ވެނެޒުއެލާގެ ސަރުކާރުން ހައްޔަރު ކޮށްފައި ތިބި ސިޔާސީ ހައްޔަރީންގެ ތެރެއިން އިތުރު 104 މީހުން މިނިވަން ކޮށްފިއެވެ. މި ކަން އިޢުލާނު ކޮށްފައި ވަނީ، އިންސާނީ ޙައްޤުތަކަށް މަސައްކަތް ކުރާ އެ ޤައުމުގެ ޖަމުޢިއްޔާއެއް ކަމުގައިވާ ފޯރޯ ޕެނަލުންނެވެ. އެ ޖަމުޢިއްޔާއިން ބުނީ، ސަރުކާރުން ހައްޔަރު ކޮށްފައި ތިބި ގިނަ އަދަދެއްގެ ސިޔާސީ ހައްޔަރީން މިނިވަން ކުރަން ފަށާފައިވާ ކަމުގައެވެ.
ފޯރޯ ޕެނަލްގެ އިސް އޮފިޝަލެއް ކަމުގައިވާ އަލްފްރޭދޯ ރޮމޭރޯ ވިދާޅުވީ އެ ޤައުމުގެ އެކި ކަންކޮޅުތަކުގައިވާ ޖަލުތަކުގައި ބަންދު ކޮށްފައި ތިބި ސިޔާސީ ހައްޔަރީން މިނިވަން ކުރަން ފަށާފައިވާ ކަމުގައެވެ. "މިނިވަން ކުރަމުންދާ ސިޔާސީ ހައްޔަރީންގެ ނަންތައް ސަރުކާރުން ހާމަކުރުމަކީ އެންމެ އެކަށޭނަ ގޮތް،" އޭނާ ވިދާޅުވިއެވެ.
ސިޔާސީ ހައްޔަރީން މިނިވަން ކުރަން ފަށާފައިވާ ކަން ފުރަތަމަ ހާމަކުރައްވާފައި ވަނީ ވެނެޒުއެލާގެ ވަގުތީ ރައީސް ދެލްސީ ރޮޑްރީގޭޒެވެ. ޖަނަވަރީ 23ވަނަ ދުވަހު މި ކަން އިޢުލާނު ކުރައްވަމުން ރޮޑްރީގޭޒް ވިދާޅުވީ ޖަލުތަކުގައި ބަންދުކޮށްފައި ތިބި ސިޔާސީ ހައްޔަރީންގެ ތެރެއިން 626 މީހުން މިނިވަން ކޮށްފައިވާނެ ކަމުގައެވެ. ނަމަވެސް، އެ މީހުން މިނިވަން ކޮށްފައިވާ ވަގުތާއީ ތާރީޚު، ހާމަކުރައްވާފައެއް ނުވެއެވެ.
ޖަނަވަރީ 8ވަނަ ދުވަހު ވެސް 156 ސިޔާސީ ހައްޔަރީން މިނިވަން ކޮށްފައިވާ ކަން ފޯރޯ ޕެނަލުން ކަށަވަރު ކޮށްދިނެވެ. ރޮޑްރީގޭޒް ވިދާޅުވީ، އޭނާގެ ވަގުތީ ސަރުކާރުން މިނިވަން ކޮށްފައިވާ ސިޔާސީ ހައްޔަރީންގެ ލިސްޓުތައް ކަށަވަރު ކުރުމަށް އެކުވެރި ދައުލަތްތައް (އދ)ގެ އިންސާނީ ޙައްޤުތަކާ ބެހޭ އިދާރާގެ އެހީތެރިކަން ހޯދުމަށް، އެ އިދާރާގެ ވެރިޔާ ފޮލްކަރ ތުރްކާ ފޯނުން ގުޅުއްވައި ވާހަކަފުޅު ދެއްކެވުމަށް ހަމަޖެހިފައިވާ ކަމުގައެވެ.