ޔަމަނުގެ ޙޫޘީ ހަނގުރާމަވެރިންނާ ދެކޮޅަށް ސަޢޫދީ ޢަރަބިއްޔާއިން ކުރަމުންދާ ހަނގުރާމައިގައި އެހީތެރިވުމަށް ޕާކިސްތާނުގެ ސިފައިން ސަޢޫދީގައި ހަރަކާތްތެރިވަމުންދާ ކަން އެ ޤައުމުން ކަށަވަރުކޮށްދީފިއެވެ. މި ދަނޑިވަޅުގައި، ސޫރިޔާއިން ވެސް ދަނީ ސަޢޫދީ ޢަރަބިއްޔާއަށް އަސްކަރީ އެހީތެރިކަން ފޯރުކޮށްދިނުމާ މެދު ވިސްނަމުންނެވެ. ޕާކިސްތާނުގެ އަސްކަރިއްޔާގެ ތަރުޖަމާނު ލެފްޓިނެންޓް ޖެނެރަލް އަޙްމަދު ޝަރީފް ޗައުދަރީ ވިދާޅުވީ، ދެ ޤައުމުގެ ދެމެދުގައި ވެފައިވާ އެއްބަސްވުންތަކާއި އަލަށް އެކުލަވައިލި 'މައްކާ ދިފާޢީ އިއްތިޙާދުގެ' އެއްބަސްވުމުގެ ދަށުން ޕާކިސްތާނުގެ ސިފައިން ސަޢޫދީގައި ޙަރަކާތްތެރިވަމުންދާ ކަމުގައެވެ. މީގެ ކުރިން ވެސް 8،000 ސިފައިންނާއި، ހަނގުރާމަކުރާ ސްކޮޑްރަންއެއްގެ އިތުރުން ވައިގެ ދިފާޢީ ނިޒާމުތައް ޕާކިސްތާނުން ވަނީ ސަޢޫދީއަށް ފޮނުވާފައެވެ.
ސަޢޫދީ ޢަރަބިއްޔާއަށް އަމާޒުކޮށް ޙޫޘީން ދެމުންދާ ޑްރޯން އަދި މިސައިލް ހަމަލާތަކާ ގުޅިގެން، ސޫރިޔާގެ ސިފައިންގެ އެހީތެރިކަމަށް ސަޢޫދީން ވަނީ އެދިފައެވެ. ސޫރިޔާގެ ރައީސް އަޙްމަދު އަލް-ޝަރްޢު ދާދި ފަހުން ރިޔާޟަށް ކުރެއްވި ދަތުރުފުޅެއްގައި ސަޢޫދީގެ ވަލީއަޙުދު މުޙައްމަދު ބިން ސަލްމާންއާ ބައްދަލުކުރައްވައި، އަސްކަރީ އެހީތެރިކަން ފޯރުކޮށްދިނުމާ ގުޅޭގޮތުން މަޝްވަރާކުރައްވާފައިވެއެވެ. ސޫރިޔާގެ ޑިޕްލޮމެޓަކު ބުނީ، ސޫރިޔާއިން ސަޢޫދީ ޢަރަބިއްޔާއާއެކު ސާބިތުކަމާއެކު އޮތް ނަމަވެސް، އެ ޤައުމުގެ އެންމެ ބޮޑު އިސްކަމެއް މިވަގުތު ދެނީ 14 އަހަރުވީ ދާޚިލީ ހަނގުރާމައިން އަރައިގަތުމަށް ކަމުގައެވެ.
ނަމަވެސް، އަސްކަރީ ފައުޖެއް ފޮނުވުމަކީ ސޫރިޔާއަށް ބޮޑެތި ނުރައްކާތަކަކާ ކުރިމަތިލާންޖެހިދާނެ ކަމެކެވެ. ސޫރިޔާގެ އައު ޤައުމީ ލަޝްކަރަކީ ކުރީގެ އިދިކޮޅު ޖަމާޢަތްތަކުގެ މައްޗަށް އެކުލެވިގެންވާ ލަޝްކަރަކަށް ވުމާއެކު، އީރާން އަދި ލުބްނާންގެ ޙިޒްބުالله ފަދަ ޖަމާޢަތްތަކާ ސީދާ ކުރިމަތިލުމަކަށް ދިޔުމަކީ ސޫރިޔާއިން ބޭނުންވާ ގޮތެއް ނޫނެވެ. ދީނީ ގޮތުން ވެސް އުފެދިދާނެ ނުތަނަވަސްކަމަކަށް ބަލައި، ބޭރުގެ ހަނގުރާމަތަކުގައި ބައިވެރިނުވުމުގެ ސިޔާސަތެއް ސޫރިޔާއިން ގެންގުޅޭއިރު، މީގެ ކުރިން އެމެރިކާއިން ޙިޒްބުالله އާ ދެކޮޅަށް ހަނގުރާމަކުރުމަށް އެދުނު އެދުމަށް ވެސް ސޫރިޔާއިން ވަނީ ނޫނެކޭ ބުނެފައެވެ.
މި ނުރައްކާތައް ހުރި ނަމަވެސް، ބައިނަލްއަޤުވާމީ މައިދާނުގައި ސޫރިޔާގެ ރައީސް ޝަރްޢު ބަލައިގަތުމުގައި ސަޢޫދީ ޢަރަބިއްޔާއިން އަދާކުރި މުހިންމު ދައުރާއި، ދެމުންދާ މާލީ އެހީތެރިކަމުގެ ސަބަބުން ސޫރިޔާއިން ސަޢޫދީއަށް އެހީވާން ބޭނުންވެއެވެ. މަސްރަޙުގެ ދާރިސުން ވިދާޅުވީ، ޙޫޘީންގެ ހަމަލާތަކުން މުޤައްދަސް ބިންތައް ދިފާޢުކުރުމަށް ކުޑަ ފައުޖެއް ފޮނުވުމަކީ އެކަށީގެންވާ ކަމެއް ކަމަށާއި، ނަމަވެސް ބޮޑު ހަނގުރާމައަކަށް ސޫރިޔާގެ ސިފައިން ނުފޮނުވާނެ ކަމުގައެވެ. މީގެ އިތުރުން، ސަޢޫދީގެ ސިޔާދަތަށް ހުރި ނުރައްކާތަކާ ދެކޮޅަށް ޕާކިސްތާނާއި، ސަޢޫދީ ޢަރަބިއްޔާ އަދި ތުރުކީވިލާތް ގުޅިގެން ވެސް ދަނީ މަސައްކަތްތަކެއް ކުރަމުންނެވެ.