ޤައުމީ ފުޓްސަލް ޓީމް: ހުރަސްތަކާއި އަޑިގަނޑުތައް ގިރާކޮށް، ރަސްކަމުގެ ތަޚުތަށް

ތެދެކެވެ. ދިވެހިރާއްޖެއަކީ ހިންދު މާ ކަނޑުގައި، ރަން މުތްތަކެއް ހެން އެތުރިފައިވާ ކުޑަ، ޖަޒީރާ ޤައުމެކެވެ.

ފަސް ލައްކައެއްހައި މީހުން ދިރިއުޅޭ ބިން ތިރި، ވަސީލަތް މަދު ގައުމެކެވެ.

ކުރިއަރައި ދާން މާ ގިނަ ފުރުސަތުތަކެއް ނެތްއިރު، ކުރިއަރުވަން މަސައްކަތްކުރާނެ މާ ގިނަ ބަޔަކު ވެސް ތިބި ޤައުމެއް ނޫނެވެ.
ކަން މިހެން އޮތް ނަމަވެސް ތާރީޚު ބުނެދޭ ހަގީގަތެއް އެބައޮތެވެ.

ދިވެހިންނަކީ ކުރާ ކޮންމެ ކަމެއްގައި ވެސް، އެކަމެއްގެ އާޚިރު ނަތީޖާ އުފާވެރިކޮށް، ކާމިޔާބަށް ވާސިލްވުމަށް، ގުދުރަތުގެ ނިޒާމުގެ ތެރެއިނ،ް ﷲ ގެ ރަޙްމަތް ތަނަވަސްވެފައިވާ މިންވަރަކުން، އެ ނިއުމަތެއް، ކާމިޔާބީއެއް، އުފާވެރިކަމެއް، ރަޙްމަތެއް ހޯދަން މަސައްކަތްކުރާ ފަރުދުންތަކެއް ދިރިއުޅޭ ގައުމެއް ކަމެވެ.

ގައުމުގެ މިނިވަންކަމާއި ތޮޅެން އައި ކޮންމެ ބާޤީއަކާއި، ނިޒާމުން އެއްކިބާވި ކޮންމެ ޤާޒީންގެ އިތުރުން، އިޖްތިމާޢީ ހަރަކާތްތަކާއި ކުޅިވަރުގައި ވެސް ދިވެހިން ދެއްކީ މި ފާހަގަކުރި ފަދަ ނަމޫނާ މިސާލެވެ.

ހުރަސްތަކާއި ގޮންޖެހުންތަކާ ދެކޮޅަށް ނުކުމެ، ޤައުމަށް ރީތި ނަން ހޯދައިދިން ދިވެހިންގެ ފަޚުރު، ޤައުމީ ފުޓްސަލް ޓީމް

ރާއްޖޭގައި ފުޓްސަލްއަށް ހިތްދޫވި ކޮންމެ މީހަކަށް ވެސް، މާޒީގައި އޮތީ ހިތްދަތިކަމާއި ވޭނެވެ.

ބަލަދުވެރިއެއް، މަދަދުވެރިއެއް ނެތި، ގިނަ ދުވަސްތަކެއް ހޭދަކުރަން ޖެހުނެވެ.

އެހެންނަމަވެސް، ރަސްމީ ސިފައެއްގައި ރާއްޖޭގައި ފުޓްސަލް ކުޅެން ފެށިފަހުން، ނެތް ހިތްވަރު ނެރެގެން ވެސް މި ކުޅިވަރު ކުރިއަރުވަން މަސައްކަތްކުރި ފަހުލަވާނުންތަކެއް ވެސް މި ދީބު ދެކެފިއެވެ.

މެންދުރުގެ ދިލަ ހޫނުގައި، ފަސްގަނޑަށް އަމިއްލައަށް ފެންޖަހައި، ކަޅުތެލުން ލައިނު ކުރަހައި ޕިޗު ތައްޔާރުކުރަން ފަރުދުންތަކެއް ކުރި މަސައްކަތް ދެކެ، އެކަމަށް ހެކިވާނެ އެތައް ބަޔަކު ތިބޭނެއެވެ. ވިއްސި ވިހާލިވަމުންދިޔަ ދިވެހި ފުޓްސަލް ކޮމިއުނިޓީ، އެކި ނަންނަމުގައި މުބާރާތްތައް ބާއްވައިގެން ބަދަހިކުރި "ހީރޯ" އިންނަކީ މިއަދު މި ލިބުނު ކާމިޔާބީގައި ބޮޑު ޝުކުރެއް އަދާކުރާންޖެހޭނެ ބައެކެވެ.

އެތަކެއް ތުރާލެއް ކުރިމަތިކުރުވުމުން ވެސް ފަހަތަށް ނުޖެހި، ދެއްކި ސާބިތުކަމުގެ ސަބަބުން މިއަދު، ދެކުނު އޭޝިއާ ސަރަހައްދުގައި ރާއްޖެ މިވަނީ ފުޓްސަލްގެ "ސުޕާ ޕަވާ" އަށް ވެފައެވެ. ހަގީގަތަށް ބުނާނަމަ ސަރަހައްދީ ފުޓްސަލްގެ ތަޚުތަށް ރާއްޖެއިން އިސްވެ، ހަމަޖެހިލާފައި މިވަނީ ވާދަވެރިއަކު ވެސް، ދެކޮޅުވެރިއަކު ވެސް ނެތިއެވެ.

އެކި ގޮތްގޮތުން ރާއްޖެއަށް ވުރެ އެތައް ގުނައެއް ކުރިއަރާފައިވާ ޤައުމުތަކުން، ފުޓްސަލްގައި ރާއްޖެ ކުރިމަތީގައި އަމާންދީ، ސެލިއުޓް ކުރަނީ، މިއީ ހަގީގަތުގައި ވެސް މި ސަރަހައްދުގެ ފުޓްސަލް ރަސްގެފާނަށް ވީތީއެވެ.

ޤައުމީ ފުޓްސަލް ޓީމް

ތާރީޚާއި ރެކޯޑުތަކުން ފެންނަން އޮތް ގޮތުގައި ރާއްޖޭގައި ފުޓްސަލްގެ ޤައުމީ ޓީމެއް އެކުލަވާލައި، ބައިނަލްއަގްވާމީ މުބާރާތެއްގައި ވާދަކޮށްފައި ވަނީ 2004 ވަނަ އަހަރުގެ އޭޕްރިލް މަހުއެވެ.

އޭއެފްސީ ފުޓްސަލް ޗެމްޕިއަންޝިޕްގައި އެ ފަހަރު ކުޅުނު ތިން މެޗުން ވެސް ބޮޑު ފަރަގަކުން ރާއްޖެ ވަނީ ބަލިވެފައެވެ.

މަކާއޯގައި ކުޅުނު އެ މުބާރާތުގައި ކުވެއިތު އަތުން 0-20 އިން، ސައުތު ކޮރެއާ އަތުން 3-23 އިން އަދި ޓައިވާން އަތުން 2-11 އިން ރާއްޖެ ބަލިވިއެވެ.

އެފަހުން ސާފް ފުޓްސަލް ޗެމްޕިއަންޝިޕާ ހަމައަށް ބައިނަލްއަގްވާމީ 31 މެޗު ރާއްޖެއިން ކުޅެފައިވެއެވެ. އޭގެ ތެރެއިން 30 މެޗުން ރާއްޖެ ބަލިވެފައިވާއިރު މޮޅެއް ހޯދިފައި ވަނީ މޮންގޯލިއާ އާ ދެކޮޅަށް 2022 ވަނަ އަހަރު ކުޅުނު މެޗެއްގައެވެ. ފާޙަގަކޮށްލަން ޖެހޭ ކަމަކީ އެ މެޗުގައި ކުޅެ، ޕެނަލްޓީ ޝޫޓްއައުޓުގައި ލަނޑު ޖެހި ތިން ކުޅުންތެރިން، މިއަދު މި ހޯދި ކާމިޔާބީގައި ވެސް ބޮޑު ދައުރެއް އަދާކޮށްފައިވާ ކަމެވެ.

އެއީ ކެޕްޓަން މުޙައްމަދު އިމްރާން (އިންމި) އާއި އިޝާން އިބްރާޙީމް (ސައްޓު) ގެ އިތުރުން ހުސެއިން ޝަރީފް (އޮންލީ) އެވެ.

ފާއިތުވީ ދެ ދަހަރެއްހައި (20 އަހަރު) ދުވަހުގެ ތެރޭގައި ރާއްޖެއިން ކުޅުނު 30 މެޗުން ބަލިވި ނަމަވެސް، މެޗަކަށްފަހު މެޗެއް ރާއްޖެއިން އައީ ކުރިއެރުންތަކެއް ހޯދަމުންނެވެ. ފަރަގު ކުޑަކޮށް، ތަޖުރިބާއާއި ކުރިއެރުންތަކެއް ވެސް ހޯދަމުންނެވެ. ބަޔަކު މަލާމަތް ކުރަމުން ވެސް ދިޔައެވެ. ރާއްޖެއިން ހޯދާނީ ހަމައެކަނި ތަޖުރިބާއާއި ތަމްރީނުކަމަށް ބުނެއެވެ. ނަތީޖާއެއް ނުހޯދޭނެކަމަށް ބުނެއެވެ.

އެހެންނަމަވެސް އޭރު ފުރައްސާރަކުރި ދޫތަކުން، މިއަދު އިވެމުންދަނީ "އަލްޙަމްދުﷲ އޭ، އަހަރުމެން ތަށި ނަގައިފިޔޭ" ބުނެ ތަޢުރީފުގެ ބަސްތައް ބުނާ އަޑެވެ.

ސާފް ފުޓްސަލް ޗެމްޕިއަންޝިޕް 2026 - ތައްޔާރީތައް

ޑިސެމްބަރު މަހުގެ ތިންވަނަ ދުވަސްވީ ދިވެހި ފުޓްސަލް ކޮމިއުނިޓީއަށް އުފާވެރި ދުވަހަކަށެވެ. ފުރަތަމަ ފަހަރަށް، ތަޖުރިބާކާރު ބިދޭސީ ކޯޗެއްގެ އިރުޝާދުގެ ދަށުން ތަމްރީނުވުމަށް ފުރުސަތު ލިބުނު ދުވަހަށެވެ.

ސާފް ފުޓްސަލް ޗެމްޕިއަންޝިޕަށް ރާއްޖެ ތައްޔާރުކޮށް، ތަށި ހޯދައިދިނުމުގެ އެންމެ މުހިންމު ޒިންމާ، އެފްއޭއެމް އިން ހަވާލުކުރީ އުޒްބެކިސްތާނުގެ ފާރޫކް ޒަކިރޯވްއެވެ.

ކޯޗު ފާރޫކްގެ އިރުޝާދުގެ ދަށުން އެންމެފުރަތަމަ ފަރިތަކުރުންތައް ކުރިއަށް ގެންދިޔައީ 40 ކުޅުންތެރިންގެ ވަގުތީ ސްކޮޑަކާ އެކުއެވެ. އެއަށްފަހު 25 ކުޅުންތެރިންނަށް ސްކޮޑު ކުޑަކުރިއެވެ. އަދި 18 އަށްވެސް ކުޑަކުރިއެވެ. ތަޖުރިބާކާރު، ފުޓްސަލްގެ ބައެއް ނަންތައް ޓީމު ލިސްޓުން އުނިކުރުމަށްފަހުއެވެ.

މިއާއެކު ކޯޗަށް ފާޑުކިޔުންތަކެއް ވެސް އަމާޒުވިއެވެ. އެހެންނަމަވެސް އެ ފާޑުކިޔުންތަކަށް ބެލުމެއް ނެތި ކޯޗުގެ ވިސްނުން ހުރީ ތަށްޓާ ދިމާލަށެވެ.

18 ކުޅުންތެރިންނާއެކު ޤައުމީ ޓީމުން ދެން ފެށީ، ކާމިޔާބީއަށް ވާސިލްވުމުގައި މުހިންމު ދައުރެއް އަދާކުރި މަންޒިލަކަށެވެ.

ޗައިނާގައި، އިންޑޯ ޕިޗެއްގައި ފަރިތަކުރުންތައް ކުރިއަށް ގެންގޮސް، ތަމްރީނުގެ ބޭނުމަށް އެކުވެރިކަމުގެ މެޗުތަކެއް ވެސް ކުޅުނެވެ.

މިއަދު ހުރިހާ ކުޅުންތެރިންވެސް، ކޯޗިން ޓީމުން ވެސް ފާހަގަކުރަނީ، އަދި ޝުކުރުވެރިވަނީ، ޗައިނާގައި ތަމްރީނުތައް ކުރުމަށް ލިބުނު ފުރުސަތަށެވެ.

ޗައިނާ ކޭމްޕަށްފަހު ރާއްޖެއިން، 14 ކުޅުންތެރިންނަށް ސްކޮޑު ކުޑަކުރުމަށްފަހު ދިވެހި ޓީމުން ތައިލެންޑަށް ފުރީއެވެ.

ސާފް ފުޓްސަލް ޗެމްޕިއަންޝިޕް 2026 - ރަން ކާމިޔާބީ ހޯދުން

މުބާރާތަށް ނުކުތްއިރު ވެސް ރާއްޖެ ހިމެނުނީ، ފުރަތަމަ މުބާރާތުގެ ތަށި ހޯދާނެކަމަށް ބެލެވުނު ޓީމުތަކުގެ ތެރޭގައެވެ.

ސަބަބެއް ނެތިއެއް ނޫނެވެ. ރާއްޖޭގައި ފުޓްސަލް މަގުބޫލުވެފައިވާ މިންވަރުންނާއި، ކުޅެފައިވާ މެޗުތައް ގިނަވުމާއި، ހުނަރުވެރި ކުޅުންތެރިންގެ ސަބަބުންނެވެ.

ރާއްޖެއިން ކުޅުނު ފުރަތަމަ މެޗާއެކު، މި ތަށި ރާއްޖެއިން ނަގާނެކަމަށް ގަބޫލުކުރެވުނު ގަބޫލުކުރުމަށް އިތުރު ބާރެއް ލިބުނެވެ.

ފުރަތަމަ މެޗުގައި ރާއްޖެއިން ޕާކިސްތާނުގެ މައްޗަށް 1-7 އިން ކުރިހޯދިއެވެ. ދެވަނަ މެޗުގައި ބަންގްލަދޭޝްގެ މައްޗަށް 1-6 އިން ކުރިހޯދިއިރު، ތިންވަނަ މެޗު ނިންމާލީ އިންޑިއާ ކޮޅަށް ފަސް ލަނޑު ޖަހައިގެންނެވެ. ރާއްޖެ ކޮޅަށް އިންޑިއާއަށް އެންމެ ލަނޑެއް ވެސް ނުޖެހުނެވެ. ހަތަރުވަނަ މެޗުގައި ނޭޕާލް ވެސް ރާއްޖެ އަތުން ބަލިވިއިރު، ފަސްވަން މެޗުގައި ބޫޓާނަށް ވެސް ރާއްޖޭގެ ވިދުން ފަނޑުކޮށް ނުލެވުނެވެ.

ބޫޓާން އަތުން ރާއްޖެ މޮޅުވިއިރު، މެޗުން ހޯދި މޮޅާއެކު ރާއްޖެއިން ވަނީ މުބާރާތުގެ ޗެމްޕިއަންކަން ޔަގީންވެފައެވެ. ލަންކާއާ ދެކޮޅަށް މެޗެއް ކުޅެން އޮއްވައެވެ.

މި އެޅުނީ ބިންގާ. ދެން އޮތީ ބުރަ މަސައްކަތް

ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕް ރާއްޖެއިން ކާމިޔާބުކޮށް، ސަރަހައްދީ ފުޓްސަލްގައި ރާއްޖެއިން ސިއްކަ ޖަހައި، ތާރީޚުގައި ރަން އަކުރުން ނަން ފަވާލިއިރު، ޓީމާމެދު ދިވެހިންނަށް ކުރެވޭ އުއްމީދުތައް ވަނީ ބޮޑުވެފައެވެ.

ދިވެހިންނަކީ ހޯދާ ކޮންމެ ކާމިޔާބީއަކާއެކު، އިތުރު ކާމިޔާބީތަކަށް، ކުރިއެރުންތަކަށް އެދޭ ބައެކެވެ.

ކަން މިހެން އޮތުމާއެކު، ކުރަންޖެހޭ މަސައްކަތް މިވަނީ އިތުރުވެފައެވެ. ހަމައެކަނި ކުޅުންތެރިންނާއި ކޯޗުންނެއް ނޫނެވެ. ބެލެނިވެރި އެސޯސިއޭޝަންގެ މަސައްކަތާއި ސަރުކާރުން އަދާކުރަންޖެހޭ ޒިންމާ ވެސް މެއެވެ.

ސަރުކާރާއި އެފްއޭއެމުން ވެސް ވަނީ، މި މަސައްކަތުގައި ފަހަތަށް ނުޖެހި، ބޭނުންވާ ވަސީލަތްތަކާއި ފުރުސަތުތައް ހޯދައިދޭނެކަމުގެ ޔަގީންކަން ދީފައެވެ.