ހައިވޭގެ ޓްރެފިކް ލައިންތައް މިރޭ އައު ކުރަން ފަށަނީ

މާލެ އާއި ހުޅުލެ އަދި ހުޅުމާލެ ގުޅުވައިދޭ ހައިވޭއަކީ އަމާން އަދި ރައްކާތެރި ތަނަކަށް ހެދުމަށް ކުރެވޭ މަސައްކަތުގެ ތެރެއިން، ހައިވޭގެ ޓްރެފިކް ލައިންތައް އައު ކުރުމުގެ މަސައްކަތް މިރޭ ފެށުމަށް ހަމަޖެހިފައިވާ ކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ދިވެހި ފުލުހުންގެ ޚިދުމަތުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައިވާގޮތުން، މި މަސައްކަތް ކުރިއަށްދާނީ ކޮންމެ ރެއަކު 12:00 އިން ހެނދުނު 06:00 އަށެވެ. އަދި މި މަސައްކަތް ކުރިއަށް ގެންދާނީ ހައިވޭ ބަލަހައްޓައި މަރާމާތުކުރުމުގެ ޒިންމާ މީގެ ކުރިންވެސް ހަވާލުކޮށްފައިވާ ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީއިންނެވެ.

މީގެ އިތުރުން ހައިވޭގެ މަސައްކަތްތައް ކުރިއަށްދާނީ ކޯން ޖަހައިގެން ކަމަށާއި، މަސައްކަތް ކުރިއަށްދާ ވަގުތު ހައިވޭ ބަންދު ނުކުރާނެ ކަމަށް ފުލުހުން މައުލޫމާތުދެއެވެ.

ފުލުހުން ވަނީ މި މަސައްކަތް ކުރިއަށްދާ ވަގުތުތަކުގައި ހައިވޭ ބޭނުންކުރާ ފަރާތްތަކުން މިކަމަށް ސަމާލުވުމަށް އިރުޝާދު ދެއްވާފައެވެ. މިއީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް އެޅޭ މުހިންމު ފިޔަވަޅެއްގެ ގޮތުގައި ފުލުހުން ފާހަގަކުރައްވައެވެ.

ހައިވޭ މަރާމާތުކުރުމުގެ މަސައްކަތް ފަށާފައި މިވަނީ، އެ މަގުގެ ތާރުގަނޑުގައި ކުރަހާފައިވާ މަގުމަތީގެ ނިޝާންތައް ވަރަށް ބޮޑަށް ފުހެވި، ދުއްވާ ފަރާތްތަކަށް ދަތިތަކާ ކުރިމަތިވަމުންދާ ދަނޑިވަޅެއްގައެވެ. މީގެ އިތުރުން ހައިވޭގެ ދެ ފަރާތުގައި ޖަހާފައިވާ ދަގަނޑުތަކުގައި ދަބަރު ޖަހައި ވަރަށް ބޮޑަށް ބާވެފައިވާއިރު، އެއާޕޯޓުގެ ފެންސުތައްވެސް ވަނީ ވަރަށް ބޮޑަށް ހަލާކުވެފައެވެ.

މި މަސައްކަތުގެ ސަބަބުން ރޭގަނޑު ވަގުތުތަކުގައި ދަތުރުކުރާ ފަރާތްތަކަށް މަގުމަތީގެ ނިޝާންތައް ސާފުކޮށް ފެންނަން ހުރުމުން އެކްސިޑެންޓްތައް މަދުވުމަށް ބޮޑު އެހީތެރިކަމެއް ލިބިގެންދާނެ ކަމަށް ފުލުހުން ވިދާޅުވެއެވެ.