ފަތުރުވެރިކަމުގެ ދާއިރާގައި ޑެސްޓިނޭޝަން ޕްރިންސިޕަލް ތަންފީޒުކުރަން ފަށައިފި

ރާއްޖެއިން ބޭރުގައި ރަޖިސްޓްރީވެގެން މަަސައްކަތް ކުރާ ފަތުރުވެރިކަމުގެ އެކި ޕްލެޓްފޯމްތަކުން ޖީއެސްޓީ ނެގުމަށް މުދަލާއި ޚިދުމަތުން ޓެކްސް ނެގުމުގެ ޤާނޫނަށް ގެނައި 8 ވަނަ އިސްލާހަށް ޢަމަލުކުރަން ފަށައިފިއެވެ. ޤާނޫނަށް ޢަމަލުކުރަން ފަށާފައިވަނީ، އެ ޤާނޫނާއި ގުޅިގެން ހަދަންޖެހޭ ޤަވާއިދުތައް ހެދުމަށްފަހު މީރާ މެދުވެރިކޮށް އެ ވިޔަފާރިތައް ރަޖިސްޓްރީވުމުގެ ފުރުސަތު ދިނުމަށްފަހުއެވެ.

މިއީ، ރާއްޖޭގެ ޓެކްސްގެ ނިޒާމު އިތުރަށް ހަރުދަނާ ކުރުމަށް ސަރުކާރުން ޤާނޫނަށް ގެނައި އިސްލާހެކެވެ. މިއިސްލާހުގެ ދަށުން ރާއްޖޭގައި ޑެސްޓިނޭޝަން ޕްރިންސިޕަލް ތަންފީޒުކުރަން ފެށުމަށް އޮފް ޝޯ ބުކިންގ ޕްލެޓްފޯމުތަކާއި ބޭރުގެ ޓުއަރ އޮޕަރޭޓަރުންނާއި، ޓްރެވަލް އެޖެންޓުންނަށް ދޭ މުދަލާއި ޚިދުމަތުގެ އަގުން ޖީއެސްޓީ ނެގުމުގެ އުސޫލުތައް ވަނީ ހިމަނާފައެވެ.

މި އިސްލާހުގައި ބުނެފައިވާ ގޮތުގައި އެއްވެސް ފަރާތަކުން ރާއްޖޭގައި ހުރި އެ ފަރާތެއްގެ ވިޔަފާރި ހިންގާ ތަނަކުން ޚިދުމަތް ދީފިނަމަ އެއީ ރާއްޖޭގައި ދޭ ޚިދުމަތުގެ ގޮތުގައި ބެލޭނެއެވެ.

ރާއްޖޭގައި ރަޖިސްޓްރީކޮށްފައިވާ ފަރާތްތަކަށް ނުވިނަމަވެސް ޚިދުމަތް ފޯރުވައިދިން ވަގުތު ރާއްޖޭގައި ހުރި ފަރާތަކުން އެ ޚިދުމަތުގެ އަމަލީ މަސައްކަތް ރާއްޖޭގައި ކޮށްފިނަމަ ނުވަތަ އެއީ ރާއްޖޭގައި ހުރި ނުއުފުލޭ މުދަލަކާ ގުޅޭ ޚިދުމަތެއް ނަމަ އެއީ ރާއްޖޭގައި ފޯރުވައިދިން ޚިދުމަތެއްގެ ގޮތުގައި ބަލާނެއެވެ.

މި އިސްލާހުގައި ޖީއެސްޓީ ނެގުން ލާޒިމުވާ ކަންކަމުގެ ތެރޭގައި ޓެކްސް ނެގޭ ހަރަކާތް ހިންގާ ވިޔަފާރީގެ ދާއިމީ ތަނެއް ރާއްޖޭގައި ނެތް ނަމަވެސް އިންބައުންޑް ޓޫރިޒަމް ޕްރޮޑަކްޓެއް ރާއްޖޭގައި ފޯރުވައިދިނުމަށް ހިމަނާފައިވެއެވެ. ބިލުގައި އިންބައުންޑް ޓޫރިޒަމް ޕްރޮޑަކްޓުގެ ގޮތުގައި ކަނޑައަޅާފައިވަނީ، ރާއްޖޭގައި ހިންގާ އެކޮމޮޑޭޝަނާއި ކެއުމާއި ދަތުރުފަތުރު ފަދަ ފަތުރުވެރިކަމާ ގުޅުންހުރި ހަރަކާތްތަކެވެ.

މުދަލާއި ޚިދުމަތުން ޓެކްސް ނެގުމުގެ ނިޒާމު ތަންފީޒު ކުރުމުގައި ދިމާވާ ދަތިތަކަށް ހައްލު ހޯދައި، އެ ނިޒާމު އިތުރަށް ހަރުދަނާ ކުރުމަށް މި ބިލުގެ ސަބަބުން މަގުފަހިވާނެއެވެ.

ޤާނޫނަށް ގެނައި އިސްލާހުގެ ދަށުން ރާއްޖެއިން ބޭރުގައި ރަޖިސްޓްރީކޮށް ރާއްޖޭގައި ފަތުރުވެރިކަމުގެ އެކި ޚިދުމަތްތައް ދޭ ފަރާތްތަކުން ޖީއެސްޓީ ދައްކަން ޖެހޭނީ، ފަތުރުވެރިކަމުގެ ޖީއެސްޓީ ރޭޓާއި އެއްގޮތަށް 17 އިންސައްތައިގައެވެ. މީރާއިން ވަނީ، މިފަދަ ވިޔަފާރިތަކަށް ރަޖިސްޓްރީވުމަށް ފުރުސަތު ހުޅުވާލާފައެވެ. އެ ވިޔަފާރިތައް ރަޖިސްޓްރީވުމަށްފަހު ޖީއެސްޓީ ބަޔާން ހުށަހެޅުމާއި، ޖީއެސްޓީ ދެއްކުމުގެ ކަންކަން ކުރިއަށް ގެންދާނެ އުސޫލުވެސް ވަނީ އާންމުކޮށްފައެވެ. މީގެ އިތުރުން މީރާގެ އޮންލައިން ޕްލެޓްފޯމް މެދުވެރިކޮށް ޖީއެސްޓީގެ ކަންކަން ކުރިއަށް ގެންދެވޭނެ ނިޒާމު ހަމަޖައްސައި، އެ ފަރާތްތަކަށް މައުލޫމާތު ފޯރުކޮށްދިނުމަށް އަދި މައުލޫމާތު ހޯދުމަށް ޚާއްސަ އީމެއިލް އެޑްރެހެއް އަދި ވަޓްސްއެޕް ނަންބަރެއްވެސް މީރާއިން ވަނީ އާންމުކޮށްފައެވެ.

މީރާއިން ވަނީ މުދަލާއި ޚިދުމަތުގެ ޤާނޫނަށް ގެނައި އިސްލާހާއެކު، މިހާރު ޓެކްސް ދައްކަމުންދާ ފަރާތްތަކުން ޢަމަލު ކުރަންޖެހޭ އުސޫލަށްވެސް އަދި ޓެކްސް ދައްކާ މިންވަރަށް ބަދަލެއް ނާންނާނެ ކަމަށް ވިދާޅުވެފައެވެ.

ޤާނޫނަށް ގެނައި އިސްލާހާއެކު ސަރުކާރުން ވަނީ، ދައުލަތައް ލިބޭނެ އާމްދަނީގެ އަންދާޒާ އެއްވެސް ހިއްސާކޮށްފައެވެ. އޮފް ޝޯ ބުކިންގ ޕްލެޓްފޯމުތަކާއި، ބޭރުގެ ޓުއަރ އޮޕަރޭޓަރުންނާއި، ޓްރެވަލް އެޖެންޓުން ފަދަ ރާއްޖޭގައި ޚިދުމަތްދޭ ދާއިމީ ތަނެއް ނެތް ފަރާތްތަކުގެ އަތުން ޓެކްސް ނަގަން ފެށުމުން ދައުލަތުގެ އާމްދަނީއަށް އަހަރަކު 1.6 ބިލިޔަން ރުފިޔާ އިތުރުވާނެ ކަމަށް ވަނީ އަންދާޒާކޮށްފައެވެ.