ދިވެހިރާއްޖޭގެ އިންޖިނިއަރުންގެ ދުވަސް ކުލަގަދަކޮށް ފާހަކުރުމަށް މުޅިރާއްޖޭގެ ތަޢުލީމީ އިދާރާތަކަށް ޚާއްސަކޮށްގެން އިންޖިނިއަރިންގެ ދާއިރާގެ ކެރިއަރ ގައިޑެންސް ޕްރޮގްރާމްތަކާއި ސައިޓް ވިޒިޓްތަކެއް ކުރިއަށްގެންގޮސްފިއެވެ.
މި ޕްރޮގްރާމަކީ އިމާރާތް ކުރުމާ ބެހޭ ވުޒާރާއިން އިސްނަންގަވައިގެން ތަޢުލީމީ ވުޒާރާއާއި ދައުލަތުގެ ސަރުކާރު ހިއްސާވާ ކުންފުނިތައް ގުޅިގެން ކުރިއަށް ގެންދިޔަ ޕްރޮގްރާމެކެވެ. ދިވެހިރާއްޖޭގެ ހުރިހާ އަތޮޅުތަކާއި ސިޓީތަކުގެ ޔުނިވަރސިޓީ، ކޮލެޖްތަކުގެ ދަރިވަރުންނަށް ބޭއްވި މި ސައިޓް ވިޒިޓްތަކަކީ ދާއިރާއާ ގުޅޭގޮތުން މައުލޫމާތު ދިނުމަށް ކުރިއަށް ގެންދިޔަ ވިޒިޓްތަކެކެވެ. މިޕްރޮގްރާމުގެ ތެރެއިން ރާއްޖޭގެ އެކި ކަންކޮޅުތަކުގައި ތަރައްޤީގެ މަޝްރޫޢުތައް ހިންގާ ސައިޓްތަކަށް ދަރިވަރުން ގެންގޮސް މަޢުލޫމާތު ދީފައިވެއެވެ.
މިޕްރޮގްރާމުގެ ތެރެއިން ތަޢުލީމީ ދާއިރާގެ ތެރެއިން 28 އިދާރާއަކަށް މިޕްރޮގްރާމްވަނީ ހިންގާފައެވެ. އަދި އިތުރު ޕްރޮގްރާމްތަކެއް އަންނަ ސެޕްޓެމްބަރު މަހުގެ ނިޔަލަށް ކުރިއަށް ގެންދިޔުމަށް ވަނީ ހަމަޖެހިފައެވެ.
ކުންފުނިތަކުން މިހާތަނަށް ކުރިއަށް ގެންގޮސްފައިވާ ޕްރޮގްރާމްތަކުގެ ތެރޭގައި އެމްޓީސީސީން ވަނީ
ބޮޑުތަކުރުފާނު މަގު ޑިވެލޮޕްމަންޓް ޕްރޮޖެޓް ސަރަޙައްދަށް ސައިޓް ވިޒިޓެއް ކުރިއަށް ގެންގޮސްފައެވެ. އެމްއޭސީއެލް އިން ވެލާނާ އިންޓަރނޭޝަނަލް އެއަރޕޯޓްގައި ސައިޓް ވިޒިޓެއް ކުރިއަށް ގެންދިޔައިރު
އެފްޑީސީންވަނީ ހުޅުމާލޭގައި ހުންނަ އަމާން އުދެރެސް ޓަވަރުތަކަށް ސައިޓް ވިޒިޓެއް ކުރިއަށް ގެންގޮސްފައެވެ.
މި ޕްރޮގްރާމްގެ ދަށުން ފެނަކަ ކޯޕަރޭޝަނުން މިހާތަނަށް ވަނީ 23 ސްކޫލެއްގައި ކެރިއަރ ގައިޑެންސް ޕްރޮގްރާމްތައް ހިންގާފައެވެ. ސްޓެލްކޯއިންވެސް ވަނީ ކެރިއަރ ގައިޑެންސް ޕްރޮގްރާމްގެ އިތުރުން ޕަވަރ ހައުސްތަކަށް ސައިޓް ވިޒިޓްތައް ކުރިއަށް ގެންގޮސްފައެވެ. މީގެ އިތުރުން މި ޕްރޮގްރާމްގެ ދަށުން އިމާރާތް ކުރުމާ ބެހޭ ވުޒާރާއިން ވަނީ މޯލްޑިވްސް ނޭޝަނަލް ޔުނިވަރސިޓީގެ ސިވިލި އިންޖިނިއަރިން، އިލެކްޓްރިކަލް އެންޑް އިލެކްޓްރޯނިކް އިންޖިނިއަރިންގެ ދަރިވަރުންނަށް މާލެ-ތިލަފުށި ލިންކް ސައިޓް ދައްކާލާފައެވެ. މިވިޒިޓްގައި ޤައުމީ ޔުނިވަރސިޓީގެ ގިނަ ދަރިވަރުންތަކެއް ބައިވެރިވިއެވެ.
މި ޕްރޮގްރާމަކީ އިންޖިނިއަރުންގެ ދުވަހާ ގުޅިގެން ގައުމީ ފެންވަރުގައި ކުރިއަށްގެންދިޔަ ކާމިޔާބު ޕްރޮގްރާމެކެވެ.
މިއަހަރުން ފެށިގެން ކޮންމެ އަހަރެއްގެވެސް އޮގަސްޓް މަހުގެ 30 ވަނަ ދުވަހަކީ ރާއްޖޭގެ އިންޖިނިއަރުންގެ ދުވަހުގެ ގޮތުގައި ފާހަގަކުރުމަށް ވަނީ ނިންމާފައެވެ. ދިވެހިރާއްޖޭގެ އިންޖިނިއަރުންގެ ދުވަހުގެ ގޮތުގައި އޮގަސްޓު މަހުގެ 30 ރައީސުލްޖުމްހޫރިއްޔާ ހަމަޖެއްސެވީ، ޤައުމުގެ ތާރީޚުގައި މިހާތަނަށް ހިންގުނު އެންމެ ބިޔަ އުމްރާނީ ތަރައްޤީގެ މަޝްރޫޢު ކަމުގައިވާ، ސިނަމާލެ ބުރިޖު އިފުތިތާޙުކުރެވުނު ދުވަހާ ގުޅުވައިގެންނެވެ.