ޚަބަރު

ދޮޅުއަހަރުގެ ތެރޭގައި 8 އަތޮޅެއްގައި 18 ޑަޔަލިސިސް ޔުނިޓު ޤާއިމުކޮށްފި


  • މިހާރުދަނީ އާބާދީ ބޮޑު 3 ސަރަހައްދެއްގައި އިތުރު ޔުނިޓު ޤާއިމުކުރުމުގެ މަސައްކަތް ކުރަމުން

  • ސެޕްޓެމްބަރު މަހުގެ ނިޔަލަށް ހުރިހާ އަތޮޅެއްގައި ޚިދުމަތް ޤާއިމުކުރުމަކީ އަމާޒެއް

  • މިހާރު ޚިދުމަތް ނުލިބެނީ 4 އަތޮޅަކުން

ރާއްޖޭގެ ފުރަތަމަ ޑައިލިސިސް ސެންޓަރު ގާއިމްކުރީ 2001 ވަނަ އަހަރު އިންދިރާ ގާންދީ މެމޯރިއަލް ހޮސްޕިޓަލުގައެވެ. އޭގެފަހުންމިވީ 24 އަހަރުގެ ތެރޭގައި ކިޑްނީ ބަލީގެ ކަންބޮޑުވުން އިތުރުވެ ސަރުކާރުންވަނީ ރާއްޖޭގެ އެކި ކަންކޮޅުތަކުގައި ޑަޔަލިސިސްގެ ޚިދުމަތް ފުޅާކުރުމުގެ މަސައްކަތް ކުރައްވާފައެވެ. ސަރުކާރުގެ މިހާރުގެ އަމާޒަކީ މިއަހަރުގެ ސެޕްޓެމްބަރު މަހުގެ ނިޔަލަށް ރާއްޖޭގެ ހުރިހާ އަތޮޅަކުންވެސް މި ޚިދުމަތް ލިބޭނެ އިންތިޒާމު ހަމަޖައްވައިދެއްވުމެވެ.

ރާއްޖޭގައި ގައިންގަޔަށް ނާރާ ބޮޑެތި ބަލިތަކުގެ ތެރޭގައި އެންމެ ގިނައިން ބޭސްފަރުވާއަށް ރާއްޖެއިން ބޭރަށް ދިޔުމަށް ދައުލަތުން ޚަރަދުކުރާ އެއް ބައްޔަކީ ކިޑްނީގެ ބަލިތަކެވެ. ކިޑްނީ ބަލީގެ ފަރުވާ ރާއްޖޭގައި ފުޅާކުރުމަށް ސަރުކާރުން އަންނަނީ މަސައްކަތްކުރައްވަމުންނެވެ. ކިޑްނީ ބަލީގެ ސަބަބުން ހަފްތާއަކު ދެތިން ދުވަހު ޑަޔަލިސިސްގެ ޚިދުމަތް ހޯދަންޖެހޭ މީހުންގެ ޢަދަދު އަންނަނީ އިތުރުވަމުންނެވެ.

މިޚިދުމަތް މާލެއާއި އަތޮޅުތެރޭގެ ރަށްތަކުގައި ފުޅާކުރުމަށް ސަރުކާރުންވަނީ މަޝްރޫޢެއް ފައްޓަވާފައެވެ. މާލެ ސަރަޙައްދުގައި ސިއްޙީ ފަރުވާދޭ ހުރިހާ ބޮޑެތި ހޮސްޕިޓަލުތަކުގައި ޑަޔަލިސިސްގެ ޚިދުމަތް ޤާއިމުކޮށްފައިވާއިރު ސަރުކާރު ހޮސްޕިޓަލުތަކުގައި މިޚިދުމަތް ފުޅާކުރުމުގެ މަސައްކަތްދަނީ ކުރަމުންނެވެ.

ސިއްޙީ ވުޒާރާގެ ތަފާސްހިސާބުތައް ދައްކާގޮތުން، ރިޖަނަލް ހޮސްޕިޓަލުތަކުގައި މީގެ 12 އަހަރުކުރަން ޤާއިމުކުރަން ފެށި ޑަޔަލިސިސް ޚިދުމަތާއެކު، 2023 ވަނަ އަހަރުގެ ނޮވެންބަރު މަހާއި ހަމައަށް 10 އަތޮޅެއްގައި 11 ޑައިލިސިސް ސެންޓަރުގައި 42 ޔުނިޓުވަނީ ޤާއިމުކޮށްފައެވެ. އަދި 2023 ވަނަ އަހަރުގެ ނޮވެންބަރު މަހުން ފެށިގެން މިއަދާހަމައަށް 8 އަތޮޅެއްގައި 18 ޔުނިޓު ޤާއިމުކޮށްފައިވާއިރު މިމުއްދަތުގެ ތެރޭގައި ކުރިން ހުރި 2 ސެންޓަރެއްގައި ޚިދުމަތް ފުޅާކޮށް، އިތުރު 4 ޔުނިޓުވަނީ ޤާއިމުކޮށްފައެވެ.

އަދި އެންމެ ގިނަ މީހުން ޚިދުމަތް ހޯދަމުން އަންނަ އާބާދީ ބޮޑު ސަރަޙައްދުތައްކަމުގައިވާ ކުޅުދުއްފުށި ރީޖަނަލް ހޮސްޕިޓަލާއި، އައްޑޫ އިކުއިޓޯރިއަލް ހޮސްޕިޓަލްގެ އިތުރުން ޅ.އަތޮޅު ހޮސްޕިޓަލުގައި ޚިދުމަތް އިތުރަށް ތަރައްޤީކުރުމުގެ މަސައްކަތް އަންނަނީ ކުރަމުންނެވެ.

ރާއްޖޭގައި މިވަގުތު ޑަޔަލިސިސްގެ ޚިދުމަތް ނުފެށި އޮތީ، އދ.އަތޮޅާއި، ވ.އަތޮޅުގެ އިތުރުން ފ.އަތޮޅު އަދި ދ.އަތޮޅުގައެވެ. ސަރުކާރުގެ އަމާޒަކީ މިއަހަރުގެ ސެޕްޓެމްބަރުގެ ނިޔަލަށް ރާއްޖޭގެ ހުރިހާ އަތޮޅުތަކެއްގައި ޑަޔަލިސިސްގެ ޚިދުމަތް ޤާއިމުކުރުމެވެ.

ކިޑްނީ ބައްޔަށް އޮތް ވަގުތީ ހައްލެއްގެ ގޮތުގައި ޑަޔަލިސިސްގެ ޚިދުމަތް ސިއްޙީދާއިރާގެ ބޭފުޅުން ޤަބޫލުކުރައްވައެވެ. ބަލިން ރައްކާތެރިވުމަށް ދުރާލާ ދުޅާހެޔޮ ސިއްޙީ އާދަތައް އަށަގެންނެވުމަށް އިސްކަންދިނުމަށް ޑޮކްޓަރުން އިރުޝާދުދެއްވައެވެ. މިގޮތުން ހަކުރު ބަލި ކޮންޓްރޯލްކުރުމާއި، ހެލިފެލިވެ އުޅުން ގިނަކޮށް ސިއްޙަތަށް ފައިދާހުރި ކާނާ ބޭނުންކުރުމަށް އިލްތިމާސްކުރައްވައެވެ.