ދުނިޔޭގެ ކުލަބު ފުޓުބޯޅައިގެ ގަދަބާރު، ސްޕެއިންގެ ރެއާލް މެޑްރިޑުގެ ލެޖެންޑެއް ކަމުގައިވާ މާސެލޯގެ ދަރި، އެންޒޯ އަލްވޭޒް، އެ ކުލަބާއެކު ރަސްމީ އެއްބަސްވުމެއްގައި ސޮއިކޮށްފިއެވެ.
އުމުރުން 16 އަހަރުގެ އެންޒޯ ވަނީ އެކަން ހާމަކޮށް މީސްމީޑިއާ ޕޯސްޓެއް ވެސް ކޮށްފައެވެ.
އެންޒޯގެ ޕޯސްޓުގައި ބުނެފައި ވަނީ، ފުރަތަމަ ފަހަރަށް "ޕްރޮފެޝަނަލް ކޮންޓްރެކްޓެއް" ގައި ސޮއިކުރެވުމުން ނުހަނު އުފާކުރާ ކަމަށެވެ. އަދި ރެއާލްގެ ސަޕޯޓަރުން ބޭނުންކުރާ ޝިއާރެއް ކަމަށްވާ، "ހަލަ މެޑްރިޑް" ވެސް އޭނާގެ ޕޯސްޓުގައި ބޭނުންކޮށްފައިވެއެވެ.
ރެއާލްއާއެކު އެންޒޯ އެއްބަސްވުމުގައި ސޮއިކުރީ ހޯމަ ދުވަހުއެވެ.
ރަސްމީ އެއްބަސްވުމަކާ ނުލައި ވެސް ރެއާލްގެ ޒުވާން ޓީމުތަކަށް ކުޅެފައިވާ އެންޒޯ ވަނީ، ރެއާލްގެ ވަލްޑެބެބާސް ސްޓޭޑިއަމުގައި އޭނާގެ ހުނަރު ދައްކާފައެވެ. ބައްޕަ މާސެލޯއާ ޚިލާފަށް، އެންޒޯ އަކީ ގޯލާ ރަށްޓެހި ސްޓްރައިކަރެކެވެ.
ރެއާލްގެ އެކަޑަމީގައި އެންޒޯ މިހާތަނަށް ކުޅުނު މެޗުތަކުގައި ޖެހި ޖުމްލަ ލަނޑުގެ އަދަދދު 200 އާ ގާތްކުރެއެވެ.
ދިގު މުއްދަތަކަށް ރެއާލްއާއެކު އެއްބަސްވުމެއްގައި އެންޒޯ ސޮއިކޮށްފައިވާއިރު، އެ އެއްބަސްވުމުގައި ބޮޑު ރިލީޒް ކްލައުސްއެއް ހިމަނާފައިވެއެވެ. އެއީ ޔޫރަޕުގެ ބޮޑެތި ބާރުތަކުން އޭނާއަށް ފާރަލަމުންދާތީ އެޅި ފިޔަވަޅެއްކަމަށް ރިޕޯޓުތައް ބުނެއެވެ.
ހުނަރުވެރި ސްޓްރައިކަރެއްގެ ގޮތުގައި ރެއާލްގެ ވެރިންގެ ނަޒަރުގައި ވެސް މަގުބޫލުކަން ލިބިފައިވާ އެންޒޯ ވަނީ، އުމުރުން އެންމެ 15 އަހަރުގައި ރެއާލްގެ 19 އަހަރުން ދަށުގެ ޒުވާން ޓީމަށް ކުޅެފައެވެ. އަދި އެފަހުން، ރެއާލްގެ ސީނިއަރ ޓީމުގެ މިހާރުގެ ކޯޗު، އާބެލޯއާގެ އިރުޝާދުގެ ދަށުން ރެއާލްގެ ރިޒާވް ޓީމުގައި ވެސް އެންޒޯ ކުޅެފައިވެއެވެ.
އެންޒޯ ވަނީ ރެއާލްގެ ރިޒާވް ޓީމާއެކު 21 އަހަރުން ދަށުގެ ޕްރިމިއަރ ލީގު އިންޓަނޭޝަނަލް ކަޕުގައި، މެންޗަސްޓަރ ސިޓީއާ ދެކޮޅަށް ވެސް ކުޅެފައެވެ.
މީގެއިތުރުން، އެންމެ 15 އަހަރުގައި އެންޒޯ ވަނީ ސްޕެއިންގެ 17 އަހަރުން ދަށުގެ ޤައުމީ ފުޓުބޯޅަ ޓީމަށް ވެސް ކުޅެދީފައެވެ. މާސެލޯއަކީ ބްރެޒިލް ކުޅުންތެރިއެއް ނަމަވެސް، އޮންނަ އުސޫލުގެ ދަށުން ލިބުނު ފުރުސަތުގައި އެންޒޯ ކުޅެމުން ދަނީ ސްޕެއިން އަށެވެ.