ޔޫޓިލިޓީ ޚިދުމަތްތައް މެދުނުކެނޑި ދިނުމަށް ހަރުދަނާ ނިޒާމެއް ޤާއިމުކުރަނީ

ރަށްރަށުގެ ޔޫޓިލިޓީގެ ޚިދުމަތްތައް މެދުކެނޑުމުގެ މައްސަލަ ހައްލުކުރުމަށް، ރިއަލް ޓައިމްގައި މޮނީޓަރ ކުރެވޭނެ ނިޒާމެއް ޤާއިމުކުރަންޖެހޭކަމަށާއި ފެނަކައިން އެމަސައްކަތް ފަށާފައިވާކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ނަޖާޙް ވިދާޅުވެއްޖެއެވެ. ނަޖާޙް ވިދާޅުވީ ރާއްޖޭގައި ޔޫޓިލިޓީގެ ދާއިރާއިން ދުރުރާސްތާގެ ޕްލޭނެއްވެސް މިހާތަނަށް ހެދިފައި ނުވާކަމަށެވެ.

ރަށްރަށުގައި ކަރަންޓު ކެނޑުމުގެ މައްސަލަ ދޭތެރެ ދޭތެރެއިން ބޮޑުވުމުގެ ކަންބޮޑުވުން ރައްޔިތުންގެ އޮވެއެވެ. އަސާސީ ޚިދުމަތެއްނަމަވެސް ބައެއް ސަރަޙައްދުތަކުގައި މިމައްސަލަ އާންމުކޮށް ދިމާވަމުންދާއިރު މިކަމަށް ކޮންމެހެންވެސް ހައްލެއްވަނީ ގެންނަންޖެހިފައެވެ. ޕީއެސްއެމްނިއުސްގެ "ހަފްތާ 104" ޕްރޮގްރާމްގައި ވާހަކަދައްކަވަމުން ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ނަޖާޙް ވިދާޅުވީ، ޔޫޓިލިޓީގެ ޚިދުމަތް ދިނުމުގައި ޢަމަލުކުރާނެގޮތުގެ ދުރުރާސްތާ ޕްލޭނެއް ރާއްޖޭގައި މީގެކުރިން ހަދާފައިނުވާކަމަށެވެ. އަދި ރަށްރަށުގެ ކަރަންޓު ކެނޑުމުގެ މައްސަލަ ހައްލުކުރުމަށް ރިއަލްޓައިމްކޮށް ޚިދުމަތްތަކުގެ މަޢުލޫމާތު ބެލެހެއްޓޭނެ ނިޒާމެއް ޤާއިމުކުރަންޖެހޭކަމަށެވެ.

"ޔޫޓިލިޓީގެ ޚިދުމަތްތައް، ދިނުމުގައި ދުރުރާސްތާއަށް ބަލާއިރު ރިއަލްޓައިމްކޮށް މޮނީޓަރކުރުމަކީ ވަރަށް މުހިއްމުކަމެއް. އަޅުގަނޑުމެންވެސް އެންމެ ކޮންސަރންވާ އެއްކަންތައް މިއީ ރަށްރަށުން ކަރަންޓު ކެނޑުން، ފެން ކެނޑުން، މިކަހަލަ ކަންތައްތައް ކުރިއަށް އޮތްތަނުގައި އެވޮއިޑްކުރެވޭނީ އެކަންކަމަށް އަޅުގަނޑުމެނަށް ފާރަވެރިވެގެން. އެހެންކަމުން ރިއަލްޓައިމްގައި މޮނީޓަރކުރެވޭނެ ނިޒާމެއް އެބަ ޤާއިމުކުރަންޖެހޭ." ނަޖާޙް ވިދާޅުވިއެވެ.

ކަރަންޓާއި ފެން ކެނޑުމުގެ މައްސަލަ ހައްލުކުރުމަށް ވަގުތުން ވަގުތަށް ޚިދުމަތުގެ މަޢުލޫމާތު މައި މަރުކަޒަށް ލިބޭނެ ފަދަ ނިޒާމެއް ޤާއިމުކުރެވުމުން މައްސަލަތައް ދިމާވެ ޚިދުމަތް މެދު ކެނޑުމުގެ ކުރިން، ދުރާލާ އެކަމަށް ފިޔަވަޅުތަކެއް އެޅޭނެކަމަށް ފެނަކައިން ވިދާޅުވެއެވެ. މީގެ އިތުރުން ތެލަށް ކުރާ ހޭދަ ކުޑަކުރުމަށް، ހަރުދަނާ ނިޒާމެއްގެ ތެރެއިން ތެޔޮ ބޭނުންކުރަމުންދާގޮތް ދެނެގަނެ، ދެމެހެއްޓެނިވި ފިޔަވަޅުތަކެއް އެޅުމަށްވެސް ފެނަކައިންވަނީ ނިންމާފައެވެ. ހަމައެއާއެކު ތެލަށް ކުރާ ހޭދަކުޑަކުރުމަށް، އިޔާދަކުރަނިވި ހަކަތަ ޤާއިމުކުރުމަށް ކުރާ މަސައްކަތް އިތުރުކުރުމަށްވެސް ފެނަކައިންދަނީ މަސައްކަތް ކުރަމުންނެވެ.

ފެނަކައިންދަނީ އަތޮޅުތަކުގެ 157 ރަށަކަށް ކަރަންޓުގެ ޚިދުމަތް ފޯރުކޮށްދެމުންނެވެ. ރަށްރަށުގެ ކަރަންޓުގެ ޚިދުމަތް މެދުނުކެނޑި ދެވޭނެ ނިޒާމެއް ޤާއިމުކުރުމަށް ކުރަމުންދާ މަސައްކަތުގެ ދަށުން މިވޭތުވެދިޔަ 2 އަހަރުގެ ތެރޭގައި 90 އަށްވުރެ ގިނަ ޖެނެރޭޓަރުވަނީ ރަށްރަށަށް ފޮނުވާފައެވެ.