60 މިލިޔަން ރުފިޔާ، ޒަމާނީ ވަސީލަތްތައް، ފުރިހަމަ އިސްލާމީ މަރުކަޒެއް

ހއ. ދިއްދޫގައި ތަރައްްޤީކުރަން މިދިޔަ ސަރުކާރުން އިޢުލާންކުރެއްވި އިސްލާމީ މަރުކަޒުގެ މަސައްކަތް މިސަރުކާރުން ނިންމަވައި، މިދިޔަ ހުކުރުދުވަހު މިވަނީ އެ ތަން ރަސްމީކޮށް ހުޅުވާފައެވެ.

ދިއްދޫގައި ބިނާކުރި އިސްލާމީ މަރުކަޒުގެ މަސައްކަތް ކުރިއަށްދިޔަ ގޮތަށް ބަލާލާއިރު، ދިއްދޫ އިސްލާމީ މަރުކަޒުގެ މަސައްކަތް ކޮންޓްރެކްޓަރާއި ހަވާލުކުރުމުގެ އެއްބަސްވުމުގައި ސޮއިކޮށްފައިވަނީ 2023 ވަނަ އަހަރުގެ މޭމަހުއެވެ. މޭމަހު ބަޔަކާއި މަސައްކަތް ހަވާލުކުރިނަމަވެސް އެތަނުގެ ބިންގާ އަޅާފައިވަނީ 2023 ވަނަ އަހަރުގެ ސެޕްޓެމްބަރުމަހުގެ 23 ވަނަ ދުވަހު އޮތް ރިޔާސީ އިންތިހާބަށް މަހަކަށްވުރެ ކުޑަ ދުވަސްކޮޅަކަށް ވެފައިވަނިކޮށް 31 އޮގަސްޓް 2023 ގައެވެ.

ދިއްދޫ އިސްލާމީ މަރުކަޒުގެ މަސައްކަތް އެތައް މިލިޔަން ރުފިޔާއެއް ހަރަދުކުރަންޖެހޭއިރު އެމްޑީޕީގެ ސަރުކާރުން އެ މަސައްކަތަށް އެ އަހަރުގެ ބަޖެޓުގައި ހިމަނާފައިވަނީ އެންމެ 2 ލައްކަ 10 ހާސް ރުފިޔާއެވެ. އަދި އެމްޑީޕީގެ ވެެރިކަން ނިމުނުއިރުވެސް ދިއްދޫ އިސްލާމީ މަރުކަޒުގެ މަސައްކަތް ރަނގަޅަށް ފަށާފައިނުވާއިރު، އެ މަސައްކަތަށް ދޭންޖެހޭ އެއްވެސް ފައިސާއެއް ކޮންޓްރެކްޓަރަކަށް ދީފައެއްވެސް ނުވެއެވެ.

ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވެރިކަމާއި ހަވާލުވެވަޑައިގަތުމަށްފަހު ދިއްދޫ އިސްލާމީ މަރުކަޒުގެ މަސައްކަތް އަވަސްކުރުމަށް ކުރަންޖެހޭ އެންމެހާ މަސައްކަތްތަކުގެ ދުވެލި ހަލުއިކުރެއްވިއެވެ.

ދިއްދޫ އިސްލާމީ މަރުކަޒު

• އިސްލާމީ މަރުކަޒު ބިންގާ އެޅީ ރިޔާސީ އިންތިޚާބުގެ މަހެއްހާ ދުވަސްކުރިން 31 އޮގަސްޓް 2023ގައި
• މިޕްރޮޖެކްޓަށް އެމްޑީޕީ ސަރުކާރުން ބަޖެޓްކޮށްފައިވަނީ އެންމެ 2 ލައްކައެއްހާ ރުފިޔާ. އެފައިސާވެސް ކޮންޓްރެކްޓަރުންނަށް ދެއްކީ މިސަރުކާރުން
• އެމްޑީޕީ ސަރުކާރުން ދިއްދޫ އިސްލާމީ މަރުކަޒު ބިންގާއެޅިއިރު ލައިބްރަރީ ކަބަޑާއި ޖަލްސާކުރާ ހޯލު ގޮނޑިތަކާއި އޮފީސް ސެޓަޕް ނުހިމަނާ ބަޖެޓް ތައްޔާރުކުރީ. ނަމަވެސް މިސަރުކާރުގެ ޚަރަދުގައި އެތަކެތި ހޯދާ ހަމަކޮށްފައި.
• ⁠ދިއްދޫ އިސްލާމީ މަރުކަޒު ބިންގާ އެޅުން ފިޔަވައި އެހެން ހުރިހާ މަސައްކަތެއް ފުރިހަމަކުރީ މިސަރުކާރުން.
• އެމްޑީޕީ ސަރުކާރުގައި މިމަސައްކަތަށް ⁠2 ލައްކަ 10 ހާސް ރުފިޔާ ބަޖެޓްކުރިނަމަވެސް މިމަސައްކަތަށް 60 ވަރަކަށް މިލިޔަނެއްހާ ރުފިޔާ ޚަރަދުވި

އެމްޑީޕީ ސަރުކާރުން ދިއްދޫ އިސްލާމީ މަރުކަޒު ބިންގާއެޅިއިރު އެކަމަށް ބަޖެޓު ހަމަޖައްސާފައިވައިވަނީ ލައިބްރަރީ ކަބަޑާއި ޖަލްސާކުރާ ހޯލު ގޮނޑިތަކާއި އޮފީސް ސެޓަޕްވެސް ނުހިމަނައެވެ. ނަމަވެސް މިސަރުކާރުން ދިއްދޫ އިސްލާމީ މަރުކަޒުގެ މަސައްކަތް ނިންމެވީ ސަރުކާރުގެ ޚަރަދުގައި އެތަކެތި ހޯދާ ހަމަކުރައްވާފައެވެ.

ޢިލްމީ ވަސީލަތްތަކާއެކު ޖާގަ ތަނަވަސް އިސްލާމީ މަރުކަޒެއް ދިއްދޫގައި ބިނާކޮށްދެއްވިއިރު، ބިންގާ އެޅުން ފިޔަވައި މިމަރުކަޒުގެ ހުރިހާ މަސައްކަތެއް ފުރިހަމަކޮށްދެއްވީ ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ ސަރުކާރުންނެވެ.

އެމްޑީޕީގެ ސަރުކާރުން މި މަސައްކަތަށް އެންމެ 2 ލައްކަ 10 ހާސް ރުފިޔާ ބަޖެޓް ކުރެއްވިނަމަވެސް، ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ ސަރުކާރުން ދިއްދޫ އިސްލާމީ މަރުކަޒު ބިނާކުރެއްވުމަށް ވަނީ ގާތްގަނޑަކަށް 60 މިލިއަން ރުފިޔާ ޚަރަދުކުރައްވާފައެވެ.

ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ ސަރުކާރުން ކުރެއްވި މަސައްކަތާއެކު ދިއްދޫގައި އެންމެ ޒަމާނީ އިސްލާމީ މަރުކަޒެއް ޤާއިމްކުރައްވާފައިވާއިރު، މިއީ އެއްފަހަރާ 1500 މީހުންނަށް ނަމާދުކުރެވޭ ޖާގައިގެ މިސްކިތެކެވެ. މި މިސްކިތުގައި އިސްލާމީ ލައިބްރަރީއަކާއި ޤުރުއާނާ ބެހޭ މަރުކަޒުގެ އައުޓްރީޗް ސެންޓަރެއްވެސް ވަނީ ގާއިމުކޮށްފައެވެ. އަދި 450 މީހުންގެ ޖާގައިގެ މަލްޓި ޕަރޕަސް ހޯލަކާއި، 30 ކުދިންގެ ޖާގައިގެ 5 ކްލާސްރޫމާއި 2 ސެމިނަރ ރޫމާއި އޮފީސް ޖާގައެއްވެސް ވަނީ ހިމަނާފައެވެ.

ދިއްދޫގައި އިސްލާމީ މަރުކަޒެއް ޤާއިމްކުރުމަށް ބިންގާ އެޅުއްވީ ނިމިދިޔަ ސަރުކާރުންނަމަވެސް، އިސްލާމީ މަރުކަޒެއް ބިނާކުރަން ބޭނުންވާ ބަޖެޓާއި ވަސީލަތްތައް ހަމަޖައްސައިދެއްވައި، އެ މަސައްކަތް ހަޤީގަތަކަށް ހައްދަވައިދެއްވީ ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ ސަރުކާރުންކަމާމެދު ދެބަސްވެވޭނެ ޖާގައެއް ނެތެވެ.