"މަގު ހެދުމުގެ މަޝްރޫޢުތަކާއެކު އަލިފާނުގެ ހާދިސާތަކަށް އިޖާބަދޭން ފަސޭހަވާނެ"

މިހާރު ކުރިއަށްދާ މާލެގެ މަގު ހެދުމުގެ މަޝްރޫޢުތަކުގެގެ މަސައްކަތް ނިމޭއިރު އަލިފާނުގެ ހާދިސާތަކަށް އިޖާބަދިނުމަށް މިހާރަށްވުރެ ފަސޭހަވާނެކަމަށް ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވެއްޖެއެވެ.

މިރޭ ބޭއްވި އަހާފޯރަމްގައި ވަޒީރު ޙަސަން ރަޝީދު ވިދާޅުވީ، މާލޭގައި ހިނގާފާނެ އަލިފާނުގެ ހާދިސާތަކުން ރައްކާތެރިވުމަށް ދިފާޢީ ބާރުން ކުރަންޖެހޭ މަސައްކަތްތައް ވަރަށް ޚާއްސަ ސަމާލުކަން ދެއްވައިގެން ކުރައްވާކަމަށެވެ. މަލޭގައި އަލިފާނުގެ ހާދިސާއެއް ހިނގައިފި ނަމަ، އަވަހަށް އިޖާބަދިނުމަށާއި، ވީހާވެސް އަވަހަށް އަލިފާން ނިއްވުމަށް ގިނަ މަސައްކަތްތަކެއް ކުރެވޭކަން ވަޒީރު ފާހަގަކުރެއްވިއެވެ. ނަމަވެސް މިހާރު ބައެއް އިންތިޒާމްތައް ހަމަޖެހިފައި ހުންނަ ގޮތުން އަލިފާން ނިއްވުމުގެ މަސައްކަތަށް ހުރަސް އެޅޭ ކަމަށާއި އެކަންކަން ކުރިއަށް އޮތްތަނުގައި ހައްލުވާނެކަމަށް ވިދާޅުވިއެވެ.

"ޒަމާނީ ފެންވަރަށް މަގު ހެދުމުގެ މަސައްކަތް އެބަ ކުރިއަށްދޭ ޗައިނާ ސަރުކާރުގެ ހިލޭ އެހީގައި. އެ މަސައްކަތް ނިމޭއިރު މިފަދަ ހުރިހާ ކަމަކަށް ހައްލު ލިބޭނެ އިރާދަކުރެއްވިއްޔާ." ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވިއެވެ.

އަލިފާނުގެ ޚާދިސާތައް އިތުރުވަމުންދާކަމަށާއި، އޭގެ މައިގަނޑު ސަބަބަކީ ކުދި ތަންތަނުގައި ދިރިއުޅެންޖެހުންކަމަށް ވަޒީރު ވިދާޅުވިއެވެ. އެފަދަ ތަންތަނުގައި ކަރަންޓު ވަޔަރުކޮށްފައި ހުންނަނީ އެންމެ ރަނގަޅަށް ނޫންކަމަށާއި، އެއީ އަލިފާނުގެ ހާދިސާތައް ހިންގަން މެދުވެރިވާ ސަބަބެއްކަމަށް ވަޒީރު ވިދާޅުވިއެވެ.

"މީގެއިތުރުން ހަނި ގޯޅިތަކަށް ފަޔަރ ވެހިކަލްތަކަށް ނުވަދެވޭ. އަދި ހުރޭ ފެން ހޮޅި ވަޅުލާފަ އަލިފާން ނިއްވާލަން. އޭގެ މަތީގައި ވެހިކަންތައް ޕާކްކޮށްފަިއ ހުންނާތީ ވަރަށް އުނދަނގޫ މިކަން ކުރަން." ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވިއެވެ.

ގޭސް ރެގިއުލޭޓަރތައް ބޭނުންކުރުމުގައި ފެންވަރު ދަށް ރެގިއުލޭޓަރ ބޭނުންކުރުމަކީވެސް އަލިފާނުގެ ހާދިސާތައް ހިނގާއިރު ދެނެ ގަންނަން ދިމާވާ ގޮންޖެހުމެއްކަމަށް ވަޒީރު ވިދާޅުވިއެވެ. މީގެ އިތުރުން އަލިފާނުގެ ހާދިސާތައް މަދުކުރުމަށް އާއްމުންނަށް އަމާޒުކޮށްގެން ހޭލުންތެރި ކުރުމުގެ ޕްރޮގްރާމްތައް ހިންގަމުންދާކަން ވަޒީރު ފާހަގަކުރެއްވިއެވެ.

އަދުގެ ސަރުކާރުން މާލޭގެ މަގުތައް ތަރައްޤީކުރުމަށް ޚާއްސަ އިސްކަމެއް ދެއްވައިގެން މިހާރުވެސް ގެންދަވަނީ މުހިންމު މަސައްކަތްތަކެއް ކުރައްވަމުންނެވެ. އެގޮތުން ބޮޑުތަކުރުފާނުގެ ބޮޑު ސަރަޙައްދެއް މިހާރުވަނީ ފުޅާކޮށް ޒަމާނީ ފެންވަރަށް ތަރައްޤީކޮށްފައިވާއިރު، މި މަޝްރޫޢެއް އިތުރު ފިޔަވަހިތައް ކުރިއަށްގެންދިއުމަށް ވަނީ ނިންމާފައެވެ. މީގެ އިތުރުން މާލެއާ ވިލިމާލެ ހިމެނޭހެން ޗައިނާ ސަރުކާރުގެ އެހީގައި ތަރައްޤީކުރާ މަގުތަކުގެ މަޝްރޫޢު ފެށުމަށް ދަނީ ތައްޔާރުވަމުންނެވެ. މިމަގުތައް ހަދާ ނިމޭއިރު އަލިފާން ނިއްވުމުގެ އިންތިޒާމުތައްވެސް ފަހިކުރެވޭނެކަމަށް ސަރުކާރުން ވަނީ ވިދާޅުވެފައެވެ.