މިދިޔަ މަހު ޒަކާތު ފަންޑުގެ ބޮޑު ބައެއް ފަޤީރުންނާއި މިސްކީނުންނަށް އެހީވުމަށް

މިދިޔަ މަހު ޒަކާތު ފަންޑުން އެންމެ ބޮޑު ހޭދައެއްކޮށްފައިވަނީ ފަޤީރުންނާއި މިސްކީނުންނަށް މާލީ އެހީތެރިކަން ފޯރުކޮށްދިނުމަށް ކަމަށް މޯލްޑިވްސް ޒަކާތު ހައުސްއިން ހާމަކުރައްވައިފިއެވެ.

ޒަކާތު ހައުސްއިން ހާމަކުރި ތަފާސްހިސާބުތައް އެކުލަވާލާފައިވަނީ، މާލީ ކަންކަމާއި ސަރުކާރު ކުންފުނިތަކާއި ބެހޭ ވުޒާރާގެ، އެސްއޭޕީ ސިސްޓަމްގައިވާ ޒަކާތު ފަންޑަށް ލިބުނު ފައިސާއާއި ހޭދަތަކުގެ ރެކޯޑުތަކަށް ބަލައިގެންނެވެ.

މޯލްޑިވްސް ޒަކާތު ހައުސްއިން އާންމުކޮށްފައިވާ ތަފާސްހިސާބުތަކަށް ބަލާއިރު އޮގަސްޓު މަހު އެކި ކަންކަމަށް މާލީ އެހީތެރިކަން ފޯރުކޮށްދިނުމަށް މުޅި ޖުމުލަ 5,170,675 ދޫކޮށްފައިވެއެވެ. މިދިޔަ އަހަރުގެ އޮގަސްޓު މަހު ޒަކާތު ފަންޑުން އެކި ކަންކަމަށް އެހީތެރިވުމަށް ދޫކޮށްފައިވަނީ، 4,615,944 ރުފިޔާއެވެ. އެހެންކަމުން މިއީ %12ގެ އިތުރުވުމެކެވެ.

MVR 5.17 Million Distributed in Zakat Assistance in August 2026https://t.co/tFq6pfM7WP pic.twitter.com/hcZHMzbYx5

— Maldives Zakat House (@ZakatHouseMv) September 30, 2026

ތަފާސްހިސާބުތަކަށް ބަލާއިރު އޮގަސްޓު މަހު ޒަކާތު ފަންޑުން އެންމެ ބޮޑު ބައެއް ހޭދަކޮށްފައިވަނީ، ފަޤީރުންނާއި މިސްކީނުންގެ ބަޔަށެވެ. އެއީ، މުޅި ޖުމްލަ 2,358,675 ރުފިޔާއެވެ. މީގެ ތެރޭގައި ބޭސްފަރުވާގެ އެހީގެ ގޮތުގައި ދޫކުރި 2,316,175 ރުފިޔާއާއި ޒަރޫރީ ބޭނުންތަކަށް ދޫކުރި 42,500 ރުފިޔާ ހިމެނޭ ކަމަށް ޒަކާތު ހައުސްއިން ވިދާޅުވިއެވެ.

ދެން އެންމެ ބޮޑު ހޭދައެއް ކޮށްފައިވަނީ، ފީސަބީލިﷲގެ ބަޔަށެވެ. އެއީ، މުޅި ޖުމުލަ 2,544,823 ރުފިޔާއެވެ. މީގެ ތެރޭގައި ދީނީ ޕްރޮގްރާމްތައް ހިންގުމަށް ހޭދަކުރި 1,047,219 ރުފިޔާއާއި، މަތީ ތައުލީމު ފުރިހަމަ ކުރުމަށް އެހީގެ ގޮތުގައި ދިން 797,604 ރުފިޔާއާއި، ފޮތްތައް ތަރުޖަމާ ކުރުމަށް ހޭދަކުރި 579,585 ރުފިޔާގެ އިތުރުން ހިފްޒު ޕްރޮގްރާމުތަކާއި ކީރިތި ޤުރްއާނުގެ ޢިލްމު ފެތުރުމަށް ހޭދަކުރި 120,414 ރުފިޔާވެސް ހިމެނެއެވެ.

އޮގަސްޓު މަހުގެ ތަފާސްހިސާބުތަކުން ދައްކާ ގޮތުގައި، ދަރަނިވެރިންނަށް އެހީވުމުގެ ބައިން (އަލްޣާރިމީން) 60,061 ރުފިޔާ ދޫކޮށްފައިވާއިރު، ހާލުގައި ޖެހިފައިވާ ދަތުރުވެރިންގެ ބައިން (އިބްނުއްސަބީލް) 19,834.02 ރުފިޔާ ވަނީ ދޫކޮށްފައެވެ. އަދި އޮގަސްޓު މަހުގެ ތެރޭގައި ޒަކާތު ފަންޑަށް ލިބުނު އާމްދަނީގެ ގޮތުގައި 7,353,416.98 ރުފިޔާ ރެކޯޑު ކޮށްފައިވެއެވެ.