ޢަޒުމް ކަނޑައަޅަންވީ، ކޮންމެ މީހެއްގެ ހުރި ކޮންމެ ކަމަކަށްވުރެ ޤައުމު އިސްކުރުމަށް: ރައީސް

ޤައުމީ މަސްލަޙަތު އިސްކޮށްގެން ކުރާ މަސައްކަތުން، ދާދި ފަސޭހަކަމާއެކު ވަށާޖެހޭ ތަރައްޤީ ޙާޞިލުކުރެވޭނޭކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް ހުޅުވުމުގެ ރަސްމިއްޔާތުގައި، ވާހަކަފުޅު ދައްކަވަމުންނެވެ.

އައު ޓަރމިނަލް ހުޅުވުމާއި، ދިވެހިރާއްޖޭގެ 60 ވަނަ މިނިވަން ދުވަސް އެކުގައި ފާހަގަކުރަމުންދާ މި ޚާއްޞަ ދަނޑިވަޅުގައި، ޤައުމު އިސްކުރުމުގެ ޢަޒުމު ކަނޑައެޅުމަށް ރައީސުލްޖުމްހޫރިއްޔާ އިލްތިމާސް ކުރެއްވިއެވެ. ދިވެހީންނަކީ، އެއް ބަހަކުން ވާހަކަދައްކާ، އެއް ދީނަކަށް އުޅޭ، އެއް މާޒީއެއް ހިއްސާކުރާ، އެއް ބައެއްކަން ހަނދުމަފުޅުކޮށް ދެއްވަމުން، އަމިއްލަ މަސްލަޙަތާއި ޒާތީ ތަޢައްޞަބަށްވުރެ ޤައުމު އިސްކުރުމަކީ، އަންނާން އޮތް ޖީލުތަކަށް އުފާފާގަތިކަންމަތީ ޤައުމު ވާޞިލުކޮށް ދިނުމަށްޓަކައި، ކޮންމެ ދިވެއްސެއްގެ ކޮނޑުގައި އެޅިފައި އޮތް ޒިންމާއެއް ކަމަށް އެ މަނިކުފާނު ވިދާޅުވިއެވެ. މި އައު ޓަރމިނަލަކީވެސް، ތަރައްޤީއަށް ވާޞިލުވުމަށްޓަކައި އެކުގައި ކުރާ މަސައްކަތްތަކުން ޙާޞިލުކުރެވޭ ކާމިޔާބީގެ ރަމްޒެއްކަމަށް އެ މަނިކުފާނު ވިދާޅުވިއެވެ.

"މިއަދު އަޅުގަނޑުމެން އެންމެން ޢަޒުމް ކަނޑައަޅަންވީ، އަޅުގަނޑުމެން ކޮންމެ މީހެއްގެ ހުރި ކޮންމެ ކަމަކަށްވުރެ އިސްކުރަންވީ ދިވެހި ޤައުމުކަން. އެންމެން އެކުގައި އަތުކުރި އޮޅާލައިގެން ކުރިއަށްދިޔުމުގައި ޢަޒުމް ކަނޑައަޅަންވީ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

މި އައު ޓަރމިނަލް މިނިވަން ދުވަހު ހުޅުވަން ނިންމެވުމުގެ ފަހަތުގައިވާ ހިކުމަތަށްވެސް އެ މަނިކުފާނުގެ ވާހަކަފުޅުގައި ވަނީ އަލިއަޅުއްވާލައްވާފައެވެ. އެ ގޮތުން، ޤައުމުގެ މިނިވަންކަން ދެމެހެއްޓުމުގައި އިޤްތިޞާދީ މިނިވަންކަމުގެ މުހިންމުކަން ފާހަގަކުރައްވައި، އިޤްތިޞާދީ މިނިވަންކަމުގެ އެންމެ މުހިންމު ތަނބަކީ އެއަރޕޯޓު ކަމަށް އެ މަނިކުފާނު ވިދާޅުވިއެވެ. އަދި އިރާދަކުރެއްވިޔާ، މި މަސައްކަތް ގުޅިގެން ދާނީ، ޚާއްޞަކޮށް ފަތުރުވެރިކަން، އަދި ޖުމުލަކޮށް މުޅި އިޤްތިޞާދީ ކުރިއެރުމާކަމަށް އެ މަނިކުފާނު ވިދާޅުވިއެވެ.

"މި ޤައުމު ކުރިއެރުމުގައި، މި ޤައުމަށް ހެވާއި ލާބަ ހޯދައިދިނުމުގައި އަޅުގަނޑުމެން ކިޔަންވީ އެކައްޗެއް. އެއް ލަވައެއް. އެއްބަހަކުން، އެއް ރާގެއްގައި، އެއްވާނެއްގައި ވާހަކަ ދައްކަންވީ. އޭރުން އިރާދަކުރެއްވިއްޔާ އަޅުގަނޑުމެންނަށް މި ޤައުމަށް އެންމެ ހެޔޮ ކަންތައްތައް ކޮށްދެވޭނީ. އަންނަން އޮތް ޖީލުތަކަށް މި ޤައުމު އުފާފާގަތިކަމުގައި ވާޞިލްކޮށްދެވޭނީ. އެއީ، އަޅުގަނޑުމެން ކޮންމެ މީހެއްގެ ބޮލުގައި އެޅިފައި އޮތް ޒިންމާއެއް. އަޅުގަނޑުމެން ކޮންމެ މީހެއްގެ މަސްއޫލިއްޔަތެއް އެއީ. އަޅުގަނޑުމެން އެކަކަށްވެސް ރެކިގެން ދުރަށްނުދެވޭނެ ޙަޤީޤަތެއް އެއީ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

އައު ޓަރމިނަލްގެ މަސައްކަތުގައި ދިހަވަރަކަށް އަހަރު ދުވަސް ހޭދަވެފައިވާކަން ފާހަގަކުރައްވަމުން، މަސައްކަތުގެ އެކި މަރުޙަލާތަކުގައި ބައިވެރިވެވަޑައިގެންނެވި ހުރިހާ ފަރާތްތަކުގެ އަގުވަޒަންކުރައްވައި، އެ ފަރާތްތަކަށް ރައީސުލްޖުމްހޫރިއްޔާ ވަނީ ޝުކުރު އަދާކުރައްވާފައެވެ. ޚާއްޞަކޮށް، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމާއި، ކުރީގެ ރައީސް އިބްރާހިމް މުޙައްމަދު ޞާލިޙްގެ ނަންފުޅު އެ މަނިކުފާނު ފާހަގަކުރެއްވިއެވެ.

އަދި ދިވެހިސަރުކާރުގެ ބަޖެޓުން ކުރެވުނު ހޭދައިގެ އިތުރަށް މި މަސައްކަތަށް ބޭނުންވި ހުރިހާ އެހީތެރިކަމެއް ދެއްވި ހަތަރު ފަންޑު ކަމުގައިވާ، ސަޢޫދީ ފަންޑް ފޯ ޑިވެލޮޕްމަންޓާއި، އޯޕެކް ފަންޑް ފޯ އިންޓަރނޭޝަނަލް ޑިވެލޮޕްމަންޓާއި، ކުވައިތު ފަންޑް ފޯ އަރަބް އިކޮނޯމިކް ޑިވެލޮޕްމަންޓާއި، އަބޫދާބީ ފަންޑް ފޯ ޑިވެލޮޕްމަންޓް، އަދި އެ އިދާރާތައް ނިސްބަތްވާ ޤައުމުތަކަށް އެ މަނިކުފާނު ޝުކުރު އަދާކުރެއްވިއެވެ.

މީގެ އިތުރުން، މަސައްކަތުގެ ދުވެލި ހަލުވިކޮށްދެއްވާ މަސައްކަތް ފުރިހަމަ ކުރެއްވުމުގައި ޖުމުލަކޮށް ބައިވެރިވެވަޑައިގެންނެވި ހުރިހާ ފަރާތަކަށް އެ މަނިކުފާނު ވަނީ ޝުކުރު އަދާކުރައްވާފައެވެ.

ކާމިޔާބީ އަކީ، ގިނަ ބަޔަކު އެކުގައި ކުރާ ބުރަ މަސައްކަތުން ޙާޞިލުކުރެވޭ ކަމެއް ކަމަށާއި، މިރޭ މި ފާހަގަކުރަނީ އެ ފަދަ ތާރީޚީ ކާމިޔާބީއެއް ކަމަށް އެ މަނިކުފާނު ވިދާޅުވިއެވެ.