ދިވެހީންގެ އުންމީދުތަކުގައި ހަޤީޤީ ކުލަ ޖެއްސުމުގައި އިންޖިނޭރުންގެ ދައުރު ބޮޑު: ރައީސް

ދިވެހީންގެ މުސްތަޤުބަލުގެ އުންމީދުތަކުގައި ހަގީގީ ކުލަ ޖެއްސުމުގައި އިންޖިނޭރުންގެ ދައުރު ވަރަށް ބޮޑުކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، މިއަހަރުގެ އިންޖިނޭރުންގެ ދުވަހާއި ގުޅިގެން ސޯޝަލް މީޑިއާގައި ޙިއްޞާކުރެއްވި ޕޯސްޓެއްގައެވެ.

އިންޖިނޭރުންގެ ދުވަހާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވަނީ އެކި ދާއިރާތަކުގައި މަސައްކަތްކުރެއްވި އަދި މިހާރުވެސް ކުރައްވަމުންގެންދަވާ ހީވާގި ދިވެހި އިންޖިނޭރުންނަށް ދުވަހުގެ ތަހުނިޔާ ދަންނަވާފައެވެ. ރައީސުލްޖުމްހޫރިއްޔާ ވިދާޅުވީ، އިންޖިނޭރުކަމަކީ ހަމައެކަނި ވަޒީފާއެއް ނޫންކަމަށެވެ. އެއީ ޤައުމު ބިނާކުރުމަށާއި، އިންސާނިއްޔަތަށްޓަކައި ކޮށްދެވޭ އަގުހުރި ޚިދުމަތެއްކަމަށް ވިދާޅުވެފައެވެ.

އަދި އެއީ ޢިލްމާއި ޙިލްމާއި ދުރުވިސްނުމުގެ ބޭނުން ހިފަންޖެހޭ ޚާއްސަ ހުނަރެއްކަން ފާހަގަކުރައްވާ ރައީސުލްޖުމްހޫރިއްޔާވަނީ ދައިރާގެ މުހިއްމުކަމުގެ މައްޗަށް އަލިއަޅުއްވާލައްވާފައެވެ. އެގޮތުން ދިވެހީންގެ މުސްތަޤުބަލުގެ އުއްމީދުތަކުގައި ހަގީގީ ކުލަ ޖެއްސުމުގައި އިންޖިނޭރުންގެ ދައުރު ވަރަށް ބޮޑުކަމަށް ރައީސް ވިދާޅުވިއެވެ.

އިންޖިނޭރުކަމަކީ ހަމައެކަނި ވަޒީފާއެއް ނޫން. އެއީ، ޤައުމު ބިނާކުރުމަށާއި އިންސާނިއްޔަތަށްޓަކައި ކޮށްދެވޭ ވަރަށް އަގުހުރި ޚިދުމަތެއް. ޢިލްމާއި ޙިލްމާއި ދުރުވިސްނުމުގެ ބޭނުން ހިފަންޖެހޭ ޚާއްޞަ ހުނަރެއް. ދިވެހީންގެ މުސްތަޤްބަލުގެ އުންމީދުތަކުގައި ހަގީގީ ކުލަ ޖެއްސުމުގައި،… pic.twitter.com/mETiODB8sN

— Dr Mohamed Muizzu (@MMuizzu) August 30, 2025

އިންޖިނޭރުންގެ ދުވަހެއް ފާހަގަކުރެއްވުމަށް ރައީސުލްޖުމްހޫރިއްޔާ ނިންމެވީ މިއަހަރުގެ ޖޫން މަހުގެ 15 ވަނަ ދުވަހުގައެވެ. ދިވެހިރާއްޖޭގެ އިންޖިނޭރުންގެ ދުވަހުގެ ގޮތުގައި އޮގަސްޓު މަހުގެ 30 ރައީސުލްޖުމްހޫރިއްޔާ ހަމަޖެއްސެވީ، ޤައުމުގެ ތާރީޚުގައި މިހާތަނަށް ހިންގުނު އެންމެ ބިޔަ އުމްރާނީ ތަރައްޤީގެ މަޝްރޫޢު ކަމުގައިވާ، ސިނަމާލެ ބުރިޖު އިފުތިތާޙުކުރެވުނު ދުވަހާ ގުޅުވައިގެންނެވެ. އަދި އިންޖިނޭރުންގެ ދުވަސް ފާހަގަކުރެއްވުމުގެ އެންމެހައި ކަންކަން ކުރިއަށް ގެންދާނީ، އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިންކަމަށްވެސް ރައީސުލްޖުމްހޫރިއްޔާވަނީ ހަމަޖައްސަވާފައެވެ.