ޤައުމީ ޖޫނިއާ ސާފިން ޗެމްޕިއަންޝިޕް އަންނަ މަހު

މޯލްޑިވްސް ސާފިން އެސޯސިއޭޝަނުން ކުރިއަށް ގެންދާ ގައުމީ ޖޫނިއާ ސާފިން ޗެމްޕިއަންޝިޕް އަންނަ މަހު ބާއްވަން ނިންމައިފިއެވެ.

ޒުވާން ރާޅާއެޅުންތެރިންނަށް އަމާޒުކޮށްގެން ސާފިން އެސޯސިއޭޝަނުން ކުރިއަށް ގެންދާ މި މުބާރާތް މި އަހަރު ކުރިއަށް ދާނީ އަންނަ މަހުގެ 29 އިން 31 ގެ ނިޔަލަށް މާލެ ވަރުނުލާ ރާޅުގަނޑުގައެވެ.

ޒުވާން ސާފަރުންގެ ބޮޑު ތަރުހީބެއް ލިބޭ މި މުބާރާތުގައި ހަތަރު ކެޓަގަރީއަކުން ވާދަކުރުމުގެ ފުރުސަތު އޮންނާނެއެވެ. އެއީ 18 އަހަރުން ދަށުގެ ކެޓަގަރީ، 16 އަހަރުން ދަށުގެ ކެޓަގަރީ، 14 އަހަރުން ދަށުގެ ކެޓަގަރީގެ އިތުރުން 18 އަހަރުން ދަށުގެ އަންހެން ކެޓަގަރީންނެވެ.

މިދިޔަ އަހަރު ކުރިއަށްދިޔަ މި މުބާރާތުގެ 18 އަހަރުން ދަށުގެ ކެޓަގަރީން 16 އެތުލީޓުން ވާދަކުރިއިރު، 16 އަހަރުން ދަށުގެ ކެޓަގަރީން 14 އެތުލީޓުން ވާދަކުރިއެވެ. އަދި 14 އަހަރުން ދަށުގެ ކެޓަގަރީގައި ހަތަރު އެތުލީޓުން ވާދަކުރިއިރު، 18 އަހަރުން ދަށުގެ އަންހެން ކެޓަގަރީގައި 6 އެތުލީޓުން ވާދަކުރިއެވެ.


މި މުބާރާތުގެ 18 އަހަރުން ދަށުގެ ޖޫނިއާ ކެޓަގަރީގެ އެންމެ ފަހުގެ ޗެމްޕިއަންކަން ހޯދީ ޔަސިން އަހުމަދު ނާޝިދުއެވެ. ޔަސިން ޗެމްޕިއަންކަން ހޯދީ މުހައްމަދު އިނާން ޢަބްދުލްހަންނާނު ބަލިކޮށްގެންނެވެ.

މި މުބާރާތުގެ 16 އަހަރުން ދަށުގެ އެންމެ ފަހުގެ ޗެމްޕިއަންކަން ހޯދީ ޔޫސުފް ކަޔާން ހަމްދާން ޒަކީއެވެ. އޭނާ ޗެމްޕިއަންކަން ހޯދީ ކަޔާން ޢަބްދުﷲ އަރީފް ބަލިކޮށްގެންނެވެ. އަދި 14 އަހަރުން ދަށުގެ އެންމެ ފަހުގެ ޗެމްޕިއަންކަން ހުސެއިން އަޒާން އިސްމާޢީލް ހޯދީ އަހުމަދު އާލް އާދިލް ބަލިކޮށްގެންނެވެ.

18 އަހަރުން ދަށުގެ އަންހެން ޑިވިޝަނުގެ ޗެމްޕިއަންކަން އާލިޔާ ލަތީފް ހޯދީ އައިޝަތު ތާރާ ވާސިފް ބަލިކޮށްގެންނެވެ.

މިދިޔަ އަހަރު މި މުބާރާތުގައި ވާދަކުރި އެތުލީޓުންގެ ތެރެއިން ޔަސިންއާ ކަޔާން ވަނީ މި އަހަރު ޖަޕާނުގައި ކުރިއަށްދިޔަ އޭޝިއަން ގޭމްސްގައި ވެސް ވާދަކޮށްފައެވެ. އޭގެ ތެރެއިން ޔަސިން ވަނީ އޭޝިއަން ގޭމްސްގެ ސާފިން އިވެންޓުގެ ތިންވަނަ ބުރުގައި ވެސް ވާދަކޮށްފައެވެ.