ސަޢޫދީ ޢަރަބިއްޔާގެ ވެރިރަށް ރިޔާޟްގައި ހުންނަ ކިންގް ޚާލިދު އިންޓަނޭޝަނަލް އެއާޕޯޓަށް އަމާޒުކޮށް ޔަމަނުގެ ހަތިޔާރުއެޅި ޙޫޘީ ޖަމާއަތުން ދެމުންދާ ނުރައްކާތެރި ހަމަލާތަކާ ގުޅިގެން، އެ އެއާޕޯޓުގެ އޮޕަރޭޝަންތައް މެދުކަނޑައިލާފައި އޮންނަ މުއްދަތު އިތުރުކޮށްފިއެވެ. މި ކަމާ ގުޅިގެން ޢަރަބި ސަރަޙައްދުގެ ގިނަ އެއާލައިންތަކުން ވެސް ވަނީ ސަޢޫދީގެ ދެވަނައަށް އެންމެ ބާރުބޮޑު އެއާޕޯޓަށް ކުރާ ދަތުރުތައް މެދުކަނޑައިލާފައެވެ.
މިދިޔަ ހަފުތާ ބަންދުގައި އެ އެއާޕޯޓުގެ ޕެސެންޖަރ ޓަރމިނަލަށް އަމާޒުކޮށް ޙޫޘީން ދިން ހަމަލާގައި 13 މީހުން މަރުވެ، 309 މީހުންނަށް ވަނީ އަނިޔާވެފައެވެ. އެއާ ޖެހިގެން އައި ދުވަހު ޓަރމިނަލް 4 އަށް އަމާޒުކޮށް ދިން ހަމަލާއެއްގައި ޕާކިސްތާނުގެ ރައްޔިތަކު މަރުވެ، އިތުރު 11 މީހަކަށް ވަނީ އަނިޔާވެފައެވެ.
ސަޢޫދީން އިސްވެ އޮންނަ އަސްކަރީ އިއްތިޙާދުން ބުނީ، އޮކްޓޫބަރު 10 ގެ ހަމަލާއަކީ "ހަނގުރާމައިގެ ޖަރީމާއެއް" ކަމުގައެވެ. އެއާޕޯޓުގެ ވަސީލަތްތަކުގެ ސަލާމަތީ ކަންކަން ކަށަވަރުކުރުމަށް ޓަކައި އޮކްޓޫބަރު 17 ވަނަ ދުވަހުގެ ރޭގަނޑު ސަޢޫދީ ގަޑިން 21:00 އާ ހަމައަށް ނުވަތަ ވަކި ގޮތެއް އަންގަންދެން އެ އެއާޕޯޓުގެ އޮޕަރޭޝަންތައް މެދުކަނޑައިލާފައިވާ ކަން އެ ޤައުމުގެ އިދާރާތަކުން ހާމަކުރިއެވެ. މި ނިންމުމާއެކު، ކޮންމެ ދުވަހަކު 700 އެއްހާ ވައިގެ ދަތުރަށް އަސަރު ކުރާނެއެވެ.
އެއާޕޯޓު ބަންދުކުރުމާ ގުޅިގެން ގަލްފް އެއާ، ޤަޠަރު އެއާވޭސް އަދި ކުވައިތު އެއާވޭސްއިން ވަނީ ރިޔާޟަށް ކުރާ ދަތުރުތައް މެދުކަނޑައިލާފައެވެ. މީގެ އިތުރުން އިއްތިހާދު އެއާވޭސްއިން އަބޫދާބީން ރިޔާޟް، ދަންމާމް އަދި ޖިއްދާއަށް ކުރާ ބައެއް ދަތުރުތައް ހުއްޓާލާފައިވާއިރު، އިޖިޕްޓްއެއާއިން ވަނީ ޤާހިރާ އަދި އިސްކަންދަރިއްޔާއިން ރިޔާޟަށް ކުރާ ދަތުރުތައް ވެސް މެދުކަނޑައިލާފައެވެ.
އޮކްޓޫބަރު 5 ވަނަ ދުވަހުން ފެށިގެން ސަޢޫދީ ޢަރަބިއްޔާގެ ފަސް އެއާޕޯޓަކަށް ޙޫޘީން ވަނީ 10 ހަމަލާއެއް ދީފައެވެ. އަނަދޮލު އޭޖެންސީން ދިރާސާކޮށްފައިވާ ތަފާސްހިސާބުތަކުން ދައްކާ ގޮތުގައި، މި ހަމަލާތަކުގައި ޖުމުލަ 20 މީހުން މަރުވެ، އެތައް ސަތޭކަ ބަޔަކަށް އަނިޔާވެފައިވާއިރު، މިއީ ޖުލައި މަހުން ފެށިގެން ސަޢޫދީ ޢަރަބިއްޔާއާއި ޔަމަނުގެ ޙޫޘީންނާ ދެމެދު ހިނގަމުންދާ އަސްކަރީ ކުރިމަތިލުންތަކުގެ ތެރެއިން ދެވުނު ހަމަލާތަކެކެވެ.