އެމެރިކާގެ ރައީސް ޑޮނަލްޑް ޓްރަމްޕް، އެ ޤައުމުގެ ވެރިކަމާ ދެވަނަ ދަޢުރަކަށް ޙަވާލުވެވަޑައިގެންނެވުމަށްފަހު، ތަންފީޒުކުރަން ފެއްޓެވި ހަރުކަށި ސިޔާސަތުގެ ފައިދާ، ދުރުގައި އޮވެ، ޗައިނާއިން މަޑުމަޑުން ނަގަމުންދާކަމަށް މަސްރަޙު ދިރާސާކުރާ ފަރާތްތަކުން ބުނެފިއެވެ.
ޓްރަމްޕްގެ ހަރުކަށި ސިޔާސަތުތަކުގެ ސަބަބުން، ޒަމާނުއްސުރެ ގާތްގުޅުންތަކެއް ޤާއިމުވެފައި އޮތް ޤައުމުތަކާއެކު ގުޅުންތައް ހީނަރުވެފައިވާއިރު، ޗައިނާއިން ވަނީ އިންޑިއާ އާއި ކެނެޑާ ފަދަ ޤައުމުތަކާއެކު އޮތް ގުޅުން ރަނގަޅުކޮށް، ފުޅާކުރަން މަސައްކަތް ފަށައިފައެވެ.
މި މަސައްކަތުގެ ހެޔޮ ނަތީޖާ ފެންނަން ފަށައި، ޗައިނާއިން މިދިޔަ އަހަރު ނިންމައިލީ، 1.2 ޓްރިލިއަން ޑޮލަރުގެ ވިޔަފާރި ސަރޕްލަސްއަކާ އެކުއެވެ. މީގެއިތުރުން، ޗައިނާއަށް ބޭރު ފައިސާ އެތެރެވާ މިންވަރު 100 ބިލިއަން ޑޮލަރަށް އަރާފައިވާއިރު، ދުނިޔޭގެ ޗައިނާގެ ޔުއާން ބޭނުންކުރާ މިންވަރު ވެސް ވަނީ މިދިޔަ އަހަރު އެތައް ގުނައަކުން އިތުރުވެފައެވެ.
ތަޖުރިބާކާރުން ވިދާޅުވާ ގޮތުގައި، އެމެރިކާގެ ހަރުކަށި ސިޔާސަތުގެ ސަބަބުން، މުޅި ދުނިޔޭގެ ވިޔަފާރިއަށް ކުރިމަތިވެފައިވާ ނުތަނަވަސްކަމުގެ ތެރެއަށް، ދުނިޔޭގެ ދެވަނައަށް އެންމެ ބޮޑު އިޤްތިސާދުގެ ގޮތުގައި ޗައިނާއިން ވަނީ ހަރުދަނާ ބައިވެރިއެއްގެ ދަޢުރު ފުރިހަމައަށް އަދާކޮށްފައެވެ.
އިނގިރޭސިވިލާތުގެ ބޮޑުވަޒީރު ކިއަރ ސްޓާމަރ މިއަދު ޗައިނާއަށް ފައްޓަވައި ފުރަމާނަ ދަތުރުފުޅުގެ ތެރެއިން، އެ ޤައުމާއެކު ވެސް ކުރިން ހީނަރުވެފައި އޮތް ގުޅުން ރަނގަޅުކޮށް، ސިޔާސީ އަދި ވިޔަފާރީގެ ގުޅުން އިތުރަށް ހަރުދަނާކުރާނެކަމަށް ތަޖުރިބާކާރުން ޤަބޫލުކުރައްވައެވެ.
އެމެރިކާއަށް ޗައިނާއިން އެތެރެކުރާ މުދަލުގެ ގިނަ ބާވަތްތަކުން 100 އިންސައްތައާ ހަމައަށް ޑިޔުޓީ ބޮޑުކުރުމުގެ ނޭދެވޭ އަސަރުތައް ކުޑަކުރުމަށް، ޗައިނާއިން ވަނީ އެހެން ޤައުމުތަކާއެކު ވިޔަފާރީގެ ގުޅުންތައް ފުޅާކުރުމަށް މިދިޔަ އަހަރުގެ ގިނަ މަސައްކަތްތަކެއް ކޮށްފައެވެ.
މިގޮތުން، މިދިޔަ އަހަރު ޗައިނާއިން އެމެރިކާއަށް ބޭރުކުރާ މުދަލުގެ ނިސްބަތް 20 އިންސައްތަ ދަށަށް ގޮސްފައިވީނަމަވެސް، އެފްރިކާއަށް 25.8 އިންސައްތަ، ލެޓިން އެމެރިކާއަށް 7.4 އިންސައްތަ، އިރުދެކުނު އޭޝިއާއަށް 13.4 އިންސައްތަ އަދި ޔޫރަޕަށް 8.4 އިންސައްތައަށް މުދާ ބޭރުކުރާ މިންވަރު އިތުރުވެފައެވެ.
ޗައިނާ ސަރުކާރުން އެޅި އަވަސް ފިޔަވަޅުތަކުގެ ސަބަބުން، އެމެރިކާއިން ޑިޔުޓީ ބޮޑުކުރުމުގެ ލޮޅުންތަކުގެ ތެރޭގައިވެސް، މިދިޔަ އަހަރަށް ކަނޑައެޅި އަމާޒާ އެއްގޮތަށް، ޗައިނާގެ އިޤްތިޞާދު ވަނީ ފަސް އިންސައްތައިން ކުރިއަރައިފައެވެ.