެ. ބުރުގެ ޑަވަންޑޫ ޑިއާނޭ ނަގައިދިން ކޯނަރެއް ގޯލު ކުރިމަތިން އޮޑި ކުޅުންތެރިންނަށް ސާފުކޮށް ނުލިވެގެން އުޅިނިކޮށް ގޯލާ ކައިރީގަ ހުރި ބުރުގެ ޝަމްވީލް މުހައްމަދު ވަނީ ބޯޅަ ގޯލަށް ވައްދާ ލަނޑު ޖަހާފައެވެ.

މި ލަނޑަށްފަހު ބުރުގެ ބިދޭސީ ފޯވާޑް ހުޑްސަން ޑިއަސްއަށް ވަނީ ލަނޑުޖަހަން ރަނގަޅު ފުރުސަތެއް ލިބިފައެވެ. މެޗުގެ 28 ވަނަ މިނިޓުގައި ހާފްގެ މެދެއްހާ ހިސާބުން ޑިއާނޭ ފޮނުވާލި ބޯޅަ ދިއައީ ހުރަސް ދަނޑިއާ ވަރަށް ކައިރިންނެވެ.

ފުރަތަމަ ހާފުގެ ފަހު ކޮޅު އޮޑިން ވަނީ ބުރުގެ ގޯލަށް ނުރައްކާ ކޮއްފައެވެ. އެގޮތުން 36 ވަނަ މިނިޓުގައި މުޒްދާން ހަސަން އޭރިއާ އަރިމަތިން ހުސްކޮށް ހުރެ ފޮނުވާލި ބޯޅައެއް ކީޕަރު ދިފާއު ކުރިއިރު ފުރަތަމަ ހާފުގެ އިތުރު ވަގުތުގެ ތެރޭގައި އޮޑީގެ މުހައްމަދު ސާމިރު އޭރިއާ ބޭރުން ފޮނުވާލި ބޯޅަ ދިއައީ ހުރަސް ދަނޑިމަތިންނެވެ.

ދެވަނަ ހާފު ފަށައިގެން އެޓޭކްގައި އޮޑިން ކުޅުން ރަނގަޅު ކުރިއިރު މި ހާފުގައި ފުރަތަމަ ފެނިގެން ދިޔައީ ބުރުގެ ނުރައްކާތެރި ހަމަލާއެކެވެ. އެ ގޮތުން 51 ވަނަ މިނިޓުގައި ބުރުގެ އަރީން އަބްދުﷲ އިބްރާހިމް އޭރިއާ ބޭރުން ހިފައިގެން ދިޔަ ބޯޅަ އޭރިއާ ތެރެއަށް ވަދެ ފޮނުވާލުމުން ވަނީ ގޯލާ އަމާޒުވާ ގޮތް ނުވެފައެވެ.

އޮޑިން ނަތިޖާ ހަމަހަމަ ކުރީ 57 ވަނަ މިނިޓުގައި މުޒްދާން އޭރިއާ ތެރެއަށް ހިފައިގެން ވަތް ބޯޅައެއް އޭރިއާ ތެރެއިން ހުސްކޮށް ހުރި ބްރައުން ހުސްކޮއްލާފަ ދިނިމުން އޭނާ ކާމިޔާބު ކުރި ލަނޑެކެވެ.
މެޗުގެ ފަހު 10 މިނިޓުގެ ތެރޭގައި ބުރުގެ ހުޑްސަން އޭރިއާ ތެރެއަށް ވަދެ ފޮނުވާލި ބޯޅަ ގޯލާ އަމާޒު ނުވިއިރު އޮޑީގެ މުޒްދާން އޭރިއާ ތެރެއިން ފޮނުވާލި ބޯޅައެއް ކީޕަރު ވަނީ ދިފާއުކޮއްފައެވެ.
މިއީ މި ލީގުގައި ބުރު އެއްވަރުވި 5 ވަނަ މެޗެވެ.