އެއަރޕޯޓުގެ ޓެކްސީ ކިއުގެ ކަންކަން ކުރިއަށްދާގޮތް ދަތުރުފަތުރާބެހޭ ވަޒީރު ބައްލަވާލައްވައިފި

ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން، ވެލާނާ އިންޓަރނޭޝަނަލް އެއަރޕޯޓަށް ޒިޔާރަތްކުރައްވާ ޓެކްސީ ކިއުގެ ކަންކަން ކުރިއަށްދާގޮތް ބައްލަވާލައްވައިފިއެވެ

އެއަރޕޯޓްގެ ޓެކްސީ ކިއުއާ ގުޅޭގޮތުން ހުށަހަޅާ މައްސަލަތައް އިތުރުވަމުންދާތީ، އެ މައްސަލަ ހައްލުކުރުމަށް ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން ވަނީ ފުލުހުންނާއި، އެއަރޕޯޓް ހިންގާ އެމްއޭސީއެލްއާއި ގުޅިގެން މަސައްކަތްތަކެއް ފަށާފައެވެ.

ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން ވިދާޅުވީ، ރާއްޖެ އަންނަ ފަތުރުވެރިންނަށާއި ދިވެހިންނަށް އެއަރޕޯޓް ޓެކްސީ ކިއުއިން ކުރިމަތިވާ މައްސަލަތައް ބޮޑުވެ، އާންމު ރައްޔިތުންގެ ފަރާތުން އަންނަ ޝަކުވާތައް އިތުރުވަމުންދާކަމަށެވެ.

ޓެކްސީތަކާއި ގުޅޭގޮތުން ލިބިފައިވާ ބައެއް ޝަކުވާތަކުގެ ތެރޭގައި ވަކި މަންޒިލަކަށް ނޫނީ ދަތުރުކުރުމަށް ޓެކްސީ ޑްރައިވަރުން އުޒުރުވެރިވުމާއި، ދަތުރެއް ނެގުމަށް ފަހު އިތުރު ފަސިންޖަރުން އަރުވައިގެން ދަތުރުކުރުމާއި، އެ ވުޒާރާއިން ކަނޑައަޅާފައިވާ އަގުތަކަށް ވުރެ ބޮޑު އަގުގައި ޓެކްސީ ދަތުރުކުރުން ހިމެނޭކަމަށް ވުޒާރާއިން ވިދާޅުވެއެވެ.

އާއްމުން ހުށަހަޅަމުންދާ ޝަކުވާތައް ބަލައި، އެކަންކަމަށް ހައްލެއް ގެނައުމަށް ޓެކްސީ ޝަކުވާބެލުމާ ގުޅޭ ކޮމެޓީއެއް މިހާރު އެކުލަވާލާފައިވާކަމަށް ވުޒާރާއިން ވިދާޅުވެއެވެ. އަދި މިހާތަނަށް ލިބިފައިވާ ޝަކުވާތަކުގެ ތެރެއިން އެކަށީގެންވާ މިންވަރަށް މައުލޫމާތު ލިބިފައިވާ މައްސަލަތައް ބަލައި، ފިޔަވަޅު އަޅަންޖެހޭ ފަރާތްތަކާމެދު ފިޔަވަޅު އަޅާފައިވާކަމަށް ވުޒާރާއިން ވިދާޅުވެއެވެ.

މިކަން ހައްލުކުރުމަށް ކުރާ މަސައްކަތްތަކުގެ ތެރެއިން ސީދާ ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން އެއަރޕޯޓް ޓެކްސީ ކިއުއަށް މިއަދު ވަޑައިގެން ވަނީ ކަންކަން ކުރިއަށްދާގޮތާގުޅޭގޮތުން މަޢުލޫމާތު ސާފުކުރައްވާފައެވެ. އެމަނިކުފާނުގެ އަރިހުގައި ދަތުރުފަތުރާބެހޭ ވުޒާރާގެ ބައެއް އިސްވެރިންނާއި ފުލުހުންނާއި އެމްއޭސީއެލްގެ އިސް އޮފިޝަލުން އެތަނުގައި ހަރަކާތްތެރިވެފައެވެ.

Minister Mohamed Ameen's site visit today to the airport taxi queue emphasizes the ongoing commitment to regulatory compliance and enhancing service standards through collaboration with all stakeholders.@HomeMinistrymv@MACLmedia @policemv pic.twitter.com/5NPwtq9vsJ

— Ministry of Transport and Civil Aviation (@MoTCAmv) May 8, 2024

ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން ވިދާޅުވީ ޓެކްސީތަކާއި ގުޅޭ އެކި މައްސަލަތައް ހައްލުކުރުމަށްޓަކާ، ކަމާބެހޭ ވުޒާރާތަކާއި އެމްއޭސީއެލްއާ ދެމެދު މަޝްވަރާކުރެވި އެއަރޕޯޓު ޓެކްސީ މެނޭޖްކުރާނެ ގޮތުގެ ޕްލޭނެއް އެކުލަވާލައި، އަންގާރަ ދުވަހުން ފެށިގެން ޕްލޭނަށް އަމަލުކުރަމުންދާކަމަށެވެ. އަދި ދިވެހި ފުލުހުންގެ ޚިދުމަތުގެ ފަރާތުން އެއަރޕޯޓުގައި ހަރަކާތްތެރިވަމުންދާނެކަމަށާއި، ގަވާއިދާއި ޚިލާފަށް އެއަރޕޯޓުގައި ހަރަކާތްތެރިވަމުންދާ ޓެކްސީތަކާމެދު ފިޔަވަޅު އަޅާނޭކަމަށްވެސް އެ ވުޒާރާއިން ވިދާޅުވެއެވެ.

މީގެ އިތުރުން ގަވާއިދާ ޚިލާފަށް ޓެކްސީކުރާ ބިދޭސީންނާމެދު ހަރުކަށި ފިޔަވަޅުތަކެއް އެޅުމަށް ނިންމާފައިވާކަމަށްވެސް އެ ވުޒާރާއިން ވަނީ ހާމަކުރައްވާފައެވެ.