އަހަރުގެ މިހާތަނަށް ފަތުރުވެރިކަމަށް 2900 އަށްވުރެ ގިނަ އެނދު!

އަހަރުގެ މިހާތަނަށް ފަތުރުވެރިކަމަށް 2،900 އަށްވުރެ ގިނަ އެނދު އިތުރުވެފައިވާކަން ފަތުރުވެރިކަމާއި ތިމާވެއްޓާއި ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ. މިއާއެކު، އަހަރުގެ މިހާތަނަަށް ފަތުރުވެރިންނަށް ޚިދުމަތްދޭން އިތުރުކުރި ޖުމްލަ އެނދުގެ އަދަދު މިވަނީ 66،000 އަށް އަރާފައެެވެ.

ފަތުުރުވެރިކަމާއި ތިމާވެއްޓާއި ބެހޭ ވުޒާރާގެ އެންމެ ފަހުގެ ތަފާސްހިސާބުތަކަށް ބަލާއިރު އަހަރުގެ މިހާތަނަށް ފަތުރުވެރިކަމަށް މުޅި ޖުމްލަ 66,235 އެނދު ވަނީ އިތުރުވެފައެވެ. މިދިޔަ އަހަރު ނިމުނުއިރު ފަތުރުވެރިކަަމަށް ނެރެފައިވަނީ މުޅި ޖުމްލަ 63,248 އެނދެވެ. އެހެންކަމުން މިއީ 2،987 އެނދުގެ އިތުރުވުމެކެވެ.

ފަތުރުވެރިކަމަށް އިތުރުކުރެވުނު ޖުމްލަ އެނދުގެ އަދަދު 66،000 އަށް އަރާފައިވާއިރު، މީގެ ތެރޭގައި ހިމެނެނީ ރިސޯޓުތަކުން އިތުރުކުރި 44,247 އެނދާއި، ގެސްޓު ހައުސްތަކުގެ 16,068 އެނދާއި، ސަފާރީތަކުން އޮޕަރޭޝަނަށް ގެނެސްފައިވާ 3,322 އެނދުގެ އިތުރުން ހޮޓާތަކުގެ 2,598 އެނދެވެ.

އޮޕަރޭޝަނަށް ގެނެސްފައިވާ ޓޫރިސްޓު ފެސިލިޓީތަކުގެ ޢަދަދުތަކަށް ބަލާއިރު، 176 ރިސޯޓު، 935 ގެސްޓުހައުސް، 168 ސަފާރީ، 16 ހޮޓާ ހިމެނޭހެން ޖުމްލަ 1,295 ޓޫރިސްޓު ފެސިލިޓީއެއް ވަނީ މިހާރު ފަތުރުވެރިންނަށް ހުޅުވާލާފައެވެ.

ރާއްޖެއިން ފަތުރުވެރިކަމަށް ނެރެފައިވާ އެނދުގެ އަދަދު އިތުރުވެފައިވާއިރު، ރާއްޖެއަށް ޒިޔާރާތްކުރާ ފަތުރުވެރިންގެ އަދަދަށްވެސް ދަނީ ކުރިއެރުން ލިބެމުންނެވެ.

ތަފާސްހިސާބުތަކުން ދައްކާގޮތުން މިއަހަރުގެ މިހާތަނަށް ރާއްޖެއަށްވަނީ 1,897,840 ފަތުރުވެރިން ޒިޔާރަތްކޮށްފައެވެ. މި އަދަދަކީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދާއި އަޅާ ބަލާއިރު، 9.8 އިންސައްތަ އިތުރު އަދަދެކެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 1,728,045 ފަތުރުވެރިންނެވެ.

މިއަހަރު ރާއްޖެއަށް 2.3 މިލިޔަން ފަތުރުވެރިން ގެނައުމަށް ސަރުކާރުން ވަނީ އަމާޒުހިފާފައެވެ. އަދި އަހަރުގެ މިހާތަނަށް 1.8 މިލިޔަން ފަތުރުވެރިން ޒިޔާރާތްކޮށްފައިވާއިރު، މި އަމާޒު ހާސިލްކުރުމަށް ދެން ބޭނުންވަނީ 402،160 ފަތުރުވެރިންނެވެ. މިހާރު އެވްރެޖްކޮށް ދުވާލަކު 6،000އަށްވުރެ ގިނަ ފަތުރުވެރިން ރާއްޖެއަށް ދަނީ ޒިޔާރާތްކުރަމުންނެވެ.