ސްރީ ލަންކާއަށް އަދިވެސް މޫސުން ގޯސް، މަދަރުސާތަކާއި ރަސްމީ އިދާރާތައް ބަންދު

ބާރުގަދަ ތޫފާނެއް ކަމުގައިވާ ދިތުވާއާ ގުޅިގެން ސްރީ ލަންކާއަށް ކުރަމުންދާ ވިއްސާރައިގައި ކުރިއަށް އޮތް ދުވަސްތަކުގައި ވެސް ވައި ބާރުވެ، އިތުރަށް ވާރޭ ވެހި، ފެންބޮޑުވުމުގެ ޙާދިޘާތައް ކުރިމަތިވާނެ ކަމުގެ އިންޒާރު މޫސުން ލަފާ ކުރާ އިދާރާތަކުން ކޮށްފިއެވެ. ކުރިއަށް އޮތް 12ވަރަކަށް ގަޑިއިރުގެ ތެރޭގައި ވެސް ސްރީ ލަންކާގެ އުތުރުގެ ސަރަޙައްދުތަކަށް ބޯކޮށް ވާރޭވެހޭނެ ކަމުގައި މޫސުމާ ބެހޭ އިދާރާތަކުން ލަފާ ކޮށްފައިވާއިރު، ތޫފާނާގެ ސަބަބުން އެކި ސަރަޙައްދުތަކުގައި ފެންބޮޑުވުމާ ގުޅިގެން މަރުވި މީހުންގެ އަދަދު ވަނީ 69ށް އުފުލިފައެވެ.

އެންމެ ގިނަ އަދަދެއްގެ ބަޔަކު މަރުވެފައި ވަނީ މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން ހިނގި ބިންގަނޑު ކެނޑުމުގެ ހާދިސާތަކުގައެވެ. އެ ފަދަ ގިނަ ހާދިސާތައް ހިނގާފައި ވަނީ އެ ޤައުމުގެ އިރުމައްޗާއި މެދުތެރޭގެ ސަރަޙައްދުތަކުގައެވެ. ބާރުވަޔާ އެކު ކުރަމުންދާ ބޯ ވިއްސާރައިގެ ސަބަބުން ފެންބޮޑުވުމާ ގުޅިގެން ހިނގި ހާދިސާތަކުގައި 34 މީހަކު ގެއްލިފައިވާ ކަމަށާއި، އެ މީހުން ހޯދުމަށް މަސައްކަތް ކުރަމުންދާ ކަމުގައި ސްރީ ލަންކާގެ ކަމާ ގުޅޭ އިދާރާތަކުން ހާމަކުރިއެވެ.

މޫސުން އިތުރަށް ގޯސްވާނެ ކަމަށް މޫސުމާ ބެހޭ އިދާރާތަކުން ލަފާކުރުމާ އެކު، ސްރީ ލަންކާގެ ސަރުކާރުން ވަނީ ސަރުކާރު އޮފީސްތަކާއި މަދަރުސާތައް ބަންދު ކޮށްފައެވެ. އަދި، ރޭލު ދަތުރުފަތުރުގެ ޚިދުމަތް މެދުކަނޑައިލާފައިވާއިރު ހިއްސާގެ ބާޒާރު ވެސް ވަނީ ބަންދު ކޮށްފައެވެ. ވައި ބާރުވުމާ ގުޅިގެން ވެރިރަށް ކޮލަމްބޯގެ މައި ބަންޑާރަނަޔަކަ ވައިގެ ބަނދަރަށް ދަތުރު ކުރަމުން ދިޔަ ގިނަ އަދަދެއްގެ މަތިންދާބޯޓު ވެސް ޑައިވަރޓު ކުރަން ޖެހުނެވެ.

ސްރީ ލަންކާގެ ކާރިސާތަކާ ބެހޭ އިދާރާއިން ބުނީ، ފެންބޮޑުވުމާ ގުޅިގެން 44,000ށްވުރެ ގިނަ މީހުންނަށް އަސަރު ކޮށްފައިވާ ކަމުގައެވެ. އަދި، އޭގެ ތެރެއިން ގިނަ އަދަދެއްގެ ބަޔެއްގެ ގެދޮރަށް ފެންވަނުމާ އެކު، އެ މީހުން މަދަރުސާތަކާއި ވަގުތީ ހިޔާތަކަށް ބަދަލު ކޮށްފައިވާ ކަމުގައެވެ. ސްރީ ލަންކާގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ބޭރު ޤައުމުތަކާއި ބައިނަލްއަޤްވާމީ ޖަމުޢިއްޔާތަކުން ދަނީ މަސައްކަތް ކުރަމުންނެވެ. މި ގޮތުން، އިންޑިޔާއިން ވަނީ 6.5 ޓަނުގެ ކާބޯތަކެތި ފޮނުވާފައެވެ. ހާލުގައި ޖެހި، ގެދޮރުގައި ތާށިވެފައިވާ މީހުން ސަލާމަތް ކުރުމަށް 20,000އެއްހާ ސިފައިންނާއި ފުލުހުން ހަރަކާތްތެރިވަމުންދާ ކަމުގައި ސްރީ ލަންކާގެ އިދާރާތަކުން ހާމަކުރިއެވެ.