ސިޓީ ވިއްކާލަފާނެތީ އިނގިރޭސި ބޮޑުވަޒީރުގެ ކަންބޮޑުުވުން!

މެންޗެސްޓަރ ސިޓީ އާއި ދެކޮޅަށް އިންގްލިޝް ޕްރިމިއަރ ލީގުން އުފުލާފައިވާ ދައުވާތައް ސާބިތުވާކަމަށް ބުނުމާއި ގުޅިގެން އެކްލަބްގެ އަބޫދާބީ ވެރިން ސިޓީ ވިއްކާލަން ނިންމަފާނެތީ ކަންބޮޑުވެ ވަޑައިގަންނަވާކަން އިނގިރޭސިވިލާތުގެ ބޮޑު ވަޒީރު އެންޑީ ބަރންހަމް ވިދާޅުވެއްޖެއެވެ.

2008 ވަނަ އަހަރު ސިޓީ ގަތުމަށްފަހު މެންޗެސްޓަރގެ ތަރައްގީއަށްޓަކައި ސިޓީގެ ވެރިން ކޮށްފައިވާ އިންވެސްޓްމަންޓްތަކަށް ބަރންހަމްވަނީ ތައުރީފް ކުރައްވާފައެވެ. ބަރންހަމް ވިދާޅުވީ ސިޓީގެ ވެރިން ގެއްލިދާނެތީ ވަރަށް ބޮޑަށް ކަންބޮޑުވެވަޑައިގަންނަވާކަމަށެވެ. އޭނާ ވިދާޅުވިގޮތުގައި ސިޓީގެ އަބޫދާބީ ވެރިންވަނީ މެންޗެސްޓަރއަށް ޒަމާނީ ތަރައްގީ ގެނެސްދީ އެސިޓީ ތަރައްގީ ކުރުމުގައި އިސްދައުރެއް އަދާކޮށްފައެވެ. އަދި މެންޗެސްޓަރ ސިޓީ ފުޓްބޯޅަ ކްލަބް ދުނިޔޭގެ ފެންވަރުގެ ގަދަ ބާރަކަށް ހެދުމުގައި މުހިންމު މަސައްކަތްތަކެއް ކޮށްފަ ކަމަށްވެސް ވިދާޅުވިއެވެ.

ޕްރިމިއަރ ލީގުން އިއްޔެވަނީ ސިޓީގެ މައްޗަށް އެލީގުން އުފުލި ދައުވާތައް ސާބިތުވާކަން ހާމަކޮށް އަދި ސިޓީއިން މާލީގޮތުން ބޮޑެތި އޮޅުވާލުންތަކެއް އޮޅުވާލާފައިވާކަން ހާމަކޮށްފައެވެ. ނަމަވެސް ސިޓީއިން އަންނަނީ އެކްލަބުން ގަވައިދާ ހިލާފަށް އެއްވެސް ކަމެއް ކޮށްފައިނުވާނެކަން ތަކުރާރުކޮށް ހާމަކުރަމުންނެވެ.

އިނގިރޭސި ބޮޑުވަޒީރު ކަމަށް ވަޑައިގެންނެވުމުގެ ކުރިން ގްރޭޓަރ މެންޗެސްޓަރގެ މޭޔަރކަން ކުރައްވާފައިވާ ބަރންހަމްވަނީ ސިޓީގެ މިމައްސަލަ އާއި އޭނާ ސަޕޯޓް ކުރައްވާ ޕްރިމިއަރ ލީގުގެ ކްލަބް އެވަޓަންގެ މައްޗަށް ޕްރިމިއަރ ލީގުން މީގެ ދެ އަހަރެއް ހާދުވަސް ކުރިން އުފުލި މިފަދަ ދައުވާއެއްގައި ކުރިމަތިވި ކަންތައްތަކާއި އަޅާ ކިޔުންވާފައެވެ. ބަރންހަމް އިނގިރޭސި ބޮޑުވަޒީރަށް ވެވަޑައިގެންނެވުމުގެ ކުރިން ހިނގި މިކަންތަކުގައި އޭނާވަނީ އެވަޓަންގެ ދިފާއުގައި މަސައްކަތް ކުރައްވާފައެވެ. އަދި އެފަހަރު އެވަޓަން އާއި ދޭތެރޭ ޕްރިމިއަރ ލީގުން ކަންކޮށްފައިވަނީ އެންމެ އިންސާފުވެރިކޮށް ނޫންކަން ބަރންހަމް ވިދާޅުވެއެވެ. ބަރންހަމް ވިދާޅުވީ އެފަހަރު އެވަޓަން އާއި ދެކޮޅަށް އުފުލި ކަންތަކުގައިވެސް އެކްލަބް ގަވައިދުތަކާއި ހިލާފުވެފައިވާކަމަށް މީހުންވަނީ ވަރަށް ފަސޭހައިން ގަބޫލް ކޮށްފަ ކަމަށާއި ނަމަވެސް އޭނާ އަދިވެސް ގަބޫލްފުޅުކުރައްވާގޮތުގައި އެފަހަރު އެވަޓަން އާއި ދޭތެރޭ އަމަލުކޮށްފައިވަނީ އިންސާފުވެރިކޮށް ނޫންކަމަށެވެ. އަދި އެކަން އަމިއްލަ ފުޅަށް ކުރިން އިހްސާސް ކުރެއްވިފައިވާ ބޭފުޅެއްގެ ހައިސިއްޔަތުން ސިޓީގެ ކަންތަކުގައި ވަކިކޮޅެއް ނަންގަވައިގެން ވާހަކަ ދެއްކެވުން ރަނގަޅު ނުވާނެކަމަށް ބަރންހަމް ވިދާޅުވިއެވެ.