ޗެމްޕިއަންސް ލީގު ފުޓްބޯޅަ މުބާރާތުގައި މިރޭ އޭނާގެ ސްޕޭނުގެ މައްޗަށް ރެއާލް މެޑްރިޑް ކުރި ހޯދަން އެއްގޮތަކަށް ވެސް ނޭދޭ ކަމަށް ޕޯޗުގަލްގެ ބެންފީކާގެ ކޯޗު ހޯސޭ މޮރީނިއޯ ބުނެފި އެވެ.
ޗެލްސީ އާއި އިންޓަމިލާން އަދި ޕޯޓޯ އާއި މެންޗެސްޓާ ޔުނައިޓެޑަށް ވެސް ކާމިޔާބު ހޯދައިދިން ތަޖުރިބާކާރު ކޯޗު މޮރީނިއޯ އަކީ ރެއާލް މެޑްރިޑްގެ ވެސް ކުރީގެ ކޯޗެވެ. ތިން އަހަރު އެ ކުލަބަށް ކޯޗުކޮށްދީ އޭނާ ވަނީ 2012 ވަނަ އަހަރުގެ ސްޕެނިޝް ލީގު ރެއާލް އަށް ކާމިޔާބުކޮށްދީފަ އެވެ.
ރެއާލްގެ މިހާރުގެ ކޯޗު އަލްވާރޯ އާބެލޯއާ އާއި އޭނާގެ ކުރިން މިސީޒަނުގައި ހުރި ކޯޗު ޒަބީ އަލޮންސޯ އަކީ މޮރީނިއޯގެ ކޯޗުކަމުގައި ރެއާލް މެޑްރިޑަށް ކުޅުނު ކުޅުންތެރިންނެވެ. މިހެންވެ މެޗުގެ ކުރިން އޭނާ އަށް އެންމެ ގިނަ ސުވާލު އަމާޒުވީ ވެސް ކުރީގެ ޒުވާން މި ދެ ކޯޗުންނާ ބެހޭ ގޮތުންނެވެ. އަލޮންސޯ އާއި އާބެލޯއާގެ ތަފާތަކީ ކޮބާތޯ އެހުމުން ޖަވާބުގައި މޮރީނިއޯ ބުނީ ނޫސްވެރިންގެ މަގްސަދަކީ އޭނާ ލައްވައި ޒާތްޒާތުގެ ވާހަކަ ދެއްކުން ކަމަށެވެ.
"އެކަމަކު އެކަމެއް ނުވާނެ. އަލްވާރޯ (އާބެލޯއާ) އަކީ އަހަރެންގެ ކުރީގެ ކުޅުންތެރިއެއް. އޭނާ އަކީ އަހަރެން ވަރަށް ގަޔާވި ކުޅުންތެރިއެއް. އޭނާ އަކީ އެންމެ މޮޅު ކުޅުންތެރިޔާ އަށް ނުވެދާނެ. އެކަމަކު އޭނާ އަކީ ރެއާލް މެޑްރިޑުގައި މޮޅަށް ކުޅުނު ކުޅުންތެރިއެއް. އަހަރެން އޭނާ އަށް ކާމިޔާބު ލިބުމަށް އެދެން. އެކަމަކު މި މެޗު ފިޔަވައި،" މޮރީނިއޯ ބުންޏެވެ.
މި ސީޒަނުގައި ރެއާލް މެޑްރިޑާ ހަވާލުވި އަލޮންސޯ އަށް ރެއާލްގެ ކޯޗުކަމުން ވަކިވާން މަޖުބޫރުވީ އޭނާ އާއި މެނޭޖްމަންޓަށްވުރެ ކުޅުންތެރިންގެ ނުފޫޒު ގަދަވެގެންނެވެ. އަލޮންސޯއާ ބެހޭ ގޮތުން ސުވާލު ކުރުމުން މޮރީނިއޯ ބުނީ އޭނާގެ ހިތުގައިވަނީ އަލޮންސޯ ކުރި މޮޅު ކަންކަމާއި އެކުގައި ހޭދަކުރި އުފާވެރި ހަނދާންތައް ކަމަށެވެ.
"އޭނާ އަކީ ވެސް އަހަރެންގެ ކުޅުންތެރިއެއް. އޭނާ ރެއާލް މެޑްރިޑްގެ ކޯޗަކަށް ގެނައީ ބަޔާ ލެވަކޫސެންގައި އޭނާ ކުރި މޮޅު ކަންކަމުގެ ސަބަބުން. ރެއާލް މެޑްރިޑުގެ ކޯޗުކަމުން އޭނާ ވަކިވާން ޖެހުނު ވާހަކަ ދައްކާނެ ކަމެއްނެތް. އޭނާ ވަނީ އޭނާ އަކީ މޮޅު ކޯޗެއްކަން ސާބިތުކޮށްދީފައި. އޭނާ އަށް ކޮންމެ ޓީމަކަށް ވެސް ކޯޗު ކޮށްދެވިދާނެ. ދެން މިހާރު ކޯޗުންނާ މެދު ކޮންމެ ފަދަ ކަމެއް ވެސް ވެދާނެ. ސަބަބަކީ ކޯޗުންނާ މެދު އަބަދުވެސް މީހުން ފާޑުފާޑުގެ ވާހަކަ ދައްކައި ގޮންޖެހުންތައް ކުރިމަތި ކުރާތީވެ، ފާޑުކިޔަނީ ވެސް މޮޅު ކަންކަން ކުރާތީވެ،" މޮރީނިއޯ ބުންޏެވެ.
އާބެލޯ އާއި އަލޮންސޯގެ ތަފާތުގެ ވާހަކަ އެހުމުން މޮރީނިއޯ ބުނީ އެންމެ މުހިންމު ކަމަކީ ހިތްހަމަ ޖެހިގެން ކޯޗުކަން ކުރުން ކަމަށެވެ.
"އާބެލޯއާ އަށް އެންމެ މުހިންމު ކަމަކީ އޭނާ (ރެއާލް މެޑްރިޑުގައި) ހިތްހަމަ ޖެހިގެން ހުރެ ކޯޗުކަން ކުރެވުން. އެ ނިމުނީ،" މޮރީނިއޯ ބުންޏެވެ.
މި މެޗަށް ނުކުންނައިރު މޮރީނިއޯގެ ޓީމު އޮތީ ޗެމްޕިއަންސް ލީގުގެ 29 ވަނާގަ އެވެ. އެއީ ހަތް މެޗުން ހަ ޕޮއިންޓާއެކުގަ އެވެ. މިހެންވެ ދެ ވަނަ ބުރަށް ދިއުމަށް ޕްލޭއޯފް ކުޅެން ފުރުސަތު ހޯދުމަށް ރެއާލް ބަލިކުރަން ޖެހޭނެ އެވެ. ރެއާލް މެޑްރިޑް އޮތީ ހަތް މެޗުން 15 ޕޮއިންޓާއެކު ޓޭބަލުގެ ތިން ވަނާގަ އެވެ.