ބްރެޒިލްގެ ރިޔާސީ އިންތިޚާބުގައި ވާދަކުރެއްވި އެއްވެސް ކެނޑިޑޭޓަކަށް ވޯޓުގެ އަޣުލަބިއްޔަތު ކާމިޔާބުނުކުރެވުމާ ގުޅިގެން، އިންތިޚާބު ދެވަނަ ބުރަކަށް ގޮސްފިއެވެ. އޮކްޓޫބަރު 25 ގައި ބޭއްވުމަށް ތާވަލުކޮށްފައިވާ ދެވަނަ ބުރުގައި ވާދަކުރައްވާނީ، ފުރަތަމަ ބުރުގައި ހީކުރެވުނު ވަރަށް ވުރެ ގިނަ ވޯޓު ކާމިޔާބުކުރައްވާފައިވާ ކަނާތުފިޔައިގެ ސެނެޓަރު ފްލާވިއޮ ބޮލްސޮނާރޯއާއި މިހާރުގެ ރައީސް ލުއީސް އިނާސިއޮ ލޫލާ ދަ ސިލްވާއެވެ. އިންތިޚާބުގެ ކުރިން ހަދާފައިވާ ސާވޭތަކުން ލޫލާ ކުރީގައި އުޅުއްވާނެ ކަމަށް ދެއްކި ނަމަވެސް، ބޮލްސޮނާރޯ ވަނީ ވޯޓުގެ %47 ހޯއްދަވާފައެވެ. ވާތުފިޔައިގެ ރައީސް ލޫލާއަށް ލިބިވަޑައިގަތީ ވޯޓުގެ %45 އެވެ.
ބްރެޒިލް ބޭނުންވަނީ ބަދަލެއް ކަމަށާއި މިއީ ވޯކަރސް ޕާޓީގެ ޒަމާން ނިމުމުގެ ފެށުން ކަމަށް ބޮލްސޮނާރޯ ވިދާޅުވިއެވެ. އޭނާއަކީ 2022 ގެ އިންތިޚާބަށް ފަހު ބަޣާވާތެއް ރޭވި ކަމުގެ ކުށުގައި 27 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޖައިރު ބޮލްސޮނާރޯގެ ދަރިކަލުންނެވެ. ފުރަތަމަ ބުރުން ކާމިޔާބު ވާނެ ކަމަށް އުންމީދު ކުރެއްވި ލޫލާ ވިދާޅުވީ، ދެވަނަ ބުރުގެ ކެމްޕޭނުގައި ސަރުކާރުގެ ކާމިޔާބީތައް ރައްޔިތުންނަށް ހާމަކޮށްދެއްވާނެ ކަމުގައެވެ.
މި އިންތިޚާބުގައި މައިގަނޑު ގޮތެއްގައި ބަހުސް ހިނގީ ދިރިއުޅުމުގެ ޚަރަދުތަކާއި ކޮރަޕްޝަން އަދި ކުށްކުރުމުގެ މައްސަލަތަކާ ގުޅޭގޮތުންނެވެ. ވަޒީފާނެތް މީހުންގެ ނިސްބަތް ދަށްވި ނަމަވެސް، ދަރަންޏާއި ތަކެތީގެ އަގު އުފުލުމުގެ ސަބަބުން ލޫލާއަށް އޮތް ތާޢީދު ވަނީ ފަނޑުވެފައެވެ. ޤައުމީ އުފެއްދުންތެރިކަމުގެ %82 އަށް ވުރެ މައްޗަށް ދައުލަތުގެ ދަރަނި އަރާފައިވާ އިރު، މި އަހަރާއި އަންނަ އަހަރުގެ އިޤުތިޞާދީ ދުވެލި %2.0 އަދި %2.3 އަށް ދަށްވާނެ ކަމަށް ސަރުކާރުން ވަނީ ލަފާކޮށްފައެވެ.
ބެންކޯ މާސްޓަރގެ ބޮޑު ޚިޔާނާތާއި މަނީ ލޯންޑްރިންގެ ތުހުމަތުތަކުގެ ސަބަބުން ސިޔާސީ މަސްރަޙު ހޫނުވެފައިވާ އިރު، ބޮލްސޮނާރޯ ވަނީ އެ ޚިޔާނާތާއި އޭނާއާ އޮތް ގުޅުމާމެދު ކުރެވޭ ތުހުމަތުތައް ދޮގުކުރައްވާފައެވެ. މީގެއިތުރުން، އެމެރިކާއާއި ރަޝިއާގެ ނުފޫޒު އިންތިޚާބަށް އޮތް ކަމަށް ބުނާ މައްސަލަތަކެއް ފްރާންސާއި ޖަރމަނީގެ ވަފުދަކާ ބްރެޒިލްގެ ޖާސޫސީ އިދާރާއިން ހިއްސާކުރި ނަމަވެސް، އެމެރިކާއިން ވަނީ އެ ތުހުމަތުތައް ދޮގުކޮށްފައެވެ. އިންތިޚާބީ ކޯޓުގެ އިސްވެރިޔާ ކާސިއޯ ނޫންޔޭޒް މާކޭސް ވިދާޅުވީ، ވޯޓުލުމުގެ ކަންކަން ކުރިއަށްދިޔައީ ވަރަށް އޮމާންކަމާއެކު ކަމުގައެވެ.