މުހިންމު މައްސަލަތަކާއި ގޮންޖެހުންތަކަށް ހައްލު ހޯދުމަށް "ކާފު ފޯރަމް" ފަށައިފި

ކ. އަތޮޅުގެ ރަށްރަށަށް ދިމާވާ މުހިންމު މައްސަލަތަކާއި ގޮންޖެހުންތަކަށް ހައްލުހޯދާ މަޝްވަރާކުރުމަށް "ކާފު ފޯރަމް" ފަށައިފިއެވެ.

ކާފު ފޯރަމް ފެށުމުގެ ރަސްމިއްޔާތު ޝަރަފުވެރިކޮށްދެއްވީ ސިޓީތަކާއި އިދާރީ ދާއިރާތައް ހިނގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރުއެވެ. މި ފޯރަމަކީ މާލެއަތޮޅު އަތޮޅު ކައުންސިލުން އިސްނަގައިގެން ކުރިއަށްގެންދާ ފޯރަމްއެވެ. 4 ދުވަހަށް ތުލުސްދޫގައި ކުރިއަށް ދާ މި ފޯރަމްގައި މާލެއަތޮޅު އަތޮޅު ކައުންސިލްގެ މެމްބަރުންނާއި، ކައުންސިލްތަކުގެ ސެކްރެޓަރީ ޖެނެރަލް އިންނާއި، ޑަބްލިޔު ޑީ.ސީ މެމްބަރުންނާއި، ކައުންސިލް މެމްބަރުންނާއި، މާލެއަތޮޅު ސިއްހީމަރުކަޒުގެ އިސްވެރިން ބައިވެރިވެއެވެ.

ކާފު ފޯރަމަކީ، މާލެ އަތޮޅުގެ ރަށްރަށަށް ދިމާވާ މައްސަލަތަކާއި، އަދި އަތޮޅު ފެންވަރުގައި ކުރިމަތިވެފައިވާ ގޮންޖެހުންތައް ދެނެގަނެ، އެކަންކަމަށް ދެމެހެއްޓެނިވި ހައްލުތަކެއް ހޯދުމަށް މަސައްކަތްކުރުމަށް ކުރިއަށްގެންދެވޭ ފޯރަމެކެވެ. މީގެ އިތުރުން، އަތޮޅުގެ ރަށްރަށުގެ ކައުންސިލްތަކާއި، މާލެއަތޮޅު އަތޮޅު ކައުންސިލާއި، ސަރުކާރުގެ ކަމާބެހޭ މުއައްސަސާތައް ގުޅިގެން، ރައްޔިތުންނަށް އެންމެ ފައިދާހުރި ގޮތަކަށް ޚިދުމަތް ދެވޭނެ މަގުތަކާ ގުޅޭގޮތުން މިފޯރަމްގެތެރެއިން މަޝްވަރާކުރެވިގެންދާނެވެ.

މި ރަސްމިއްޔާތުގައި ވާހަކަދައްކަމުން މާލެއަތޮޅު އަތޮޅު ކައުންސިލްގެ ރައީސް، އަޚްމަދު އަނީސް ވިދާޅުވީ މި ފޯރަމަކީ މާލެ އަތޮޅުގެ ރަށްތަކަށް ވަރަށް މުހިންމު ފޯރަމެއްކަަމަށެވެ. އެގޮތުން ކައުންސިލްތައް ހިނގުމަށް ބޭނުންވާ ދާއިރާތަކުން މަޝްވަރާކުރުމަށް އިސްކަންދީފައިވާނެކަމަށް ވިދާޅުވިއެވެ.

"ފޯރަމްގައި އަޅުގަނޑުމެން ކޮށްދޭން މިއުޅޭކަމަކީ މި ދާއިރާތަކުން ކައުންސިލްތަަކަށް ދާންވި މަގުތައް އަނގައިދިނުން. އަޅުގަނޑަށް ޔަގީން މި ބާއްވާ ޕެނަލް ޑިސްކަޝަންތަކުގައި އެކަން ވަރަށް ބޮޑައް ސާފުވާނެކަމަށް" އަޚްމަދު އަނީސް ވިދާޅުވިއެވެ.

މި ފޯރަމްގައި މުހިންމު ގިނަ ދާއިރާތަކަކުން ޕެނަލް ޑިސްކަޝަންތައް ކުރިއަށް ދާނެއެވެ. އެގޮތުން ޕެނަލިސްޓުންގެ ގޮތުގައި ދައުލަތުގެ މުހިންމު މުއައްސަސާތައް ބައިވެރިވެއެވެ. އޭގެ ތެރޭގައި ސިޓީތަކާއި އިދާރީ ދާއިރާތައް ހިނގުމާއި އާންމު މަސައްކަތްތަކާއި ބެހޭ ވުޒާރާ، ތައުލީމީ ވުޒާރާ، ޞިއްޙީ ވުޒާރާ އަދި ލޯކަލް ގަވަރމަންޓް އޮތޯރިޓީ ހިމެނެއެވެ. މީގެ އިތުރުން ދަނޑުވެރިކަމާއި ދިރޭތަކެއްޗާ ބެހޭ ވުޒާރާ އަދި މޯލްޑިވްސް ބިޒްނަސް ކޯރޕަރޭޝަން ހިމެނެއެވެ.

އިދާރީ ހިންގުމުގައި ދިމާވާ ދަތިތަކާއި އެކަންކަން ހައްލުކުރެވޭނެ ގޮތްތައް ތަރައްޤީގެ މަޝްރޫއުތައް ކުރިއަށް ގެންދިޔުމަށް ބޭނުންވާ އުކުޅުތަކާއި ގޮތްތައް ހައިޑްރޮފޯނިކްސް - ޒަމާނީ ދަނޑުވެރިކަން ކައުންސިލްތަކާއި ލޯކަލް އޮތޯރިޓީ ކުންފުނިތަކުން އާމްދަނީ އިތުރުކުރެވޭނެ ފިޔަފާރި މޮޑެލްތައް މާލެއަތޮޅުގެ ތައުލީމީ ދާއިރާގައި ހުރި ގޮންޖެހުންތަކާއި އެކަންކަމުގެ ހައްލު ހޯދާނެގޮތްތައް މާލެއަތޮޅުގެ ސިއްހީ ދާއިރާގައި ހުރިގޮންޖެހުންތަކާއި އެކަންކަމުންގެ ހައްލު ހޯދާނެ ގޮތްތައް ލާމަރުކަޒީ ނިޒާމާއި އެނިޒާމުގައި ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ދައިރާއި މަސްއޫލިއްޔަތުތައް

މާލެއަތޮޅު އަތޮޅު ކައުންސިލުން ވިދާޅުވީ ކޮންމެ ރަށަކުންވެސް އެ ރަށަކުން ފޯރުކޮށްދޭ ރަށްވެހި ޚިދުމަތްތަކާ ގުޅޭ ގޮތުންނާއި، އެ ރަށަކަށް ކުރިމަތިވެފައިވާ ގޮންޖެހުންތަކާއި، ހައްލު ކުރަންޖެހޭ މައްސަލަތައް ބަޔާންކޮށް "ކޮންސެޕްޓް ޕޭޕަރެއް" ތައްޔާކުރުކޮށްފައިވާކަމަށެވެ. އަދި މިފޯރަމް ގެތެރެއިން ބައިވެރިންނަށް، ލޯކަލް ގަވަރމަންޓް އޮތޯރިޓީގެ ޕެނަލިސްޓުންނާއި، ދިމާވާ މައްސަލަތަކާއި ގުޅޭގޮތުން މަޝްވަރާކުރުމުގެ ފުރުސަތު ފަހިވެގެންދާނެއެވެ. މިއީ ރަށްރަށުގެ ވަކިވަކި މައްސަލަތައް ދިރާސާކޮށް، އެކަންތައްތަކަށް ދެމެހެއްޓެނިވި ހައްލުތަކެއް ހޯދުމަށް ލިބިގެންދާނެ ރަނގަޅު ފުރުސަތެއްކަމަށް އެ ކައުންސިލުން ވިދާޅުވިއެވެ.

މާލެއަތޮޅު އަތޮޅު ކައުންސިލުން ވިދާޅުވީ މި ފޯރަމްގެ މައިގަނޑު މަޤްޞަދަކީ، މި ފުރުޞަތުތަކުގެ ބޭނުން އެންމެ ހެޔޮގޮތުގައި ހިފައި، ދިމާވާ ގޮންޖެހުންތަކުން އަރައިގަތުމަށް ކަމާއިބެހޭ ވުޒާރާތަކާއި ގުޅިގެން މަސައްކަތްކުރުމަށް މަގުފަހިކޮށްދިނުންކަމަށެވެ.