މިމަހުގެ މިހާތަނަށް ސްޕޯޓްސް ފިޝިންގއަށް ޚާއްސަ 10 ވަދު ކަނދުފަތި އަޅައިފި

މަސްވެރިންގެ ލާބައާއި މަންފާއަށްޓަކައި ރާއްޖޭގެ އެކި ސަރަހައްދުތަކުގައި ސަރުކާރުން ދަނީ ކަނދުފަތި އަޅަމުންނެވެ. އެގޮތުން މިމަހުގެ މިހާތަނަށް ރާއްޖޭގެ އެކި ސަރަހައްދުތަކުގައި މުޅި ޖުމްލަ 10 ކަނދުފަތި ވަނީ އަޅާފައެވެ. މީގެ ތެރޭގައި ހިމެނެނީ 6 ސަރަހައްދެއްގައި މުޅިން އަލަށް އެޅި ވަދު ކަނދުފަތިތަކާއި، ކުރިން އަޅާފައިވާ ކަނދުފަތިތައް ކަނޑައިގެން ދިއުމުގެ ސަބަބުން 4 ސަރަހައްދެއްގައި އެޅި ކަނދުފައްޗެވެ.

ރާއްޖޭގައި 2 ބާވަތެއްގެ ކަނދުފަތި ވަނީ އަޅާފައެވެ. އެއީ ކަޅުބިލަމަހުގެ މަސްވެރިކަމަށް ޚާއްސަކޮށް އަޅާފައިވާ ދޮށީގެ ކަނދުފައްޗާއި، ސްޕޯޓްސް ފިޝިންގއަށް ޚާއްސަކޮށްގެން އަޅާފައިވާ ވަދު ކަނދުފައްޗެވެ. މި ކަނދުފަތިތަކުގެ ތެރެއިން އެންމެ ޑިމާންޑު ބޮޑީ ވަދު ކަނދުފައްޗަށްކަމަށް މަސްވެރިކަމާއި ބެހޭ ވުޒާރާއިން ވިދާޅުވެއެވެ.

ސްޕޯޓް ފިޝިންގ ނުވަތަ މުނިފޫހިފިލުވުމުގެ މަސްވެރިކަމަށް ކަނދުފަތިތައް އަޅާފައިވަނީ ރަށްރަށުގެ ވަށައިގެން 3 މޭލާއި 6 މޭލާއި ދެމެދުގެ ދުރުމިނުގައެވެ. މި ވަދު ކަނދުފަތި، ފަރުމާކޮށްފައިވަނީ ދުރަށް ފެންނާނެހެން ބައްތިއަކާއި، ކަނދުފަތި އޮތް ތަން ފަސޭހައިން ދެނެގަނެވޭނެގޮތަށް ހުންނަ ރާޑަރު ރިފްލެކްޓަރަކާއި އެކުގައެވެ.

މަސްވެރިކަމާއި ބެހޭ ވުޒާރާއިން ވިދާޅުވީ، ރަށްރަށުގެ ޒުވާނުންނާއި، އަދި ސީދާ ކައުންސިލްތަކުންވެސް އެރަށްރަށުގައި ވަދު ކަނދުފަތިތައް އަޅައިދިނުމަށް އެދެމުންދާކަމަށެވެ. އަދި، ވަކި އުސޫލެއްގެ ދަށުން، އެންމެ ފައިދާވާނެގޮތަށް ބަލައިގެން ރަށްރަށުގައި އަލަށް ވަދު ކަނދުފަތިއެޅުމުގެ މަސައްކަތް ކުރިޔަށްދާކަމަށް އެ ވުޒާރާއިން ވިދާޅުވެއެވެ. އެގޮތުން މިމަހުގެ މިހާތަނަށް 6 ސަރަހައްދެއްގައި މުޅިން އަލަށް ވަދު ކަނދުފަތިތައް ވަނީ އަޅާފައެވެ.

ވަދު ކަނދުފަތި އަލަށް އެޅި ސަރަހައްދުތައް

• ފުވައްމުލަކު ސިޓީ: ފުވައްމުލަކު ސިޓީގެ އިރުން 10 މޭލު ބޭރުގައި
• ގއ. ދިގުދޫ: ދިގުދޫގެ އިރުން 5 މޭލު ބޭރުގައި
• ގއ. ފުޅަނގި: ފުޅަނގީގެ ހުޅަނގު އުތުރުން 5 މޭލު ބޭރުގައި
• ގއ. މެލައިމުގު: މެލައިމުގުގެ ހުޅަނގުން 5 މޭލު ބޭރުގައި
• ދ. ކުޑަހުވަދޫ: އެ އަތޮޅުގެ މާފުށީގެ ހުޅަނގު ދެކުނުން 6 މޭލު ބޭރުގައި
• މ. ކޮޅުފުށި: އެ އަތޮޅު ދިއްތުޑީގެ އިރު ދެކުނުން 7 މޭލު ބޭރުގައި

މި ވަދު ކަނދުފަތިތައް ޤާއިމްކުރުމުގެ މައިގަނޑު މަޤްޞަދަކީ ދެމެހެއްޓެނިވި ގޮތެއްގައި މަސްވެރިކަން ކުރިއެރުވުމާއެކު، ޒުވާން މަސްވެރިންނާއި މުނިފޫހިފިލުވުމުގެ ގޮތުން މަސްވެރިކަމުގައި ޝާމިލުވާ ފަރާތްތަކަށް، ލުއިފަސޭހަކޮށްދިނުން ކަމަށް މަސްވެރިކަމާއި ބެހޭ ވުޒާރާއިން ވިދާޅުވެއެވެ. އަދި ރާއްޖޭގެ ގިނަ ސަރަހައްދުތަކެއްގައި އިތުރު ވަދު ކަނދުފަތިތައް ގާއިމުކުރުމުގެ ސަބަބުން އާމްދަނީ ހޯދުމަށް ފަރުމަސްވެރިކަންކުރާ މަސްވެރިންނަށާއި، މަސްވެރިކަމުގެ މުނިފޫހިފިލުވުމުގެ ޙަރަކާތްތަކުގައި ބައިވެރިވާ ފަރާތްތަކަށް ބޮޑެތި ފައިދާތައް ލިބިގެންދާނެކަމަށް އެ ވުޒާރާއިން ވިދާޅުވެއެވެ.

ރާއްޖޭގެ އެކި ކަންކޮޅުތަކުގައި އައު ވަދު ކަނދުފަތިތައް އެޅުމުގެ މަސައްކަތް ކުރިއަށްދާއިރު، ކުރިން އަޅާފައިވާ ބައެއް ކަނދުފަތިތައް ކަނޑައިގެންދިއުމުގެ ސަބަބުން އެ ކަނދުފަތިތައް އަލުން އެޅުމުގެ މަސައްކަތްވެސް އެ ވުޒާރާއިން ދަނީ ކުރައްވަމުންނެވެ. އެގޮތުން މިމަހުގެ މިހާތަނަށް މިފަދަ 4 ސަރަހައްދެއްގައި ކަނދުފަތިތައް އަޅާފައިވެއެވެ.

ކަނޑައިގެންގޮސްފައިވާ ސަރަހައްދުތަކުގައި އެޅި ކަނދުފަތިތައް

• ފުވައްމުލަކު ސިޓީ: ފުވައްމުލަކު ސިޓީގެ ހުޅަނގުން 6 މޭލު ބޭރުގައި
• އައްޑޫ ސިޓީ ގަން: ގަމުގެ ހުޅަނގު ދެކުނުން 13 މޭލު ބޭރުގައި
• ގދ. ފިޔޯރީ: ފިޔޯރީގެ ދެކުނުން 12.5 މޭލު ބޭރުގައި
• ތ. ވިލުފުށި: ވިލިފުށި އިރުން 10 މޭލުން ބޭރުގައި

ކަނދުފަތީގެ ވިއުގަ ފުޅާކުރުމުގެ މަސައްކަތަކީ، މަސްވެރިކަމުގެ ސިނާޢަތް ކުރިއެރުވުމަށް ސަރުކާރުން ކުރިއަށް ގެންދާ މުހިންމު މަސައްކަތްތަކުގެ ތެރެއިން މަސައްކަތެކެވެ. މި މަސައްކަތް އަވަސްކުރުމަށާއި، ހަލާކުވާ ނުވަތަ ކަނޑައިގެންދާ ކަނދުފަތިތައް ވީ އެންމެ އަވަހަކަށް މަރާމާތުކުރުމަށް، ނުވަތަ އަލުން އެޅުމަށް މަގުފަހިކުރުމުގެ ގޮތުން ސަރުކާރުން ދަނީ ރާއްޖޭގެ ދެކުނާއި އުތުރުގައި ކަނދުފަތި އުފައްދާ މަރުކަޒުތަކެއް ގާއިމުކުރުމަށް ތައްޔާރުވަމުންނެވެ.

އެގޮތުން ރާއްޖޭގެ 2 ސަރަހައްދެއްގައި ކަނދުފަތި ސެންޓަރު އެޅުމުގެ މަސައްކަތްވެސް އެ ވުޒާރާއިން މިހާރު ދަނީ ކުރައްވަމުންނެވެ. އެގޮތުން ށ. ފުނަދޫގައި އެޅުމަށް ހަމަޖެހިފައިވާ ކަނދުފަތި ސެންޓަރުގެ އަމަލީ މަސައްކަތް މިއަންނަ ޑިސެންބަރު މަހުގެ ކުރިން ފެށޭނެކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ވަނީ ވިދާޅުވެފައެވެ.