ކާރިސާތަކާގުޅޭ މަޢުލޫމާތު ބެލެހެއްޓުން ޑިޖިޓަލައިޒްކޮށްފި

ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުން ޑިޖިޓަލްކޮށް، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން، 'ޑެމޭޖް އެސެސްމަންޓް އެންޑް ލޮސް އެނަލިސިސް' (ޑާލާ) ޕޯޓަލް އިފްތިތާހްކޮށްފިއެވެ.

ޑާލާ ޕޯޓަލް އިފްތިތާޙްކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާފައިވަނީ، ދަޚީލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިހުސާންއެވެ. މި ރަސްމިއްޔާތު ދިފާޢީ ވަޒީރު ޣައްސާން މައުމޫން ބައިވެރިވެވަޑައިގެންނެވިއެވެ.

ޔޫއެންޑީޕީގެ ފަންޑިންގް ވިންޑޯގެ ތެރެއިން، ޑެންމާކް ލަގްޒެމްބާގް އަދި ދެކުނު ކޮރެއާގެ އެހީތެރިކަމާއެކު ތަރައްޤީކޮށްފައިވާ ޑާލާ ޕޯޓަލް އެންޑީއެމްއޭގެ މަސައްކަތްތައް ޑިޖިޓަލައިޒްކޮށް ކާރިސާތަކުގެ މައުލޫމާތު އެއްކޮށް ބެލެހެއްޓުމަށް ތަރައްޤީކޮށްފައިވާ ޕޯޓަލްއެކެވެ. މި ޕޯޓަލްގެ ސަބަބުން، މީގެ ކުރިން މެނުއަލްކޮށް ކުރަމުންދިޔަ ކާރިސާތަކުގެ ގެއްލުން ވަޒަންކުރުމުގެ މަސައްކަތް ފަސޭހަ، ރައްކާތެރި އަދި ގުޅިފައިވާ ޑިޖިޓަލް ނިޒާމަކަށް ބަދަލުވެގެންދާނެ ކަމަށް އެންޑީއެމްއޭއިން ވިދާޅުވެއެވެ. އަދި ޕޯޓަލް މެދުވެރިކޮށް އޮންލައިންކޮށް ކާރިސާތަކުގެ މަޢުލޫމާތު ކަމާގުޅޭ މުއައްސަސާތަކަށް ރިޕޯޓުކުރެވޭނެއެވެ. އަދި ލިބުނު ގެއްލުންތަކުގެ ހިސާބުކޮށް ބަދަލު ދިނުމުގެ މަރުހަލާތައް ޕޯޓަލްގެ ތެރެއިން ފުރިހަމަ ކުރެވިގެންދާނެ ކަމަށް އެންޑީއެމްއޭއިން ވިދާޅުވިއެވެ.

ޑާލާ ޕޯޓަލް އިފްތިތާޚް ކުރުމަށް ހޮޓެލް ޖެންގައި ބޭއްވި ރަސްމިއްޔާތުގައި ޕޯޓަލް އިފްތިތާޙްކޮށްދެއްވުމަށްފަހު ވާހަކަ ދައްކަވަމުން ވަޒީރު ޢަލީ އިޙްސާން ވަނީ މި މަސައްކަތަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މޯލްޑިވްސް 2.0 ސިޔާސަތާއި ތެރެއިން ކުރެވިގެންދިޔަ މަސައްކަތެއް ކަމަށެވެ. ވަޒީރު ވިދާޅުވީ ރާއްޖެ ފަދަ ޤައުމަކަށް ވިލުންތެރިކަން ކުރިއެރުވުމަކީ ކޮންމެހެން ކުރަންޖެހޭ ކަމަކަށްވާއިރު، ޑާލާއާއެކު ކާރިސީ ހާލަތުގައި މައުލޫމާތު އެއް މަންސައަކުން ފެނި، އެކަމަށް އަވަހަށް އިޖާބަ ދިނުމަށް މަގުފަހިވާ ކަމަށެވެ. އަދި މިއީ ކަރިސީ ހާލަތުގައި ވަސީލަތްތައް އެންމެ ބޭނުންވާ ސަރަހައްދުތަކަށް އިސްކަންދީގެން ފޯރުކޮށްދިނުމަށް ލިބޭ ވަސީލަތެއް ކަމަށް ވަޒީރު ވިދާޅުވިއެވެ.

"އަޅުގަނޑުމެންގެ ޤައުމީ ނިޒާމުގެ ތެރޭގައި ހަރުދަނާ ނިޒާމެއްގެ ތެރެއިން މައުލޫމާތު އެއްކުރުމާއި އޭގެ ދިރާސީ މަސައްކަތްތައް ކުރުން ހިމެނުމުން، ޑާލާ މެދުވެރުކޮށް ކާރިސާތަކަށް އިޖާބަދިނުމުގެ ބަދަލުގައި އެކަމަށް ތައްޔާރުވާން ފުރުޞަތު ލިބޭ. މިއީ މޯލްޑިވްސް 2.0 އެއް އަސާސް. ދިގުމުއްދަތަކަށް މައުލޫމާތު އެއްކުރެވިފައިވުމަށް ޤައުމީ ތަރައްޤީއަށް ރޭވުމާއި ބަޖެޓުކުރުމަށް މަގުފަހިވެގެންދާނެ. އެހެނަސް ޓެކްނޮލޮޖީން އެކަނި ކަންކަން ހާސިލެއް ނުވާނެ. މި ނިޒާމު ބޭނުން ކުރާ އިދާރާތަކާއި މުޢައްސަސާތަކުގެ ޤަބިލިއްޔަތުކަންވެސް މިކަމަށް އެހީވެދޭނެ" ވަޒީރު ވިދާޅުވިއެވެ.

މިރަސްމިއްޔާތަށް ފަހު މީޑިއާތަކާއި ވާހަކަ ދައްކަވަމުން ޑިޒާސްޓަރ މެނޭޖްމެންޓް އޮތޯރިޓީގެ ޗީފް އެގްޒެކެޓިވް ހިސާން ހަސަން ވިދާޅުވީ، ޑާލާ ޕޯޓަލްއާއެކު އެއިދާރާގެ ހުރިހާ މަސައްކަތެއް ޑިޖިޓަލައިޒް ވެގެންދާ ކަމަށެވެ. ކާރިސާއަކަށް ފަހު މައުލޫމާތު އެއްކޮށް ބަދަލު ދިނުމުގެ ކަންކަން އެ އިދާރާއިން ކުރިއަށްގެންދާއިރު، މި ޕޯޓަލްގެ ތެރެއިން އެ މަސައްކަތް ފަސޭހަ ވެގެންދާނެ ކަމަށް އޭނާ ވިދާޅުވިއެވެ. މީގެ ސަބަބުން ގެއްލުންވި ފަރާތްތަކާއި ކައުންސިލްތަކަށް އަދި ގުޅުންހުރި އިދާރާތަކަށް ހުރިހާ ތަފްސީލެއް އެއްތަނަކުން ފެންނާނެ ކަމަށް ވިދާޅުވިއެވެ.

"މި ސިސްޓަމްގެ ހުރިހާ މަސައްކަތެއް މިހާރު މިހިރީ ނިމިފައި، ހަމަ ފަށަން ތައްޔާރުވެފައި. ރާއްޖޭގެ ރަށްރަށުގައި މި ސިސްޓަމަށް މައުލޫމާތު އަޅާނެ ފަރާތްތަކާއި އަދި އެކި މަރުހަލާގައި މި ސިސްޓަމް ބޭނުންކުރާނެ ފަރާތްތައް ކަނޑައެޅި މިހާރު ވަނީ އެކްސެސްވެސް ދެވިފައި. އެހެންވީމަ ލޯންޗުކުރުމާއެކު މިއަހަރު މި ޕޯޓަލް މެދުވެރިކޮށް ލިބޭ ގެއްލުންތައް ވަޒަންކުރުމާއި އަދި އޭގެ އެހީ ފޯރުކޮށްދިނުމުގެ ހުރިހާ މަރުހަލާއެއް ކުރިއަށްދާނީ" އެންޑީއެމްއޭގެ ޗީފް އެގްޒެކެޓިވް ހިސާން ވިދާޅުވިއެވެ.

މި ނިޒާމު ތަޢާރަފްވުމާއެކު ރައްޔިތުންގެ އިތުބާރު އެންޑީއެމްއޭގެ މަސައްކަތްތަކަށް އިތުރަށް ލިބިގެންދާނެ ކަމަށް ހިސާން ވިދާޅުވިއެވެ. އަދި މިހާރު ޕޯޓަލް ބޭނުން ކުރާނެ ފަރާތްތަކަށް އެކްސެސްދީ ރަށްރަށުން މައުލޫމާތު އެއްކުރެވޭނެގޮތަށް ހުރިހާ މަސައްކަތެއް ނިމިފައިވާ ކަމާށް އެންޑީއެމްއޭއިން ވަނީ ވިދާޅުވެފައެވެ.

އެންޑީއެމްއޭއިން ވަނީ މިހާރު ޕޯޓަލްގެ އާންމުކޮށްފައިވާއިރު މިދިޔަ 5 އަހަރުގެ ކާރިސާތަކުގެ މައުލޫމާތު ޕޯޓަލްއަށް އަދާހަމަކޮށްފައިވާ ކަމަށް ވިދާޅުވެފައެވެ.