ޢިރާޤުގެ ބޮޑުވަޒީރު ކަމުގެ މަޤާމު ކުރިން ފުރުއްވާފައިވާ ނޫރީ އަލް-މާލިކީ އަލުން އެ މަޤާމަށް އިންތިޚާބުކޮށްފިނަމަ، އެ ޤައުމަށް އެހީތެރިކަން ފޯރުކޮށްދިނުން މެދުކަނޑައިލައްވާނެ ކަމުގައި ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފިއެވެ. މާލިކީއަކީ އެމެރިކާގެ އެންމެ ބޮޑު އެއް ދުޝްމިނުގެ ގޮތުގައި އެ ޤައުމުން ދެކޭ އީރާނާ ގާތް ގުޅުންތަކެއް ބާއްވަވާ، ޝިޔަޢީ މަޒުހަބުގެ ބޭފުޅެކެވެ.
ބޮޑުވަޒީރު ކަމުގެ މަޤާމަށް ކެނޑިޑޭޓެއްގެ ގޮތުގައި މާލިކީގެ ނަން ހުށަހަޅާފައި ވަނީ ޢިރާޤުގެ ޤާނޫނު ހަދާ މަޖިލީހުގައި ޝިޔަޢީން ތަމްސީލު ކުރާ އެންމެ ބޮޑު އިއްތިޙާދު، ކޯޑިނޭޝަން ފްރޭމްވަރކުންނެވެ. އެ މަޤާމަށް އަލުން އޭނާ އިންތިޚާބު ކޮށްފި ނަމަ، ޢިރާޤަށް އެހީތެރިކަން ފޯރުކޮށްދިނުން މެދުކަނޑައިލައްވާނެ ކަމުގައި ޓްރަމްޕް ވިދާޅުވެފައި މި ވަނީ، ބޭރު ޤައުމުތަކުގެ ދާޚިލިއްޔާތަކާއި ދާޚިލީ ނިންމުންތަކަށް ބާރު ހިންގަވައި، ނުފޫޒު ފޯރުއްވަން އޭނާ މަސައްކަތް ކުރައްވަމުން ގެންދަވާ ދުވަސްވަރެއްގައެވެ.
"އެންމެ ފަހުން އޭނާ (މާލިކީ) ވެރިކަން ކުރެއްވި އިރު އެ ޤައުމު ފަޤީރު ކަމާއި ހަމަނުޖެހުންގަނޑެއްގެ ތެރެއަށް ވެއްޓުނު. އެ ކަން ތަކުރާރުވުމުގެ ފުރުޞަތު ދީގެން ނުވާނެ،" މާލިކީއާ ދެކޮޅަށް މީސްމީޑިޔާގައި ޝާއިޢު ކުރެއްވި ޕޯސްޓެއްގައި ޓްރަމްޕް ލިޔުއްވިއެވެ. "އޭނާގެ މޮޔަ ފިކުރާއި ސިޔާސަތުތަކުގެ ސަބަބުން، އަލުން އިންތިޚާބު ކޮށްފި ނަމަ، އެމެރިކާއިން ޢިރާޤަށް އެހީތެރިކަން ފޯރުކޮށްދިނުން ހުއްޓައިލާނަން."
ޢިރާޤަށް އެހީތެރިކަން ފޯރުކޮށްދިނުން އެމެރިކާއިން މެދުކަނޑައިލައިފި ނަމަ އެ ޤައުމުގެ މިނިވަން ކަމާއި، ފާގަތި ކަމާއި ކާމިޔާބީގެ ފުރުޞަތު ގެއްލިގެންދާނެ ކަމުގައި ވެސް ޓްރަމްޕް ވިދާޅުވިއެވެ. ޢިރާޤުގެ ބޮޑުވަޒީރު ކަމުގެ މަޤާމަށް މާލިކީ އަލުން އިންތިޚާބު ކޮށްފި ނަމަ، އެ ޤައުމަށް އެހީތެރިކަން ފޯރުކޮށްދިނުން މެދުކަނޑައިލައްވާނެ ކަމުގައި ވިދާޅުވެ ޓްރަމްޕް އިންޒާރު ދެއްވާފައި މި ވަނީ، އީރާނުން ޢިރާޤަށް ބާރާއި ނުފޫޒު ފޯރުވުމުގެ ފުރުޞަތު ހަނި ކުރެއްވުމުގެ ގޮތުން ކަމުގައި މަސްރަޙު ދިރާސާ ކުރާ ފަރާތްތަކުން ބުންޏެވެ.
ޢިރާޤަށް ޓްރަމްޕް އިންޒާރު ދެއްވާފައިވާ މި ދަނޑިވަޅުގައި، ޢިރާޤުގެ ބޮޑުވަޒީރު ކަމުގެ އިންތިޚާބާ ގުޅުވައި އެމެރިކާގެ ޤާނޫނު ހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓެޓިވްސްގެ މެންބަރުން ވެސް ވަނީ ޢިރާޤަށް އިންޒާރެއް ދެއްވާފައެވެ. އަދި، ޢިރާޤުގައި އެކުލަވައިލާ އައު ސަރުކާރެއްގައި ބައިވެރިވުމުގެ ފުރުޞަތު އީރާނާ ގުޅުން އޮތް ގުރޫޕުތަކާއި ޖަމާޢަތްތަކަށް ދީފި ނަމަ، ޢިރާޤުގެ ސިޔާސީންނާ ދެކޮޅަށް ދަތިކުރުމުގެ ފިޔަވަޅު އަޅާނެ ކަމުގެ އިންޒާރު ވެސް ވޮޝިންގްޓަނުން ވަނީ ދީފައެވެ.
އުމުރުން 75 އަހަރުގެ މާލިކީއަކީ ޝިޔަޢީ މަޒްހަބުގެ ދަޢުވާ ޕާޓީގެ އިސް މެންބަރެކެވެ. އޭނާ ޢިރާޤުގެ ބޮޑުވަޒީރު ކަމުގެ މަޤާމު ކުރިން ފުރުއްވާފައި ވަނީ 2006ވަނަ އަހަރުން ފެށިގެން 2014ވަނަ އަހަރުގެ ނިޔަލަށެވެ. އޭނާގެ ވެރިކަމުން ފެޔަށް ޖެހިވަޑައިގަންނަވާފައި ވަނީ، ނިރުބަވެރި ޖަމާޢަތް، އައިއެސުން ޢިރާޤުގެ ބައެއް ބިންތައް ފޭރިގަތުމާ ގުޅިގެން ފެށިގެން ދިޔަ ހަމަނުޖެހުންގަނޑުގެ ތެރެއިންނެވެ.