މީގެ ދެ އަހަރު ކުރިން ޣައްޒާގައި މަރުވި ޔަހޫދީ އަސީރެއްގެ ހަށިގަނޑު ހޯދުމަށް ޔަހޫދީ އަސްކަރިއްޔާއިން މި ފަހުން ވަނީ ޣައްޒާގައި ޚާއްޞަ ޙަރަކާތެއް ހިންގާފައެވެ. އެ ޙަރަކާތް ކުރިއަށް ގެންދިޔުމަށް ޓޭންކަރާއި ޑްރޯންއާއި ގޮވާތަކެތި ސާފުކުރުމަށް ބޭނުންކުރާ ޚާއްޞަ އާލާތްތަކާއި ރޮބޮޓުތަކާއި ސެޓެލައިޓުތައް ޔަހޫދީން ބޭނުންކޮށްފައިވެއެވެ. އެ ޙަރަކާތް ކުރިއަށް ގެންދިޔުމަށް ޣައްޒާގެ އަލް-ބަތުޝް ސަހަރާ ކޮނެ، އެ ތަނުގައިވާ 200އެއްހާ މަހާނައަށް ވެސް ގެއްލުން ދީފައިވެއެވެ. އެ މަސައްކަތަށް އެ ސަރަޙައްދު ހުސްކުރުމަށް ވައިގެ ޙަމަލާތައް ދީ، ޢާންމުންގެ ހަތަރު މީހަކު ވެސް ޝަހީދުކޮށްލާފައިވެއެވެ.
ޣައްޒާގެ ސުންނާފަތިވެފައިވާ އިމާރާތްތަކުގެ ދަށުގައި ތާށިވެފައިވާ އެ ސަހަރުގެ 10،000އަށްވުރެ ގިނަ މީހުންގެ ހަށިތައް ނުނެގި ހުއްޓައި، އެންމެ މީހެއްގެ ހަށިގަނޑު ހޯދުމަށް ޔަހޫދީން ކުރިއަށް ގެންދިޔަ މި ބިޔަ ޙަރަކާތުން ދައްކުވައިދެނީ، މައްޔިތުންގެ ހަށިތަކާމެދު ޢަމަލުކުރުމުގައި ހުރި ބޮޑެތި ތަފާތުތަކެވެ. އެންމެ މީހެއްގެ ހަށިގަނޑު ހޯދުމަށް ޣައްޒާގެ ސަރަޙައްދެއް ޔަހޫދީން އެ ފުށް މި ފުށަށް ޖެހި އިރު، ޔަހޫދީންގެ ލާއިންސާނީ ޙަމަލާތަކުގައި ޝަހީދުވެފައިވާ އެތައް ހާސް ހަށިތައް ނަގައި ވަޅުލެވޭނެ ކަމުގެ އުއްމީދެއް ނެތެވެ. ޔަހޫދީންގެ ޢުދުވާނުގައި ޣައްޒާ ސުންނާފަތިވެ ބިމާހަމަވެފައިވާއިރު، ގައުކުނޑި ސާފުކުރާނެ އާލާތްތައް ވެސް ޣައްޒާގައި ލިބޭކަށް ނެތެވެ. އަދި އެ ކަމަށް ބޭނުންވާ ބަރު އުޅަނދުފަހަރު ހިންގުމަށް ބޭނުންވާ ތެޔޮ ވެސް ޣައްޒާއިން ނުލިބެއެވެ. އެއްބަޔަކު ޒަމާނީ އާލާތްތައް ބޭނުންކޮށްގެން ހަށިގަނޑެއް ހޯދިއިރު، ޣައްޒާ ވެފައި މި ވަނީ އެތައް ހާސް ހަށިތަކެއް އެ ތަނެއްގައި ވަޅުލެވިފައިވާ މާ ސިންގާ ސަހަރާއަކަށެވެ.
ފަލަސްޠީނުގެ ރަސްމީ އިދާރާތަކުން ވަނީ ދެ ބައި މީހުންގެ ދެމެދުގައި އޮތް ބޮޑު ފަރަގަށް ފާޑުކިޔައިފައެވެ. ޣައްަޒާގެ ރައްޔިތުންގެ ހަށިތައް ހޯދައި އެ ހަށިތައް ނެގުމަށް، ޔަހޫދީންގެ އެންމެ އަސީރެއްގެ ހަށިގަނޑު ހޯދުމަށް ކުރި މަސައްކަތާ އަޅައި ކިޔޭ ވަރުގެ އެހީތެރިކަމެއް ބައިނަލްއަޤްވާމީ ގޮތުން ވެސް ލިބިފައި ނުވާ ކަމަށް ޣައްޒާއިން ފާހަގަކުރެއެވެ. އިންސާނީ ހައްޤުތަކަށް މަސައްކަތްކުރާ ޖަމްޢިއްޔާތަކުން ވެސް ވަނީ ޣައްޒާގެ ޝަހީދުވެފައިވާ ރައްޔިތުންގެ ހަށިތައް ހޯދުމަށް އެދެވޭ މަސައްކަތެއް ނުކުރެވުމަކީ އިންސާނީ ހަމަތަކާ ޚިލާފަށް ހިނގާ ކަމެއް ކަމަށް ބުނެ ކަންބޮޑުވުން ފާޅުކޮށްފައެވެ.