ދިހަ އަހަރުދުވަހުގެ މެދު ކެނޑުމަކަށްފަހު އަލުން ފަށާ އެފްއޭއެމް އަންހެނުންގެ ލީގުގެ ސަބަބުން މޮޅެތި ކުޅުންތެރިންތަކެއް ފާހަގަވެގެންދާނެކަމަށާ، ލީގަށްފަހު ގިނަ އަދަދެއްގެ ކުޅުންތެރިންތަކެއް ގައުމީ ޓީމާ ގުޅޭނެކަމަށް ގަބޫލުކުރާކަމަށް ވިކްޓްރީ ސްޕޯޓްސް ކުލަބުގެ ކޯޗު އާމިނަތު ޝިޔާނާ ބުނެފިއެވެ.
ޝިޔާނާ ބުނީ އަންހެނުންގެ މެދުގައި ފުޓުބޯޅައަށް ޝައުޤުވެރިކަން އޮންނަކަމަށް އެއްބަޔަކު ގަބޫލުނުކުރިކަމަށްވިޔަސް މި ކުޅިވަރަކީ އަންހެނުންގެ މެދުގައި މަގުބޫލު ކުޅިވަރެއްކަމަށެވެ. އަތޮޅު ތެރޭގައިވެސް ފުޓްސެލް އަފި ފުޓްބޯޅަ ކުޅޭ ހުނަރުވެރި އަންހެނުން ތިބިކަމަށް އޭނާ ފާހަގަކުރިއެވެ. އެގޮތުން ފިރިހެނުން ހަރަކާތްތެރިވާ ކުލަބުތަކުން އިސްނަގައިގެން އަންހެނުންނަށް ޚާއްސަ މުބާރާތްތައްވެސް ބޭއްވެމުން އަންނަކަމަށް އޭނާ ބުނެފަވެއެވެ.
"ކުރީގަ ބުނޭ އަންހެންކުދިން ފުޓްބޯޅައެއް ނުކުޅޭނެއޭ. މިސާލަކަށް މިމުބާރާތް ބާއްވަންވެސް ބުނީމަ ގިނަ މީހުން ބުނީ އަންހެން ކުދިން ކޮބާހޭ އަންހެން ކުދިން ފުޓްބޯޅަައެއް ނުކުޅޭނޭ. އެކަމު އަޅުގަނޑު ބުނާނީ އަންހެންކުދިން ރާއްޖޭގަ ފުޓްބޯޅަ ކުޅެޔޭ. ރާއްޖެތެރޭ ރަށްރަށަށް ބަލާލިކަމަށްވިޔަސް ފުޓްސަލް، ފުޓްބޯޅަ މުބާރާތްތައް ކުދިކުދި ރަށްރަށުގަ ފިރިހެންކުދިން އިސްނަގައިގެން އެކުދިންނަށް ފުރުސަތު ދީގެން މުބާރާތްތައް ބާއްވަމުން އަންނަނީ" ޝިޔާނާ ބުންޏެވެ.
ރާއްޖޭގެ އަންހެނުންގެ މެދުގައި ފުޓްބޯޅައަކީ މަގުބޫލު ކުޅިވަރެއްކަމަށް އޭނާ ފާހަގަކުރިއެވެ. މީގެ ކުރިން އަންހެނުންނަށް މިކުޅިވަރުގައި ހަރަކާތްތެރިވުމުގެ ފުރުސަތު މާބޮޑަށް ލިބިފަ ނެތުމަކީ ހުނަރުވެރި ކުޅުންތެރިން ފާހަގަނުކުރެވުނު ސަބަބުކަމަށް އޭނާ ބުންޏެވެ. އެހެންކަމުން އެފްއޭއެމްއިން އަންހެނުންގެ މުބާރާތްތައް ބޭއްވުމަށް އެޅި މި ފިޔަވަޅަކީ މުސްތަގުބަލަށް ގިނަ ފައިދާތަކެއް ކުރާނެކަމެއްކަމަށް އޭނާ ހާމަކުރިއެވެ.
"އަޅުގަނޑު ވަރަށް ހިތްހަމަޖެހޭ ފަހުން އެއައި ރައީސް ޓޮމް (ޠާރިޤް) އަންހެންކުދިންނަށް އެފްއޭއެމްގެ މިކަހަލަ ދަނޑިވަޅެއްގަ ފުރުސަތު ދިނީމަ ވަރަށް ވަރަށް އުފާވޭ" ޝިޔާނާ ބުނެފަވެއެވެ.
ޝިޔާނާ މި ލީގު ސިފަކޮށްފަވަނީ އަންހެނުންގެ ފުޓްބޯޅައަށް އަލުން ދިރުން ގެނުވާނެ ފެށުމެއްގެ ގޮތުގައެވެ. މި ލީގުގެ ތެރެއިން އަންހެނުންގެ ގައުމީ ފުޓްބޯޅަ ޓީމާ ޒުވާން ހުނަރުވެރި ކުޅުންތެރިންތަކެއް ގުޅޭނެކަމަށް ގަބޫލުކުރާކަމަށް އޭނާ ފާހަގަކުރިއެވެ.
"އަޅުގަނޑަށް ހީވަނީ ކުރިއަށް އޮތްތާނގަ މިއީ ސްޓާޓިންއެއް ކަންނޭނގެ. މީގެ ތެރެއިން އަޅުގަނޑަށް ހީވަނީ އަންހެން ގައުމީ ފުޓްބޯޅަ ޓީމަށް ހަމަ ވަރަށް ރަނގަޅު ޔަންގު ޕްލެޔާރސް އެބަތިބި. ޔަގީން ހަމަ ގައިމުވެސް އަންހެން ފުޓްބޯޅަ ޓީމަށް ނަގާލެވޭނެ ވަރަށް ރަނގަޅު ޕްލެޔާރސް އެތަބިތި މި ލީގުގަ" ޝިޔާނާ ބުންޏެވެ.
ވިމެންސް ލީގު މާދަމާ ފަށާނީ ވިކްޓްރީ ސްޕޯޓްސް ކްލަބާއި ޓީސީ ސްޕޯޓްސް ކްލަބް ބައްދަލުކުރާ މެޗުންނެވެ.