ސްޕެނިޝް ލީގުގައި ރޭ މަޔޯކާއާ ދެކޮޅަށް ކުޅުނު މެޗު ފަހަތުން އަރައި 2-1 ގެ ނަތީޖާއަކުން ރެއާލް މެޑްރިޑުން ކާމިޔާބުކޮށްފިއެވެ.
މެޑްރިޑްގެ ސެންޓިއާގޯ ބަރނަބިއު ސްޓޭޑިއަމްގައި ހަތްދިހަ ދެ ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ 18 ވަނަ މިނިޓުގައި މަޔޯކާގެ ވިދާތް މުރުގީ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
މަޔޯކާ އިން ލަނޑު ޖަހާ ކުރި ހޯދިތާ 19 ވަނަ މިނިޓުގައި ޑީން ހުއިސަންގެ އެސިސްޓަކުން އާޑާ ގުލާ ވަނީ ލަނޑެއް ޖަހާ ރެއާލް މެޑްރިޑަށް މެޗުގެ ނަތީޖާ އެއްވަރުކޮށްދީފަ އެވެ.
އަދި އޭގެ މިނިޓެއް ފަހުން ވިނިޝިއަސް ޖޫނިއަރ ވަނީ ލަނޑެއް ޖަހާ މި މެޗުގައި ރެއާލް މެޑްރިޑަށް ލީޑު ކުރި ހޯދަދީފަ އެވެ.
ރެއާލް މެޑްރިޑް އިން މި ދެ ލަނޑު ޖެހުމުގެ ކުރިން ކިލިއަން އެމްބާޕޭ ލަނޑެއް ޖެހި ނަމަވެސް ވީޑިއޯ ބެލުމަށްފަހު ރެފްރީ ވަނީ އެއީ ލަނޑެއް ނޫން ކަމަށް ނިންމާފަ އެވެ.
މިދިޔަ ހަފްތާގައި ރެއާލް މެޑްރިޑް ކުޅުނު މެޗުގައި ޓްރެންޓް އެލެކްޒެންޑަރ އާނޯލްޑް ނުކުޅުނު ނަމަވެސް ރޭގެ މެޗުގައި މަޔޯކާ އާއި ދެކޮޅަށް އޭނާ ވަނީ މޮޅު ކުޅުމެއް ދައްކާފަ އެވެ.
މި މެޗުން ރެއާލް މެޑްރިޑް މޮޅުވެފައިވާއިރު ލަލީގާގެ އައު ސީޒަނުގައި އެ ޓީމުން މިހާތަނަށް ކުޅުނު ތިން މެޗުންވެސް ރެއާލް މެޑްރިޑް ވަނީ މޮޅުވެފަ އެވެ.