ހެޕީމާކެޓު ގޯދިއްޔާ ފުޓުސަލް ކަޕްގެ ސެމީފައިނަލްގެ ފުރަތަމަ މެޗު ކާމިޔާބުކޮށް އެފްސީ ބޭރުމަތި މުބާރާތް މިލްކު ކުރުމާ މެޗަކަށް ކައިރިއަށް ޖެހިލައިފިއެވެ.
ފާއިތުވި ދެ އަހަރުވެސް މުބާރާތުގެ ޗެމްޕިއަންކަން ހޯދާފައިވާ އެފް.ސީ ބޭރުމަތި ވަނީ ރޭ ކުޅުނު ސެމީފައިނަލް ފުރަތަމަ މެޗުގައި 7-3 ގެ ބޮޑު ތަފާތަކުން އެފްސީ ޒެފިއާ ބަލިކޮށް މުބާރާތުގެ ފައިނަލުން ޖާގަ ހޯދާފައެވެ.
މިމެޗްގެ ފުރަތަމަ ހާފު ބޭރުމަތި ނިންމާލީ 3 ލަނޑުގެ ލީޑެއްގައި އޮވެގެންނެވެ. އަދި ދެވަނަ ހާފުގައި އިތުރު 4 ލަނޑު ޖަހާ ހަތް ލަނޑުގެ ލީޑެއް ނަގާ މުބާރާތުގެ ފައިނަލް ޖާގައެއް ޔަގީންކުރިއެވެ. މެޗުގައި ޒެފިޔާއިން ޖެހި 3 ލަނޑުވެސް ޖަހާފައިވަނީ ބޭރުމަތި ޓީމުން މެޗު ނިމެން ކައިރިވުމާއެކު އެޓީމުގެ ކުޅުންތެރިންތައް ބަދަލުކުރަން ފެށި ހިސާބުންނެވެ.
މިމެޗުގައި ބޭރުމަތި ޖެހިލަނޑުތަކުގެ ތެރެއިން 3 ލަނޑު ޖެހީ މޮޅުކުޅުންތެރިއާގެ މަޤާމު ހޯދި ބޭރުމަތީގެ ޖާޒީ ނަމްބަރ 9 ޢަލީ ހާފިޒެވެ. އަނެއް 4 ލަނޑު ޖަހައިދީފައި ވަނީ ޙަސަން މިރުފާހާއި، ޢަލީ ފަހުމީއާއި، އިބްރާހީމް ސާމީއާއި، އިބްރާހީމް މުބީން އަޙުމަދު ރަޝީދެވެ.
ޒެފިއާގެ ތިން ލަނޑުގެ ތެރެއިން ދެ ލަނޑު ޖެހީ ޙަސަން ރާއިފް އަޙުމަދެވެ. އަނެއް ލަނޑު ޖެހީ ޙުސައިން ޒައިން ހަނީފެވެ.